ದುಸ್ಥಿತಿಯ ಹಾದಿಯಲ್ಲಿ ತೀರ್ಥಹಳ್ಳಿಯ ಜೆಸಿ ಆಸ್ಪತ್ರೆ I theerthahalli jc hospital

ಕೆಲವೇ ವರ್ಷಗಳ ಹಿಂದಿನವರೆಗೂ ಈ ಆಸ್ಪತ್ರೆ (hospital) ಯಶಸ್ಸಿನ ಉತ್ತುಂಗದಲ್ಲಿತ್ತು. ತಾಲೂಕು ಸರ್ಕಾರಿ (government) ಆಸ್ಪತ್ರೆಗಳ ಪೈಕಿ ಮಾದರಿ ಎನಿಸಿತ್ತು. ನೆರೆಯ ತಾಲೂಕುಗಳಿಂದಲೂ ಇಲ್ಲಿಗೆ ರೋಗಿಗಳು ಬರುತ್ತಿದ್ದರು. ಆದರೆ ಈಗ ಎಲ್ಲವೂ ಬದಲಾಗಿದೆ. ತುರ್ತು ಸಂದರ್ಭದಲ್ಲಿ ಸಮರ್ಪಕ ಚಿಕಿತ್ಸೆ (treatment) ಸಿಗದೆ ಇಲ್ಲಿಗೆ ಬರುವ ರೋಗಿಗಳು ಪ್ರಾಣ ಕಳೆದುಕೊಳ್ಳುವ ಸ್ಥಿತಿ ನಿರ್ಮಾಣವಾಗಿದೆ.

ಹೌದು. ಇದು ತೀರ್ಥಹಳ್ಳಿಯ ಜಯಚಾಮರಾಜೇಂದ್ರ ತಾಲೂಕು ಆಸ್ಪತ್ರೆಯ ದುಸ್ಥಿತಿ. ಇಲ್ಲಿ ಸಹಜ ಹೆರಿಗೆಗಳು ಸರಾಗವಾಗಿ ನಡೆಯುವ ಕಾಲವೊಂದಿತ್ತು. ವಿಶೇಷವೆಂದರೆ ಹೊಸನಗರ, ಕೊಪ್ಪ ತಾಲೂಕಿನ ಗಡಿ ಭಾಗಗಳಿಂದಲೂ ಇಲ್ಲಿಗೆ ಬಂದು ಸಹಜ ಹೆರಿಗೆ ಮಾಡಿಸಿಕೊಂಡು ಹೋಗುವವರ ಸಂಖ್ಯೆ ಬಹಳಷ್ಟಿತ್ತು.

ಈಗ ಸಹಜ ಹೆರಿಗೆ ಮಾತಿರಲಿ. ಸಿಸೇರಿಯನ್ ಮಾಡಿದರೂ ಇಲ್ಲಿ ಯಶಸ್ವಿಯಾಗುವ ಸಾಧ್ಯತೆಗಳಿಲ್ಲ. ಇನ್ನು ಬೇರೆ ಚಿಕಿತ್ಸೆಗಳ ಗುಣಮಟ್ಟವೂ ಹೇಳಿಕೊಳ್ಳುವಂತಿಲ್ಲ. ನಿಯೋಜಿತ ಹುದ್ದೆಗಳ ಪೈಕಿ ಶೇ.50ರಷ್ಟು ಹುದ್ದೆಗಳು ಖಾಲಿಯಿರುವ ಆಸ್ಪತ್ರೆಯಿಂದ ಗುಣಮಟ್ಟದ ಚಿಕಿತ್ಸೆಯನ್ನು ಜನರು ನಿರೀಕ್ಷಿಸುವುದೇ ತಪ್ಪು. ದೊಡ್ಡ ಪ್ರಮಾಣದ ಅಪಘಾತ ಸಂಭವಿಸಿ ಏಕಕಾಲಕ್ಕೆ 10-20 ಜನರು ಇಲ್ಲಿಗೆ ಚಿಕಿತ್ಸೆಗೆಂದು ಬಂದರೆ ಸಿಬ್ಬಂದಿ ಸ್ಥಿತಿ ಹೇಳತೀರದು.

