ಪೂರಕವಾಗಬೇಕಿದ್ದ ಯೋಜನೆಯೇ ಮಾರಕ

ಭದ್ರಾವತಿ: ರಸ್ತೆಗಳಿಗೆ ಅಲಂಕಾರಿಕ ಬೀದಿದೀಪ ಅಳವಡಿಸುವ ಕಾಮಗಾರಿ ಬಗ್ಗೆಯೇ ಜನತೆಯಿಂದ ವಿರೋಧ ವ್ಯಕ್ತವಾಗುತ್ತಿದೆ. ಈ ಕಾಮಗಾರಿಗೆ ಒಪ್ಪಿಗೆ ಸೂಚಿಸಿದ ಇಂಜಿನಿಯರ್​ ನಡೆ ಬಗ್ಗೆ ಅನುಮಾನ ವ್ಯಕ್ತವಾಗುತ್ತಿದೆ. ಈ ನಡುವೆಯೇ ಕಾರು ಅಪಘಾತಕ್ಕೆ ಈಡಾಗಿರುವುದರಿಂದ ಕಾಮಗಾರಿ ಅವೈಜ್ಞಾನಿಕ ಎಂದು ಜನತೆ ವಿರೋಧಿಸುತ್ತಿದ್ದಾರೆ.

ಭದ್ರಾವತಿಯನ್ನು ಸುಂದರ ನಗರವನ್ನಾಗಿಸುವ ಪಣತೊಟ್ಟಿರುವ ಸ್ಥಳಿಯ ನಗರಸಭೆ ಆಡಳಿತ ಹಾಗೂ ಅಧಿಕಾರಿಗಳು ಹಲವೆಡೆ ರಸ್ತೆ ಅಭಿವೃದ್ಧಿಗೊಳಿಸಿದ್ದಾರೆ. ಬಿ.ಎಚ್​.ರಸ್ತೆಯ ಎರಡೂ ಬದಿಯಲ್ಲಿ ುಟ್​ಪಾಥ್​ ಮಾಡಿದ್ದಾರೆ. ಅದಕ್ಕೆ ಹೊಂದಿಕೊಂಡಂತೆ ಪಾದಚಾರಿಗಳಿಗೆ ಅನುಕೂಲವಾಗುವಂತೆ ಗ್ರೀಲ್​ಗಳನ್ನೂ ಅಳವಡಿಸಿದ್ದಾರೆ. ಕೆಲವೆಡೆ ಸೈಕಲ್​ಪಾಥ್​ ಸಹ ಮಾಡಿದ್ದಾರೆ.

ಇದೀಗ 90 ಲಕ್ಷ ರೂ. ವೆಚ್ಚದಲ್ಲಿ ನಗರದ ಕೆಎಸ್​ಆರ್​ಟಿಸಿ ಮುಖ್ಯ ಬಸ್​ನಿಲ್ದಾಣದಿಂದ ಶಿವಮೊಗ್ಗ ಕಡೆಗೆ ಹಾದುಹೋಗುವ ಅರಣ್ಯ ಇಲಾಖೆ ಅಧಿಕಾರಿಗಳ ಕಚೇರಿವರೆಗೆ ರಸ್ತೆಯ ಮಧ್ಯಭಾಗದಲ್ಲಿ ಡಿವೈಡರ್​ಗಳ ನಡುವೆ ಬೀದಿದೀಪಗಳನ್ನು ಅಳವಡಿಸಲು ಮುಂದಾಗಿದೆ. ಅದಕ್ಕಾಗಿ ಈಗಾಗಲೇ ಡಿವೈಡರ್​ಗಳ ಮಧ್ಯಭಾಗದಲ್ಲಿ ವಿದ್ಯುತ್​ ಪೋಲ್​ಗಳನ್ನು ನಿಲ್ಲಿಸಲು ಅಲ್ಲಲ್ಲಿ ಕಾಂಕ್ರೀಟ್​ ಪಿಲ್ಲರ್​ಗಳನ್ನು ಹಾಕಲಾಗಿದೆ. ಈ ಪಿಲ್ಲರ್​ಗಳು ರಸ್ತೆ ಡಿವೈಡರ್​ ಗೋಡೆಗೆ ಸಮನಾಗಿರಬೇಕಾಗಿತ್ತು. ಆದರೆ ಪಿಲ್ಲರ್​ಗಳು ಎರಡೆರಡು ಅಡಿಗಳಷ್ಟು ರಸ್ತೆಗೆ ಚಾಚಿಕೊಂಡಿವೆ. ಇದರಿಂದ ಡಿವೈಡರ್​ ಬದಿಯಲ್ಲಿ ಸಂಚರಿಸುವ ವಾಹನಗಳು ಕಾಂಕ್ರೀಟ್​ ಪಿಲ್ಲರ್​ಗಳಿಗೆ ಡಿಕ್ಕಿ ಹೊಡೆಯುವ ಮೂಲಕ ಅಪಘಾತಕ್ಕೀಡಾಗುತ್ತಿವೆ. ಇದರಿಂದ ಸಾವು&ನೋವು ಸಂಭವಿಸುವ ಸಾಧ್ಯತೆಗಳಿವೆ. ಕಾಮಗಾರಿ ಅವೈಜ್ಞಾನಿಕವಾಗಿದೆ ಎಂದು ಹೋರಾಟಗಾರರು, ಜನರು ನಗರಸಭೆ ಅಧಿಕಾರಿಗಳ ಗಮನಕ್ಕೆ ತಂದರೂ ಪ್ರಯೋಜನವಾಗಿಲ್ಲ.

