ವೇದ, ಉಪನಿಷತ್, ಆಚರಣೆಗಳಿಗಿದೆ ವೈಜ್ಞಾನಿಕ ಮಹತ್ವI vedha upanishat

ಶಿವಮೊಗ್ಗ: ನಿವೃತ್ತಿಯ ಬಳಿಕವಷ್ಟೇ ಧಾರ್ಮಿಕ (dharmika) ಪ್ರಜ್ಞೆ ಬೆಳೆಸಿಕೊಂಡರೆ ಸಾಕು ಎಂಬ ಭಾವನೆ ಹಲವರಲ್ಲಿ ಇರುವುದು ದುರದೃಷ್ಟ. ಮೂಲ ಸಂಸ್ಕಾರ, ಧಾರ್ಮಿಕ ಭಾವನೆ ಮನೆಯಿಂದಲೇ ಆರಂಭವಾಗಬೇಕೆಂಬ ಸರಳ ಸತ್ಯವನ್ನು ಮರೆತಿದ್ದೇವೆ ಎಂದು ಸಹ್ಯಾದ್ರಿ (sahyadri) ವಿಜ್ಞಾನ ಕಾಲೇಜಿನ ಕಂಪ್ಯೂಟರ್ ವಿಭಾಗದ ಮುಖ್ಯಸ್ಥ ಡಾ. ಎಂ.ಎಚ್.ವಿದ್ಯಾಶಂಕರ (vidhya shankara) ಬೇಸರ ವ್ಯಕ್ತಪಡಿಸಿದರು.

ಕಾರಕೋಡ್ಲು ಸದ್ವಿದ್ಯಾವೇದ ಪಾಠಶಾಲೆಯ 7ನೇ ವಾರ್ಷಿಕೋತ್ಸವದ ಅಂಗವಾಗಿ ಹರಕೆರೆ ರಾಮೇಶ್ವರ ದೇವಸ್ಥಾನದಲ್ಲಿ ಏರ್ಪಡಿಸಿದ್ದ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳ ಬಳಿಕ ವಿಶೇಷ ಉಪನ್ಯಾಸ ನೀಡಿದ ಅವರು, ಭಾರತದಲ್ಲಿ ಋಷಿಮುನಿಗಳಿಂದ ಗುರುಕುಲ ಮಾದರಿಯಲ್ಲಿ ಜನ್ಮ ತಾಳಿದ್ದೇ ವೇದ ಪಾಠಶಾಲೆ ಎಂದು ವಿವರಿಸಿದರು.

ಪ್ರತಿ ಗುರುಕುಲದಲ್ಲಿ ಕನಿಷ್ಠ 20 ಸಾವಿರ ವಿದ್ಯಾರ್ಥಿಗಳಿದ್ದರು. ದೇವರ ಆರಾಧನೆ ಜತೆಗೆ ವೇದಗಳ ಆರಾಧನೆಯೂ ನಮ್ಮ ಸಂಸ್ಕೃತಿ. ಇಂದು ಅನೇಕರು ವೇದಗಳಿಗೆ ಪುರಾವೆ ಕೇಳುತ್ತಾರೆ. ಆದರೆ ವೇದ ಎಂಬುದು ಗುರು-ಶಿಷ್ಯರ ಪರಂಪರೆ ಮೂಲಕ ಪೀಳಿಗೆಯಿಂದ ಪೀಳಿಗೆ ಹರಿದು ಬಂದಿದೆ ಎಂದರು.

ಪ್ರಾಚೀನ ಗುರುಕುಲಗಳಲ್ಲಿ ಉಚಿತವಾಗಿ ದೊರೆಯುತ್ತಿದ್ದ ವಿದ್ಯೆಗೆ ಹೆಚ್ಚಿನ ಗೌರವವಿತ್ತು. ವೇದಗಳ ಜತೆಗೆ ಅನೇಕ ಸಂಗತಿಗಳನ್ನು ಅಲ್ಲಿ ಕಲಿಸಲಾಗುತ್ತಿತ್ತು. ಹೀಗಾಗಿ ಅಂದಿನ ಮಕ್ಕಳು ದೃಢವಾಗಿ ನಿಲ್ಲುತ್ತಿದ್ದರು. ಈಗಿನ ಮಕ್ಕಳು ಚೆನ್ನಾಗಿ ಓದಬೇಕು, ಅಂಕ ಗಳಿಸಬೇಕು. ಗೆಲುವು ಸಾಧಿಸಬೇಕು ಎಂಬುದನ್ನು ಪಾಲಕರು ಮಕ್ಕಳಿಗೆ ಹೇಳಿಕೊಡುತ್ತಿದ್ದಾರೆ. ಆದರೆ ಸೋತಾಗ ಏನು ಮಾಡಬೇಕು ಎಂಬುದನ್ನು ಕಲಿಸುವುದೇ ಇಲ್ಲ. ಹೀಗಾಗಿ ಮೂಲದಲ್ಲೇ ಬೇರುಗಳನ್ನೇ ಗಟ್ಟಿಗೊಳಿಸಬೇಕು ಎಂದು ತಿಳಿಸಿದರು.