ಮೂರು ವರ್ಷಗಳ ಹಿಂದೆ ರಾಜ್ಯದಲ್ಲಿ ಹೊಸ ಸರ್ಕಾರ ಅಧಿಕಾರ ವಹಿಸಿಕೊಂಡ ಕೆಲವೇ ದಿನಗಳಲ್ಲಿ ಇಲ್ಲಿನ ವೈದ್ಯರನ್ನು ಮನಸೋ ಇಚ್ಛೆ ವರ್ಗಾವಣೆ ಮಾಡಿತು. ಇಲ್ಲಿನ ವ್ಯವಸ್ಥೆಗೆ ಹೊಡೆತ ಬೀಳಲಿದೆ ಎಂಬ ಅರಿವಿಲ್ಲದೆ ಸಿಬ್ಬಂದಿಯನ್ನು ವರ್ಗಾಯಿಸಲಾಯಿತು. ಬದಲಿಗೆ ಬೇರೆಯವರನ್ನು ಇಲ್ಲಿಗೆ ಕಳಿಸಲೇ ಇಲ್ಲ. ಹೀಗಾಗಿ ಈಗ ತಾಲೂಕಿನ ಜನರು ಪರಿತಪಿಸುವಂತಾಗಿದೆ.

ತುರ್ತು ಚಿಕಿತ್ಸಾ ವೈದ್ಯಾಧಿಕಾರಿಗಳ ನಾಲ್ಕು ಹುದ್ದೆಗಳ ಪೈಕಿ ಒಬ್ಬರು ಕಾಯಂ ಆಗಿ, ಮತ್ತೊಬ್ಬರು ಗುತ್ತಿಗೆ ಆಧಾರದಲ್ಲಿ ಕೆಲಸ ಮಾಡುತ್ತಿದ್ದಾರೆ. ಮಕ್ಕಳ ತಜ್ಞ ವೈದ್ಯರ ಎರಡು ಹುದ್ದೆಗಳ ಪೈಕಿ ಒಬ್ಬರು ಕಾಯಂ ಮತ್ತೊಬ್ಬರು ಗುತ್ತಿಗೆ ವ್ಯವಸ್ಥೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. 19 ಶುಶ್ರೂಷಕರ ಅವಶ್ಯಕತೆಯಿದ್ದು ಮೂರು ಹುದ್ದೆಗಳು ಭರ್ತಿಯಾಗಬೇಕಿದೆ. ಹಿರಿಯ ಫಾರ್ಮಸಿಸ್ಟ್‌ನ ಒಂದು ಹುದ್ದೆ ಖಾಲಿ ಉಳಿದಿದೆ. ಕಚೇರಿ ಕೆಲಸ ನಿರ್ವಹಿಸುವ ಪ್ರಥಮ ದರ್ಜೆ ಸಹಾಯಕರ ಒಂದು ಹಾಗೂ ದ್ವಿತೀಯ ದರ್ಜೆ ಸಹಾಯಕರ ಎರಡು ಹುದ್ದೆಗಳು ಖಾಲಿ ಉಳಿದಿವೆ.

