ಸರ್ಕಾರದಿಂದ ಪೆನ್ಷನ್‌ದಾರರಿಗೆ ಟೆನ್ಷನ್! I pension tension

ಗ್ಯಾರಂಟಿ ಭಾರ ಹೊತ್ತಿರುವ ಸರ್ಕಾರಕ್ಕೆ (govermnet) ಸಾಮಾಜಿಕ ಭದ್ರತಾ ಯೋಜನೆಗಳೂ ಈಗ ಹೊರೆಯಾಗಿ ಪರಿಣಮಿಸಿವೆ. ಇದೀಗ ಶಿವಮೊಗ್ಗ ಜಿಲ್ಲೆಯಲ್ಲಿ ಪಿಂಚಣಿ (pension) ಪಡೆಯುತ್ತಿದ್ದವರ ಪೈಕಿ 47,229 ಮಂದಿಗೆ ಸೌಲಭ್ಯ ಸ್ಥಗಿತಗೊಳಿಸಲಾಗಿದೆ. ಸೂಕ್ತ ದಾಖಲೆ (records) ಒದಗಿಸುವಂತೆ ನೋಟಿಸ್ ಜಾರಿ ಮಾಡಲಾಗಿದೆ.

ರಾಜ್ಯದಲ್ಲಿ ವಿವಿಧ ಸಾಮಾಜಿಕ ಭದ್ರತಾ ಯೋಜನೆಗಳ ಲಾಭ ಪಡೆಯುತ್ತಿರುವವರ ಸಂಖ್ಯೆ 83 ಲಕ್ಷ. ಈ ಪೈಕಿ 17 ಲಕ್ಷ ಮಂದಿಗೆ ನೋಟಿಸ್ ಜಾರಿಯಾಗಿದ್ದರೆ, ಜಿಲ್ಲೆಯ ಎರಡು ಲಕ್ಷಕ್ಕೂ ಅಧಿಕ ಪಿಂಚಣಿದಾರರ ಪೈಕಿ 47,229 ಮಂದಿಗೆ ಈಗ ಸೌಲಭ್ಯ ಸ್ಥಗಿತವಾಗಿದೆ.

ಅನರ್ಹರು ಕೂಡ ಯೋಜನೆಗಳ ಪ್ರಯೋಜನ ಪಡೆಯುತ್ತಿದ್ದಾರೆ ಎಂಬ ಅನುಮಾನದ ಮೇರೆಗೆ ಸರ್ಕಾರ ರಾಜ್ಯ ಮಟ್ಟದಲ್ಲಿ ಹುಡುಕಾಟ ಆರಂಭಿಸಿತ್ತು. ಈ ವೇಳೆ ಅನೇಕ ಆಘಾತಕಾರಿ ಅಂಶಗಳು ಪತ್ತೆಯಾಗಿದ್ದವು. ಹೀಗಾಗಿ ಆರಂಭಿಕ ಹಂತದಲ್ಲಿ ಎಲ್ಲರ ಪಿಂಚಣಿ ನಿಲ್ಲಿಸಿ, ದಾಖಲೆಗಳ ಪರಿಶೀಲನೆ ನಡೆಸಿದ ಬಳಿಕ ಅರ್ಹರು ಎಂಬುದು ದೃಢಪಟ್ಟರೆ ಮಾತ್ರ ಅವರಿಗೆ ಪಿಂಚಣಿ ಮುಂದುವರಿಸಲು ಸರ್ಕಾರ ತೀರ್ಮಾನಿಸಿದೆ.

ಮೃತಪಟ್ಟವರ ಖಾತೆಗೆ ಪಿಂಚಣಿ ಜಮೆ ಮಾಡಿಲ್ಲ ಎಂದು ದೃಢಪಡಿಸಿರುವ ಅಧಿಕಾರಿಗಳು, ಜಿಲ್ಲೆಯಲ್ಲಿ ಈಗ 47 ಸಾವಿರಕ್ಕೂ ಅಧಿಕ ಮಂದಿಯ ಪಿಂಚಣಿ ನಾಲ್ಕು ತಿಂಗಳಿನಿಂದ ಸ್ಥಗಿತಗೊಂಡಿದ್ದರೂ ಕೆಲವರನ್ನು ಸಂಪರ್ಕಿಸುವುದು ಜಿಲ್ಲಾಡಳಿತಕ್ಕೆ ಸಾಧ್ಯವಾಗಿಲ್ಲ. ಕೆಲವರ ಫೋನ್‌ಗಳಿಗೆ ಸಂದೇಶ ಕಳಿಸಿದ್ದರೂ ಅತ್ತ ಕಡೆಯಿಂದ ಯಾವುದೇ ಸ್ಪಂದನೆ ಸಿಕ್ಕಿಲ್ಲ. ಕೆಲವರು ಸರ್ಕಾರಕ್ಕೆ ನೀಡಿರುವ ದಾಖಲೆಗಳಲ್ಲಿ ತಿಳಿಸಿರುವ ವಿಳಾಸದಲ್ಲಿ ವಾಸವೇ ಇಲ್ಲ. ಹೀಗಾಗಿ ಸಮಸ್ಯೆಯಾಗಿದೆ ಎಂಬುದನ್ನು ಒಪ್ಪಿಕೊಂಡಿದ್ದಾರೆ.