ಏ.24ರಂದು ಕಾರೊಂದು ಸಂಜೆ ವೇಳೆ ಜೋರಾಗಿ ಬರುವಾಗ ಇದೇ ಡಿವೈಡರ್​ನ ಕಾಂಕ್ರೀಟ್​ ಪಿಲ್ಲರ್​ಗಳಿಗೆ ತಾಗಿದ್ದರಿಂದ ಅಪಘಾತ ಸಂಭವಿಸಿ ಕಾರಿನ ಮುಂಭಾಗ ಜಖಂಗೊಂಡಿತ್ತು. ಅಪಘಾತ ತಡೆಯುವ ನಿಟ್ಟಿನಲ್ಲಿ ಹೆಚ್ಚುವರಿಯಾಗಿ ರಸ್ತೆಗೆ ಚಾಚಿಕೊಂಡಿರುವ ಕಾಂಕ್ರಿಟ್​ ಪಿಲ್ಲರ್​ಗಳ ಸಮನಾಂತರವಾಗಿ ರೆಡಿಯಂ ಟೇಪ್​ ಅಥವಾ ಬ್ಯಾರಿಕೇಡ್​ ನಿಲ್ಲಿಸುವುದು ಸೂಕ್ತ ಎಂಬುದು ಜನರ ಒತ್ತಾಯ.

ಅಧಿಕಾರಿಗಳ ಸ್ಪಷ್ಟನೆ ಏನು?

ಡಿವೈಡರ್​ಗಳಿಗೆ ಹೊಂದಿಕೊಂಡಿರುವ ಕಾಂಕ್ರೀಟ್​ ಪಿಲ್ಲರ್​ಗಳು ಅವೈಜ್ಞಾನಿಕವಾಗಿ ಇರುವುದು ಕಾಣುತ್ತಿದ್ದರೂ ಅದನ್ನು ಒಪ್ಪಿಕೊಳ್ಳದ ನಗರಸಭೆ ಅಧಿಕಾರಿಗಳು ಸ್ಪಷ್ಟನೆ ನೀಡುತ್ತಿರುವುದೇ ಆಶ್ಚರ್ಯ ತರಿಸಿದೆ. ಅಲಂಕಾರಿಕ ಬೀದಿ ದೀಪ ಅಳವಡಿಕೆ ಕಾಮಗಾರಿ ಆರಂಭವಾಗಿದೆಯಷ್ಟೇ. ಕಾಮಗಾರಿ ಪ್ರಗತಿಯಲ್ಲಿ ಇರುವಾಗ ವಾಹನ ಚಾಲಕರು ಸ್ವಲ್ಪ ಎಚ್ಚರಿಕೆಯಿಂದ ಇರಬೇಕು. ರಸ್ತೆ ಮಧ್ಯಭಾಗದ ಡಿವೈಡರ್​ ಗೋಡೆಯಿಂದ ಕಾಂಕ್ರೀಟ್​ ಪಿಲ್ಲರ್​ಗಳು 6 ಇಂಚಿನಷ್ಟು ಹೊರ ಬಂದಿವೆ. ಆ 6 ಇಂಚಿನ ಅಗಲಕ್ಕೆ ನೇರವಾಗಿ ಒಂದು ಪಿಲ್ಲರ್​ನಿಂದ ಇನ್ನೊಂದು ಪಿಲ್ಲರ್​ಗೆ ರಸ್ತೆ ಡಿವೈಡರ್​ನ (ಎಡ ಹಾಗೂ ಬಲ) ಎರಡೂ ಭಾಗದಲ್ಲಿ ಗೋಡೆ ನಿರ್ಮಿಸಲಾಗುವುದು. ಬಾಕ್ಸ್​ ಮಾದರಿ ಮಾಡಿ ಅದರೊಳಗೆ ಅಲಂಕಾರಿಕ ಹೂವಿನ ಗಿಡಗಳನ್ನು ನೆಟ್ಟು ಕಾಮಗಾರಿ ಮುಗಿಸುತ್ತೇವೆ. ಇದು ಜನರಿಗೆ ತಿಳಿಯದ ಕಾರಣ ಕಾಮಗಾರಿ ಅವೈಜ್ಞಾನಿಕ ಎನ್ನುತ್ತಾರೆ. 6 ಅಡಿಯಷ್ಟು ಮಾತ್ರ ರಸ್ತೆ ಅಗಲ ಕಡಿಮೆಯಾಗುತ್ತದೆ ಎನ್ನುತ್ತಾರೆ ನಗರಸಭೆ ಅಧಿಕಾರಿಗಳು.

