ಬಡವರಿಗೆ ಸಂಗಪ್ಪನಿಂದಲ್ಲ, ನುಂಗಪ್ಪನಿಂದ ಸಮಸ್ಯೆ । VB Ji-Ram Ji

ಶಿವಮೊಗ್ಗ: ಕೇಂದ್ರ ಸರ್ಕಾರದ ನೂತನ ವಿಬಿ ಜಿ-ರಾಮ್ ಜಿ(VB Ji-Ram Ji) ಯೋಜನೆ ಕುರಿತು ಕಾಂಗ್ರೆಸ್ ಜಾಹೀರಾತಿನ(Advertisement) ಮೂಲಕ ನಡೆಸುತ್ತಿರುವ ಪ್ರಚಾರಕ್ಕೆ ಸಂಸದ ಕೋಟ ಶ್ರೀನಿವಾಸ್ ಪೂಜಾರಿ ಶನಿವಾರ ಶಿವಮೊಗ್ಗದಲ್ಲಿ ತಿರುಗೇಟು ನೀಡಿದರು.

ಕಾಂಗ್ರೆಸ್‌ನವರು ಜಾಹೀರಾತಿನಲ್ಲಿ ಸಂಗಪ್ಪ(Sangappa)ಣ್ಣನ ಬಗ್ಗೆ ಚರ್ಚೆ ಮಾಡುತ್ತಿದ್ದಾರೆ. ಆದರೆ ದೇಶಕ್ಕೆ ಮತ್ತು ಬಡವರಿಗೆ ಸಂಗಪ್ಪನಿಂದ ಸಮಸ್ಯೆಯಾಗಿಲ್ಲ. ಯೋಜನೆಯ ಹಣ ನುಂಗುವ ನುಂಗಪ್ಪಣ್ಣ ನಿಂದ ತೊಂದರೆಯಾಗಿದೆ ಎಂದು ಲೇವಡಿ ಮಾಡಿದರು.

ಉದ್ಯೋಗ ಖಾತ್ರಿ(Job security)ಯಲ್ಲಿ ಸುಮಾರು 22 ಸಾವಿರ ಕೋಟಿ ರೂ. ನಷ್ಟು ಭ್ರಷ್ಟಾಚಾರ ನಡೆದಿದೆ. ಯಂತ್ರಗಳ ಮೂಲಕ ಕೆಲಸ ಮಾಡಿಸಿ, ಬಡವರ ಹಣವನ್ನು ಮಧ್ಯವರ್ತಿಗಳೇ ನುಂಗುತ್ತಿದ್ದರು. ಈ ನುಂಗಣ್ಣಗಳ ಹಾವಳಿ ತಡೆದು ಪಾರದರ್ಶಕತೆ(Transparency) ತರಲೆಂದೇ ಕೇಂದ್ರ ಸರ್ಕಾರ ವಿಬಿಜಿ ರಾಮ್ ಜಿ ಜಾರಿಗೆ ತಂದಿದೆ. ಇದು ಬಡವರಿಗಲ್ಲ, ಭ್ರಷ್ಟರಿಗೆ ಮಾತ್ರ ನೀಡುತ್ತಿರುವ ಬಿಸಿ ಎಂದು ಗುಡುಗಿದರು.

ನಾನು ಸಚಿವನಾಗಿದ್ದಾಗ ಜಾರಿಗೆ ತಂದಿದ್ದ ಸಪ್ತಪದಿ ಯೋಜನೆ(Saptapadi plan)ಯನ್ನು ಕಾಂಗ್ರೆಸ್ ಸರ್ಕಾರ ಮಾಂಗಲ್ಯ ಭಾಗ್ಯವೆಂದು ಬದಲಿಸಿತ್ತು. ಆಗ ನಾವು ಆಕ್ಷೇಪ ಮಾಡಿರಲಿಲ್ಲ. ಪಶ್ಚಿಮ ಬಂಗಾಳದಲ್ಲಿ ಮಮತಾ ಬ್ಯಾನರ್ಜಿ ಅವರು ಯೋಜನೆಗೆ ಕರ್ಮಶ್ರೀ ಎಂದು ಹೆಸರಿಟ್ಟಾಗ ಇವರು ಯಾಕೆ ಪ್ರಶ್ನಿಸಲಿಲ್ಲ? ಈಗ ನರೇಂದ್ರ ಮೋದಿ ಸರ್ಕಾರವನ್ನು ದೂರಲು ಸುಳ್ಳು ಅಪಪ್ರಚಾರ ಮಾಡುತ್ತಿದ್ದಾರೆ ಎಂದು ಕಿಡಿಕಾರಿದರು.