ಪಕ್ಷಿಗಳು ಹಾರಾಡುವಾಗ ಮೊದಲು ತಮಗೆ ಯಾರಿಂದಾದರೂ ಅಪಾಯವಿದೆಯೇ ಎಂದು ಪರಿಶೀಲಿಸುತ್ತವೆ. ಅವುಗಳ ಸ್ವಚ್ಚಂದ ಹಾರಾಟಕ್ಕೆ ಅಪಾಯವಿಲ್ಲ ಎಂದು ಖಾತ್ರಿಯಾದರೆ ಅಂತಹ ಪ್ರದೇಶಗಳು ಪಕ್ಷಿಗಳ ಮಾಯಾಲೋಕವಾಗಿ ಬಿಡುತ್ತವೆ. ಪಂಡಿತ್ ಅವರ ಮನೆಯಂಗಳ ಪಕ್ಷಿಲೋಕವನ್ನು ಪರಿಚಯಿಸುತ್ತದೆ. ಗುಬ್ಬಚ್ಚಿಯಿಂದ ಹಿಡಿದು ಮೈನಾ, ಬುಲ್-ಬುಲ್, ತರಹೇವಾರಿ ಗಿಳಿ, ಮಂಗಟ್ಟೆ, ಬಾರ್ಬೆನ್, ಕೋಗಿಲೆ ಹೀಗೆ ಹಲವು ಬಗೆಯ ಹಕ್ಕಿಗಳು ಮೇಳೈಸಿ ಸ್ವಲ್ವ ನೀರು ಕುಡಿದು ಅದರಲ್ಲಿಯೇ ಆಟವಾಡಿ ಸ್ನಾನ ಮಾಡುತ್ತವೆ. ಪಕ್ಷಿಗಳ ಗಾತ್ರಕ್ಕೆ ತಕ್ಕಂತೆ ಆಹಾರದ ಪಾತ್ರೆಗಳು ಇಲ್ಲಿವೆ. ಪ್ರತಿದಿನ ಇವರು ಹೂಜಿಯ ನೀರನ್ನು ಬದಲಿಸುತ್ತಾರೆ. ಕಾಳು, ಧಾನ್ಯಗಳು ಖಾಲಿಯಾದರೆ ಅದನ್ನು ತುಂಬಿಸುತ್ತಾರೆ.
