7ರಿಂದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮ | cultural programs

ಸಾಗರ: ರಾಷ್ಟ್ರೀಯ ಸಂಸ್ಕೃತಿ ಸಪ್ತಾಹದ ಅಂಗವಾಗಿ ಡಿ.7ರಿಂದ 13ರವರೆಗೆ ಪ್ರತಿದಿನ ಸಂಜೆ 5.30ರಿಂದ ಸಾಗರದ ನೃತ್ಯಭಾಸ್ಕರ ಸಭಾಂಗಣದಲ್ಲಿ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ ಎಂದು ನಾಟ್ಯತರಂಗ ಸಂಸ್ಥೆಯ ವಿದ್ವಾನ್ ಜಿ.ಬಿ.ಜನಾರ್ದನ್ ತಿಳಿಸಿದರು.

ನಾಟ್ಯತರಂಗ ಸಂಸ್ಥೆ ನಡೆಸುತ್ತಿರುವ ಸಪ್ತಾಹಕ್ಕೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಕೈಜೋಡಿಸಿದೆ. 7ರಂದು ಸಂಜೆ 5.30ಕ್ಕೆ ಶಾಸಕ ಗೋಪಾಲಕೃಷ್ಣ ಬೇಳೂರು ಕಾರ್ಯಕ್ರಮ ಉದ್ಘಾಟಿಸುವರು. ವಿದ್ವಾನ್ ಜಿ.ಬಿ.ಜನಾರ್ದನ್, ಉಮೇಶ್, ಡಾ. ಕರುಣಾ ವಿಜಯೇಂದ್ರ, ಮೈತ್ರಿ ಪಾಟೀಲ್ ಉಪಸ್ಥಿತರಿರುವರು. ಗೌರಿ ಸಾಗರ್ ಮತ್ತು ಪೃಥ್ವಿ ಪಾರ್ಥಸಾರಥಿ ಅವರಿಂದ ಭರತನಾಟ್ಯ ನೃತ್ಯರೂಪಕ, ವಿದುಷಿ ಡಾ. ರಮ್ಯಾ ಸೂರಜ್ ಅವರಿಂದ ದುರ್ಗಾ ಸುಳಾದಿ ಪ್ರಸ್ತುತಿಯಲ್ಲಿ ಸ್ವಗಾಯನ ಮತ್ತು ನರ್ತನ ಕಾರ್ಯಕ್ರಮವಿದೆ ಎಂದು ಬುಧವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.

8ರಂದು ಸಭಾ ಕಾರ್ಯಕ್ರಮದ ನಂತರ ವಿಶ್ವನಾಥ್ ಶಿರೋಡ್ಕರ್ ಮತ್ತು ತಂಡದಿಂದ ಕಥಕ್ ನೃತ್ಯ, ಕಲಾಮಂಡಲ ಸುಚಿತ್ರಾ ಅನಿಲಕುಮಾರ್ ಅವರಿಂದ ಮೋಹಿನಿಯಾಟ್ಟಂ, 9ರಂದು ಸುರಜಿತ್ ಸೋಮ್ ಅವರ ಒಡಿಸ್ಸಿ ನೃತ್ಯ, ವಿದುಷಿ ಅರಭಿ ಐತುಮನೆ ಅವರಿಂದ ಭರತನಾಟ್ಯ, 10ರಂದು ವಿಜಯ ಸೇವಾ ಟ್ರಸ್ಟ್ ಮತ್ತು ಯಕ್ಷಶ್ರೀ ಸಂಯೋಜನೆಯಲ್ಲಿ ಶಶಿಪ್ರಭಾ ಪರಿಣಯ ಯಕ್ಷಗಾನ ಪ್ರದರ್ಶನ ಏರ್ಪಡಿಸಲಾಗಿದೆ ಎಂದು ಹೇಳಿದರು.

11ರಂದು ಚೆನ್ನೈನ ರಮ್ಯಾ ವೆಂಕಟರಾಮನ್ ಅವರಿಂದ ಭರತನಾಟ್ಯ, ನಾಟ್ಯ ತರಂಗ ಸಂಸ್ಥೆಯ ಹಿರಿಯ ವಿದ್ಯಾರ್ಥಿಗಳಿಂದ ತನ್ನೋದಂತಿ ಪ್ರಚೋದಯಾತ್ ನೃತ್ಯರೂಪಕವಿದೆ. 12ರಂದು ಭರತನಾಟ್ಯ ಮತ್ತು ಯಕ್ಷಗಾನ ಸಮ್ಮಿಲನದೊಂದಿಗೆ ಭಸ್ಮಾಸುರ ಮೋಹಿನಿ ನೃತ್ಯರೂಪಕವಿದೆ. ನಂತರ ವಿದುಷಿ ಭವ್ಯಾ ಮೇಲಾಡಿ ಅವರು ಭರತನೃತ್ಯ ಪ್ರದರ್ಶಿಸುವರು ಎಂದರು.

13ರಂದು ಸಮಾರೋಪ ಸಮಾರಂಭದಲ್ಲಿ ಮಾಜಿ ಸಚಿವ ಹರತಾಳು ಹಾಲಪ್ಪ, ಟಿ.ಡಿ.ಮೇಘರಾಜ್, ಶ್ಯಾಮಲಾ ರವಿ ಹೆಗಡೆ ಮತ್ತಿತರರು ಭಾಗವಹಿಸುವರು. ವಿದುಷಿ ರಾಜಲಕ್ಷ್ಮೀ ಕಾನುಗೋಡು ಅವರಿಂದ ಭರತನಾಟ್ಯ, ವಿದ್ವಾನ್ ಜಿ.ಬಿ.ಜನಾರ್ದನ್ ಸಾಹಿತ್ಯ, ಪರಿಕಲ್ಪನೆ ಮತ್ತು ನಿರ್ದೇಶನದಲ್ಲಿ ನಳ ದಮಯಂತಿ ನೃತ್ಯರೂಪಕ ಇರುತ್ತದೆ. ಅರ್ಜುನ್ ಭಾರದ್ವಾಜ್, ಡಾ. ಕರುಣಾ, ರಾಜಗೋಪಾಲ ಭಾಗವತ್, ಪೂರ್ಣಿಮಾ ಅವರಿಗೆ ಸಾಂಸ್ಕೃತಿಕ ಸಾರಥಿ ಪುರಸ್ಕಾರ ನೀಡಿ ಗೌರವಿಸಲಾಗುವುದು ಎಂದು ತಿಳಿಸಿದರು. ಐ.ವಿ.ಹೆಗಡೆ, ವರದಾ ಜನಾರ್ದನ್, ಕಾವ್ಯಾ ಸುದ್ದಿಗೋಷ್ಠಿಯಲ್ಲಿದ್ದರು.