ಈ ಹಿಂದೆ ವಿವಿಧ ಪಿಂಚಣಿ ಯೋಜನೆಗಳಿಗೆ ಫಲಾನುಭವಿಗಳನ್ನು ಆಯ್ಕೆ ಮಾಡುವ ಸಂದರ್ಭದಲ್ಲಿ ಅನಗತ್ಯವಾಗಿ ಕೆಲವರು ಪ್ರಭಾವ ಬೀರಿ ಹೆಸರು ಸೇರ್ಪಡೆ ಮಾಡಿಕೊಂಡಿರುವ ಸಾಧ್ಯತೆಗಳಿರುತ್ತವೆ. ಜನಪ್ರತಿನಿಧಿಗಳು, ಗಣ್ಯರ ಮೂಲಕ ಶಿಫಾರಸು ಮಾಡಿಸಿರುವುದನ್ನೂ ತಳ್ಳಿ ಹಾಕುವಂತಿಲ್ಲ. ಕೆಲವೊಮ್ಮೆ ದಾಖಲೆಗಳ ಪರಿಶೀಲನೆ ನಡೆಸದೆ ಅಧಿಕಾರಿಗಳು ದೃಢೀಕರಿಸಿದ್ದಾರೆ. ಹೀಗೆ ಅನರ್ಹರು ಫಲಾನುಭವಿಗಳ ಪಟ್ಟಿಗೆ ಸೇರಿಕೊಂಡಿದ್ದಾರೆ. ಈಗ ಇಂಥವರು ಅಗತ್ಯ ದಾಖಲೆ ನೀಡಲು ಮುಂದೆ ಬರುವುದಿಲ್ಲ. ಈಗ ನೋಟಿಸ್ ಪಡೆದಿರುವವರ ಪೈಕಿ ಅನರ್ಹರಿದ್ದರೂ ಆಶ್ಚರ್ಯಪಡಬೇಕಿಲ್ಲ ಎನ್ನುತ್ತಾರೆ ಅಧಿಕಾರಿಗಳು.

ಗ್ರಾಮ ಆಡಳಿತಾಧಿಕಾರಿ ಮೂಲಕ ಶಂಕಾಸ್ಪದ ಪಿಂಚಣಿದಾರರಿಗೆ ನೋಟಿಸ್ ಜಾರಿ ಮಾಡಲಾಗಿದೆ. ಈಗ ಪಿಂಚಣಿದಾರರು ಆದಾಯ ಪ್ರಮಾಣ ಪತ್ರ ಹಾಗೂ ವಯಸ್ಸಿನ ದೃಢೀಕರಣ ಪತ್ರವನ್ನು ಸಂಬಂಧಿಸಿದ ನಾಡಕಚೇರಿಯಲ್ಲಿ ಗ್ರಾಮ ಆಡಳಿತಾಧಿಕಾರಿಗೆ ಸಲ್ಲಿಸಬೇಕು. ಅಲ್ಲಿ ಗ್ರಾಮ ಆಡಳಿತಾಧಿಕಾರಿ ಹಾಗೂ ಕಂದಾಯ ನಿರೀಕ್ಷಕರು ನೀಡುವ ವರದಿ ಆಧರಿಸಿ ಮತ್ತೆ ಪಿಂಚಣಿ ಬಿಡುಗಡೆ ಮಾಡಲಾಗುತ್ತದೆ.