ಜೆಸಿ ಆಸ್ಪತ್ರೆಯಲ್ಲಿ ಕಾಯಂ ಅರಿವಳಿಕೆ ತಜ್ಞರೇ ಇಲ್ಲ. ಒಬ್ಬರು ನಿಯೋಜನೆ ಮೇರೆಗೆ ಕೆಲಸ ಮಾಡುತ್ತಿದ್ದಾರೆ. ಅರಿವಳಿಕೆ ತಜ್ಞರ ಸಮಯ ನೋಡಿಕೊಂಡು ಶಸ್ತ್ರಚಿಕಿತ್ಸಾ ತಜ್ಞರು ರೋಗಿಗೆ ಆಪರೇಷನ್ ಮಾಡಬೇಕು. ಅಲ್ಲಿಯವರೆಗೆ ರೋಗಿ ಜೀವವನ್ನು ಕೈನಲ್ಲಿ ಹಿಡಿದುಕೊಂಡಿರಬೇಕು. ಈ ಆಸ್ಪತ್ರೆಗೆ ಪ್ರತಿದಿನ ನೂರಾರು ರೋಗಿಗಳು ಬರುತ್ತಾರೆ. ಹತ್ತಾರು ಮಂದಿಗೆ ಶಸ್ತ್ರಚಿಕಿತ್ಸೆಯ ಅವಶ್ಯಕತೆ ಇರುತ್ತದೆ. ಬಹುತೇಕ ಸಂದರ್ಭದಲ್ಲಿ ಶಸ್ತ್ರಚಿಕಿತ್ಸೆ ಅವಶ್ಯವಿರುವವರನ್ನು ಮೆಗ್ಗಾನ್ ಆಸ್ಪತ್ರೆಗೆ ರವಾನಿಸಲಾಗುತ್ತದೆ. ರಾತ್ರಿ ವೇಳೆ ಯಾವುದಾದರೂ ತುರ್ತು ಶಸ್ತ್ರಚಿಕಿತ್ಸೆಗೆಂದು ರೋಗಿ ಬಂದರೆ ಜೀವ ಪಣಕ್ಕಿಟ್ಟಂತೆಯೆ.

ರೆಫರಲ್ ವ್ಯವಸ್ಥೆ ಸರಿಯಿಲ್ಲದೆ ಮೆಗ್ಗಾನ್ ಆಸ್ಪತ್ರೆ ಮೇಲೆ ಹೊರೆ ಹೆಚ್ಚುತ್ತಿದೆ ಎಂದು ದೂರಲಾಗುತ್ತಿದೆ. ಆದರೆ ಸಮರ್ಪಕ ಸೇವೆ ನೀಡುತ್ತಿರುವ ತಾಲೂಕು ಆಸ್ಪತ್ರೆಗಳ ಸಿಬ್ಬಂದಿಯನ್ನು ಬೇಕಾಬಿಟ್ಟಿ ವರ್ಗಾವಣೆ ಮಾಡಿ ಅಲ್ಲಿನ ವ್ಯವಸ್ಥೆಯನ್ನು ಹದಗೆಡಿಸಿ ಮೆಗ್ಗಾನ್ ಮೇಲೆ ಹೊರೆಯಾಗುತ್ತಿದೆ ಎಂಬುದರಲ್ಲಿ ಅರ್ಥವಿಲ್ಲ. ಜೆಸಿ ಆಸ್ಪತ್ರೆಯಲ್ಲಿನ ಅವ್ಯವಸ್ಥೆ ಸರಿಪಡಿಸಿದರೆ ನೆರೆಯ ತಾಲೂಕಿನ ರೋಗಿಗಳಿಗೂ ಅನುಕೂಲವಾಗುತ್ತದೆ.

