ನೊಳಂಬ ಸಮಾಜವು ಸೂತ್ರವಿಲ್ಲದ ಗಾಳಿಪಟ । Siddaramaiah Jayanti

ಶಿವಮೊಗ್ಗ: ನೊಳಂಬ ಸಮಾಜವು ಸೂತ್ರವಿಲ್ಲದ ಗಾಳಿಪಟ, ಗುರುವಿಲ್ಲದ ವಿದ್ಯೆ, ಗುರಿಯಿಲ್ಲದ ಪ್ರಯಾಣ, ಕಡಿವಾಣವಿಲ್ಲದ ಕುದುರೆ ಹಾಗೂ ನಾಯಕನಿಲ್ಲದ ಸೇನೆಯಂತಾಗಿದ್ದು, ಅದನ್ನೆಲ್ಲ ಮೀರಿ ಸಮಾಜದಲ್ಲಿ ನಮ್ಮ ಅಸ್ತಿತ್ವವನ್ನು ಗಟ್ಟಿಯಾಗಿ ತೋರಿಸಿಕೊಳ್ಳಬೇಕಾಗಿದೆ ಎಂದು ನಂದಿಗುಡಿ(Nandigudi)ಯ ವೃಷಭಪುರಿ ಸಂಸ್ಥಾನ ಬೃಹನ್ಮಠದ ಶ್ರೀ ಸಿದ್ದರಾಮೇಶ್ವರ ಸ್ವಾಮೀಜಿ ಹೇಳಿದರು.

ನಗರದ ಗುರುಸಿದ್ದರಾಮೇಶ್ವರ ದೇವಸ್ಥಾನದಲ್ಲಿ ಬುಧವಾರ ಶ್ರೀಗುರು ಸಿದ್ದರಾಮೇಶ್ವರ(Siddaramaiah)ರ 853ನೇ ಜಯಂತ್ಯೋತ್ಸವದ ಸಾನಿಧ್ಯ ವಹಿಸಿ ಆಶೀರ್ವದಿಸಿದ ಅವರು, ಒಂದು ಕಾಲದಲ್ಲಿ ಕರ್ನಾಟಕದಲ್ಲಿ 8ರಿಂದ 9 ಶಾಸಕರು ನೊಳಂಬ(Nolamba)ಸಮುದಾಯವನ್ನು ಪ್ರತಿನಿಧಿಸುತ್ತಿದ್ದರು. ಆದರೆ ಇಂದು ಕೇವಲ ಒಬ್ಬ ಶಾಸಕರಷ್ಟೇ ಇದ್ದಾರೆ. ಇದಕ್ಕೆ ಬೇರೆ ಯಾರೂ ಹೊಣೆಗಾರರಲ್ಲ. ನಮ್ಮ ಸಮುದಾಯದವರೇ ಹೊಣೆ ಎಂದು ಆತ್ಮವಿಮರ್ಶೆ ಮಾಡಿಕೊಳ್ಳಬೇಕಿದೆ ಎಂದರು.

ಜಯಂತಿ(Jayanti) ಮಹೋತ್ಸವಗಳು ಕೇವಲ ಆಚರಣೆಗೆ ಸೀಮಿತವಾಗದೇ, ಸಮುದಾಯದ ಸರ್ವತೋಮುಖ ಏಳಿಗೆಗಾಗಿ ಶ್ರಮಿಸುವ ಶರಣ ಜಯಂತಿಗಳಾಗಬೇಕು. ಸಮಾಜದ ಕೊನೆಯ ವ್ಯಕ್ತಿಗೂ ಸಿದ್ದರಾಮೇಶ್ವರರ ಸಾಮಾಜಿಕ ಸೇವೆಗಳ ಅರಿವು ಮೂಡಿಸಿ, ಒಗ್ಗಟ್ಟಿನೊಂದಿಗೆ ನೊಳಂಬ ಸಮುದಾಯವು ರಾಜಕೀಯ(Politics) ಹಾಗೂ ಇತರೆ ಎಲ್ಲಾ ಕ್ಷೇತ್ರಗಳಲ್ಲಿ ಗೌರವಯುತ ಸ್ಥಾನ ಪಡೆಯಬೇಕೆಂದು ಸಲಹೆ ನೀಡಿದರು.

ಕಾರ್ಯಕ್ರಮವನ್ನು ಹೊನ್ನಾಳಿ(Honnali) ಮಾಜಿ ಶಾಸಕ ಡಾ. ಡಿ.ಬಿ.ಗಂಗಪ್ಪ ಉದ್ಘಾಟಿಸಿದರು. ನಂದಿ ವಿದ್ಯಾ ಸಂಸ್ಥೆಯ ಡಿ.ಬಿ.ಶಂಕರಪ್ಪ  ಅಧ್ಯಕ್ಷತೆ ವಹಿಸಿದ್ದರು. ಇದೇ ವೇಳೆ ನಂದಿ ವಧು-ವರರ ಅನ್ವೆಷಣಾ ಕೇಂದ್ರ ಉದ್ಘಾಟನೆಗೊಂಡಿತು. ನಿವೃತ್ತ ಜಿಲ್ಲಾ ಸರ್ಜನ್ ಡಾ.ಸಿದ್ದನಗೌಡ ಪಾಟೀಲ್, ಡಾ. ಧನಂಜಯ ಅವರನ್ನು ಸನ್ಮಾನಿಸಲಾಯಿತು.