ಪಿಂಚಣಿ ಸ್ಥಗಿತಗೊಳ್ಳಲು ಕೆಲವು ಪ್ರಮುಖ ಕಾರಣಗಳಿವೆ. ಉದಾಹರಣೆಗೆ ಕೆಲ ಪಿಂಚಣಿದಾರರು ಸರ್ಕಾರಕ್ಕೆ ನೀಡಿದ ವಯಸ್ಸಿನ ದೃಢೀಕರಣ ಪ್ರಮಾಣ ಪತ್ರಕ್ಕೂ ಆಧಾರ್ ಕಾರ್ಡ್‌ನಲ್ಲಿ ನಮೂದಾಗಿರುವ ವಯಸ್ಸಿಗೂ ಬಹಳ ವ್ಯತ್ಯಾಸವಿರುತ್ತದೆ. ಯಾವುದೇ ಪಿಂಚಣಿ ಪಡೆಯುವವರ ವಾರ್ಷಿಕ ಆದಾಯ 32 ಸಾವಿರ ರೂ.ಗಿಂತ ಕಡಿಮೆ ಇರಬೇಕು. ಆದರೆ ಪಿಂಚಣಿ ಪಡೆಯುತ್ತಿರುವವರ ಮಕ್ಕಳು ಜಾತಿ ಪ್ರಮಾಣ ಪತ್ರ ಪಡೆಯುವಾಗ ಹೆಚ್ಚಿನ ಆದಾಯ ನಮೂದು ಮಾಡಿದ್ದರೆ ಆಗ ಫಲಾನುಭವಿ ಪಿಂಚಣಿ ಯೋಜನೆಗೆ ಅನರ್ಹರಾಗುತ್ತಾರೆ. ಕೆಲ ತಿಂಗಳ ಹಿಂದೆ ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ಕೆಲವು ಮಾನದಂಡಗಳ ಪೈಕಿ ಅನೇಕರನ್ನು ಬಿಪಿಎಲ್‌ನಿಂದ ಎಪಿಎಲ್ ಪಡಿತರ ಚೀಟಿಗೆ ವರ್ಗಾಯಿಸಿತು. ಆ ಸಂದರ್ಭದಲ್ಲಿ ಸಾಮಾಜಿಕ ಭದ್ರತಾ ಯೋಜನೆಗಳ ಪ್ರಯೋಜನ ಪಡೆಯುತ್ತಿದ್ದ ಅನೇಕರು ಜಿಲ್ಲೆಯಲ್ಲಿ ಪಿಂಚಣಿ ಪಡೆಯಲು ಅನರ್ಹರಾದರು. ಬಳಿಕ ಆಹಾರ ಇಲಾಖೆ ಅನೇಕರನ್ನು ಎಪಿಎಲ್‌ನಿಂದ ಬಿಪಿಎಲ್‌ಗೆ ಬದಲಾಯಿಸಿದರೂ ಪಿಂಚಣಿ ವ್ಯವಸ್ಥೆಯಲ್ಲಿ ಸುಧಾರಣೆ ಆಗಲಿಲ್ಲ.

ಕೆಲವೆಡೆ ಯಾವ ಕಾರಣಕ್ಕೆ ಪಿಂಚಣಿ ಸ್ಥಗಿತಗೊಳಿಸಲಾಗಿದೆ ಎಂಬ ಮಾಹಿತಿ ಗ್ರಾಮ ಆಡಳಿತಾಧಿಕಾರಿ ಬಳಿಯೇ ಇರುವುದಿಲ್ಲ. ಆ ಸಂದರ್ಭದಲ್ಲಿ ಫಲಾನುಭವಿ ತಾಲೂಕು ಕೇಂದ್ರಕ್ಕೆ ತೆರಳಿ ತಹಸೀಲ್ದಾರ್ ಕಚೇರಿಯಲ್ಲಿ ಮಾಹಿತಿ ಪಡೆದು ಬಳಿಕ ಗ್ರಾಮ ಆಡಳಿತಾಧಿಕಾರಿಗೆ ಸೂಕ್ತ ದಾಖಲೆ ನೀಡಬೇಕಾಗುತ್ತದೆ. ಇನ್ನೊಂದೆಡೆ ಈಗ ಎಸ್‌ಐಆರ್ ಪ್ರಕ್ರಿಯೆ ನಡೆಯುತ್ತಿರುವುದರಿಂದ ಅಧಿಕಾರಿಗಳ ಭೇಟಿಯೇ ಕಷ್ಟವಾಗಿದೆ. ದಾಖಲೆ ನೀಡುವುದು ವಿಳಂಬವಾದಷ್ಟೂ ಪಿಂಚಣಿ ಕೈ ಸೇರುವುದು ತಡವಾಗುತ್ತದೆ. ಅಲ್ಲದೆ ಪಿಂಚಣಿದಾರರ ಪಟ್ಟಿಯಿಂದ ಹೊರಬೀಳುವ ಅಪಾಯವೂ ಇದೆ.

"

ನಾನು ಕೂಲಿ ಮಾಡಿಕೊಂಡು ಜೀವನ ನಡೆಸುತ್ತಿದ್ದೇನೆ. ಪತಿ ನಿಧನರಾಗಿದ್ದು ಮಗ ಪ್ರತ್ಯೇಕವಾಗಿದ್ದಾನೆ. ವಿಧವಾ ವೇತನದ ಫಲಾನುಭವಿಯಾಗಿದ್ದ ನನಗೆ ಅದರಿಂದ ಸಿಗುತ್ತಿದ್ದ 800 ರೂ. ಪಡಿತರ, ದಿನಸಿ ಖರೀದಿಗೆ ಸಾಕಾಗುತ್ತಿತ್ತು. ಈಗ ನಾಲ್ಕು ತಿಂಗಳಿನಿಂದ ಪಿಂಚಣಿ ನಿಂತಿದೆ. ಅಧಿಕಾರಿಗಳು ಕೇಳಿರುವ ದಾಖಲೆಗಳನ್ನು ಹೊಂದಿಸಲು ತಾಲೂಕು ಕೇಂದ್ರಕ್ಕೆ ಅನೇಕ ಬಾರಿ ತೆರಳುವಂತಾಗಿದೆ.

— ಮಂಜಮ್ಮ ಆಯನೂರು