ತೀರ್ಥಹಳ್ಳಿ ಜಯಚಾಮರಾಜೇಂದ್ರ ತಾಲೂಕು ಆಸ್ಪತ್ರೆಯಲ್ಲಿನ ಸಿಬ್ಬಂದಿ ಕೊರತೆ ಹಾಗೂ ಅವ್ಯವಸ್ಥೆಗೆ ಹೊಸನಗರ ತಾಲೂಕು ಕೋಡೂರು ಸಮೀಪದ ಶಾಖವಳ್ಳಿ ಸುಮಾ ಸಾವು ಪ್ರಕರಣ ಕೈಗನ್ನಡಿಯಾಗಿದೆ. ಜೆಸಿ ಆಸ್ಪತ್ರೆಯಲ್ಲಿ ಪ್ರಸವದ ಬಳಿಕ ರಕ್ತಸ್ರಾವ ನಿಯಂತ್ರಣಕ್ಕೆ ಬರುತ್ತಿಲ್ಲ ಎಂಬ ಕಾರಣಕ್ಕೆ ಆಕೆಯನ್ನು ಮೆಗ್ಗಾನ್ ಆಸ್ಪತ್ರೆಗೆ ಕಳಿಸಲಾಯಿತು. ಇಲ್ಲಿ ಪರೀಕ್ಷೆ ನಡೆಸಿದ ವೈದ್ಯರು ಆಕೆಯನ್ನು ಮಣಿಪಾಲದ ಆಸ್ಪತ್ರೆಗೆ ಕಳಿಸಿಕೊಟ್ಟರು. ಅದರ ಬದಲು ಆಕೆಯನ್ನು ತೀರ್ಥಹಳ್ಳಿಯಿಂದ ನೇರವಾಗಿ ಮಣಿಪಾಲಕ್ಕೆ ಕಳಿಸಿದ್ದರೂ ಕನಿಷ್ಠ ನಾಲ್ಕು ತಾಸು ಸಮಯ ಉಳಿಯುತ್ತಿತ್ತು. ಆಕೆ ಚಿಕಿತ್ಸೆಗೆ ಸ್ಪಂದಿಸುವ ಎಲ್ಲ ಅವಕಾಶಗಳಿದ್ದವು. ಚಿಕಿತ್ಸೆ ನೀಡಿದ್ದರಿಂದ ಆರಂಭವಾಗಿ ಆಕೆಯನ್ನು ಬೇರೆ ಆಸ್ಪತ್ರೆಗೆ ಕಳಿಸುವವರೆಗೂ ಇಲ್ಲಿ ಕರ್ತವ್ಯಲೋಪ ಎದ್ದು ಕಾಣುತ್ತಿದೆ. ಸಿಬ್ಬಂದಿ ಕೊರತೆಯ ಚರ್ಚೆ ಈಗ ಮುನ್ನೆಲೆಗೆ ಬಂದಿದೆ.

"

ಸುಮಾ ಸಾವಿನ ಪ್ರಕರಣ ಎಲ್ಲರೂ ತಲೆತಗ್ಗಿಸುವಂತಹದ್ದು. ಜೆಸಿ ಆಸ್ಪತ್ರೆಯಲ್ಲಿ ಕಾಯಂ ಅರಿವಳಿಕೆ ತಜ್ಞರಿಲ್ಲ ಎಂಬುದೇ ದುರಂತ. ಆಸ್ಪತ್ರೆಯಲ್ಲಿ ಖಾಲಿ ಇರುವ ಹುದ್ದೆಗಳ ಭರ್ತಿಗಾಗಿ ಈ ಹಿಂದೆ ಅನೇಕ ಬಾರಿ ಸರ್ಕಾರಕ್ಕೆ ಮನವಿ ಮಾಡಿದ್ದರೂ ಪ್ರಯೋಜನವಾಗಿಲ್ಲ. ವಿಪರ್ಯಾಸವೆಂದರೆ ತೀರ್ಥಹಳ್ಳಿ ಆಸ್ಪತ್ರೆಯಿಂದ ಶಿವಮೊಗ್ಗ ಮೆಗ್ಗಾನ್ ಆಸ್ಪತ್ರೆಗೆ ರೋಗಿಗಳನ್ನು ಕಳಿಸಿಕೊಟ್ಟರೆ ಅಲ್ಲಿಯೂ ಗುಣಮಟ್ಟದ ಚಿಕಿತ್ಸೆ ಸಿಗುತ್ತಿಲ್ಲ.

— ಆರಗ ಜ್ಞಾನೇಂದ್ರ, ಶಾಸಕ.