ವೇದ ಪಾಠಶಾಲೆಯ ಗುರುಗಳಾದ ಕಾರಕೋಡ್ಲು ಗುರುಮೂರ್ತಿ, ಶಾಮರಾವ್, ಶ್ರೀಧರ ಸತ್ಯ ಉಪಸ್ಥಿತರಿದ್ದರು. ರಾಜ್ಯದ ವಿವಿಧ ಭಾಗಗಳಿಂದ ಆಗಮಿಸಿದ್ದ ಪಾಠಶಾಲೆಯ ವೇದ ಕಲಿಕಾರ್ಥಿಗಳು ಭಾಗವಹಿಸಿದ್ದರು.

ಆಕಾಶ, ಗಾಳಿ, ವಾಯು, ಅಗ್ನಿ, ನೀರು, ಭೂಮಿ, ಭೂಮಿಯಿಂದ ವೃಕ್ಷ, ಆಹಾರ ಪದಾರ್ಥಗಳು ಹುಟ್ಟಿಕೊಂಡವು. ಈ ಆಹಾರವನ್ನು ಬಳಸಿಕೊಳ್ಳಲು ಮನುಷ್ಯನನ್ನು ದೇವರು ಸೃಷ್ಟಿಸಿದ ಎಂಬ ನಂಬಿಕೆ ನಮ್ಮದು. ಆದರೆ ಇಂದು ಮನುಷ್ಯ ಪ್ರಕೃತಿ ಇರುವುದೇ ತನ್ನ ಅವಶ್ಯಕತೆ ಪೂರೈಸಲು ಎಂಬಂತೆ ವರ್ತಿಸುತ್ತಿದ್ದಾನೆ. ವೇದಗಳು, ತಿಥಿ, ನಕ್ಷತ್ರಗಳ ಲೆಕ್ಕಾಚಾರ ನಡೆಯುವುದೂ ವಿಜ್ಞಾನದ ಆಧಾರದಲ್ಲೇ. ಗ್ರಹಣ ಕಾಲ, ಅಧಿಕಮಾಸ, ಶೂನ್ಯ ಮಾಸ ಎಲ್ಲವೂ ನಿರ್ಣಯ ಮಾಡುವುದಕ್ಕೆ ವೈಜ್ಞಾನಿಕ ತಳಹದಿಯಿದೆ ಎಂದು ಡಾ. ವಿದ್ಯಾಶಂಕರ ಹೇಳಿದರು.

ಅಧಿಕಮಾಸದಲ್ಲಿ ಒಳ್ಳೆಯ ಮನಸ್ಸಿನಿಂದ ಮಾಡುವ ಕಾರ್ಯಕ್ಕೆ ಹೆಚ್ಚು ಫಲ ಎಂಬುದು ನಮ್ಮ ಪೂರ್ವಜರ ನಂಬಿಕೆ. ಚಾಂದ್ರಮಾನ ಪದ್ಧತಿಯಲ್ಲಿ ಇರುವವರಿಗೆ ಅಧಿಕಮಾಸ ಅತ್ಯಂತ ಮಹತ್ವದ್ದು. ಊಟ ಸೇವಿಸುವುದಕ್ಕೂ ನಮ್ಮಲ್ಲಿ ಒಂದು ಸಂಸ್ಕಾರವಿದೆ. ಆದರೆ ಇಂದು ಚಪ್ಪಲಿ ಧರಿಸಿಕೊಂಡೇ ಊಟ ಮಾಡುವವರಿದ್ದಾರೆ. ಅನ್ನವನ್ನ ಬ್ರಹ್ಮನೆಂದು ಕಾಣುತ್ತಿದ್ದ ನಮ್ಮ ಪೂರ್ವಜರ ಚಿಂತನೆಯನ್ನು ನಾವು ಮಣ್ಣುಪಾಲು ಮಾಡುತ್ತಿದ್ದೇವೆ ಎಂದು ಡಾ. ವಿದ್ಯಾಶಂಕರ ಬೇಸರ ವ್ಯಕ್ತಪಡಿಸಿದರು.

ವಿವಿಧ ಕಾರ್ಯಕ್ರಮಗಳು

ಲೋಕಕಲ್ಯಾಣಾರ್ಥವಾಗಿ ಅರುಣ ಪಾರಾಯಣ, ವೇದ ಪಾರಾಯಣ, ಶ್ರೀಸೂಕ್ತ ಹೋಮ, ರುದ್ರಹೋಮ ಹಮ್ಮಿಕೊಳ್ಳಲಾಗಿತ್ತು. ರಾಜ್ಯದ ವಿವಿಧ ಭಾಗಗಳಿಂದ ಆಗಮಿಸಿದ್ದ ವೇದ ಪಾಠಶಾಲೆಯ ಕಲಿಕಾರ್ಥಿಗಳೊಂದಿಗೆ ಸ್ಥಳೀಯ ಭಕ್ತರು ಭಾಗವಹಿಸಿದ್ದರು.