ರಸ್ತೆ ಡಿವೈಡರ್​ಗಳಿಗೆ ಹೊಂದಿಕೊಂಡಂತೆ ಹಾಕಲಾಗಿರುವ ಕಾಂಕ್ರೀಟ್​ ಪಿಲ್ಲರ್​ಗಳು ಡಿವೈಡರ್​ನಿಂದ ಹೊರಚಾಚಿರುವುದು ನಿಜ. ಕಾಮಗಾರಿ ಇನ್ನೂ ಪ್ರಗತಿಯಲ್ಲಿದೆ. ಡಿವೈಡರ್​ಗಳ ಎರಡೂ ಕಡೆ 6 ಇಂಚಿನಷ್ಟು ವಾಲ್​ ನಿರ್ಮಿಸಲಾಗುವುದು. ಎರಡೂ ಬದಿಯಲ್ಲಿ 6 ಇಂಚಿನಷ್ಟು ಮಾತ್ರ ರಸ್ತೆ ಕಿರಿದಾಗುತ್ತದೆ. ಏಕಮುಖ ಸಂಚಾರ ಇರುವುದರಿಂದ ಯಾವುದೇ ಸಮಸ್ಯೆ ಆಗದು.

> ಶಿವಪ್ರಕಾಶ್​, ನಗರಸಭೆ ಅಭಿಯಂತ

ರಸ್ತೆ ಡಿವೈಡರ್​ ಮಧ್ಯ ಭಾಗಗಳಲ್ಲಿ ಹಾಕಲಾಗಿರುವ ಕಾಂಕ್ರೀಟ್​ ಪಿಲ್ಲರ್​ಗಳು ಡಿವೈಡರ್​ಗೆ ಸಮನಾಗಿರದೆ ರಸ್ತೆಗೆ ಹೊರಚಾಚಿವೆ. ಹೊರಚಾಚಿರುವ ಸಿಮೆಂಟ್​ ಪಿಲ್ಲರ್​ಗಳು ಚಾಲಕರಿಗೆ ಕೆಲವೊಮ್ಮೆ ಕಾಣುವುದಿಲ್ಲ. ಆಗ ಅಪಘಾತವಾಗುತ್ತದೆ. ಕಾಮಗಾರಿ ಮುಗಿಯುವವರೆಗೂ ಎರಡೂ ಬದಿಯಲ್ಲಿ ಬ್ಯಾರಿಕೇಡ್​ ನಿಲ್ಲಿಸಲಿ.

> ದಯಾನಂದ್​, ವಾಹನ ಚಾಲಕ

ಕಾರು ಅಪಘಾತವಾಗುವ ಮುಂಚೆ ಕಾಮಗಾರಿ ನಡೆಯುವಾಗಲೇ ನಗರಸಭೆ ಆಯುಕ್ತರು ಹಾಗೂ ಇಂಜಿನಿಯರ್​ ಗಮನಕ್ಕೆ ತಂದು ಅವೈಜ್ಞಾನಿಕ ಕಾಮಗಾರಿ ಸರಿಪಡಿಸುವಂತೆ ಮನವಿ ಮಾಡಲಾಗಿತ್ತು. ಆದರೆ ಇದುವರೆಗೂ ಯಾವುದೇ ಕ್ರಮ ಕೈಗೊಂಡಿಲ್ಲ.

> ತೀರ್ಥೇಶ್​, ಸಾಮಾಜಿಕ ಹೋರಾಟಗಾರ