ಪಶು ಪಾಲಿಕ್ಲಿನಿಕ್​ಗೆ ತಜ್ಞವೈದ್ಯರ ನೇಮಕಕ್ಕೆ ಕ್ರಮ

ಭದ್ರಾವತಿ: ತಾಲೂಕಿಗೆ ಅವಶ್ಯವಿದ್ದ ಪಶುವೈದ್ಯಕಿಯ ಪಾಲಿಕ್ಲಿನಿಕ್​ ಆರಂಭಗೊಂಡಿದೆ. ಮುಂದಿನ ದಿನಗಳಲ್ಲಿ ಅವಶ್ಯವಿರುವ ತಜ್ಞ ವೈದ್ಯರನ್ನು ನೇಮಿಸಲಾಗುವುದು. ಈ ಬಗ್ಗೆ ಶಾಸಕರೊಂದಿಗೆ ಮಾತುಕತೆ ನಡೆಸಿ ಸರ್ಕಾರದ ಮೂಲಕ ನೇಮಕಗೊಳಿಸಲು ಪ್ರಯತ್ನಿಸುವುದಾಗಿ ನಗರಸಭೆ ಅಧ್ಯೆ ಜೆ.ಸಿ.ಗೀತಾ ರಾಜಕುಮಾರ್​ ಹೇಳಿದರು.

ಹೊಸಮನೆ ಮುಖ್ಯರಸ್ತೆಯ ಪಶುಆಸ್ಪತ್ರೆ ಆವರಣದಲ್ಲಿ ಗುರುವಾರ ಜಿಪಂ, ತಾಪಂ, ನಗರಸಭೆ, ಪಶುಪಾಲನ ಮತ್ತು ಪಶುವೈದ್ಯ ಸೇವಾ ಇಲಾಖೆ ಸಹಯೋಗದಲ್ಲಿ ನೂತನವಾಗಿ ನಿರ್ಮಿಸಿರುವ ಪಶುವೈದ್ಯಕಿಯ ಪಾಲಿ ಕ್ಲಿನಿಕ್​ ಉದ್ಘಾಟಿಸಿ ಮಾತನಾಡಿದರು.

ಹೈನುಗಾರಿಕೆಗೆ ಆದ್ಯತೆ ನೀಡುವ ಸಲುವಾಗಿ ಸರ್ಕಾರ ಅನೇಕ ಯೋಜನೆ ನೀಡುತ್ತ ಬಂದಿದೆ. ಅವುಗಳಲ್ಲಿ ಪಾಲಿಕ್ಲಿನಿಕ್​ ಸಹ ಒಂದು. ಜಿಲ್ಲೆಗೆ ಸೀಮಿತವಾಗಿದ್ದ ಪಾಲಿಕ್ಲಿನಿಕ್​ ತಾಲೂಕಿನಲ್ಲಿ ಪ್ರಾರಂಭಗೊಂಡರೆ ರಾಸುಗಳ ಪಾಲನೆಗೆ ಅನುಕೂಲವಾಗುವುದು ಎಂಬ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ದೂರದೃಷ್ಟಿಯಂತೆ ಶಾಸಕ ಬಿ.ಕೆ.ಸಂಗಮೇಶ್ವರ ಅವರು ತಾಲೂಕಿನಲ್ಲಿ ಪಾಲಿಕ್ಲಿನಿಕ್​ ಆರಂಭಿಸಿದ್ದಾರೆ. ಅಗತ್ಯ ಚುಚ್ಚುಮದ್ದು ಸೇರಿ ಇತರ ಸೌಲಭ್ಯಗಳನ್ನು ಒದಗಿಸಲು ಸರ್ಕಾರ ಮುಂದಾಗಿದೆ ಎಂದರು.

ಪಂಚ ಗ್ಯಾರಂಟಿ ಅನುಷ್ಠಾನ ಸಮಿತಿ ತಾಲೂಕು ಅಧ್ಯ ಬಿ.ಎಸ್​.ಗಣೇಶ್​ ಮಾತನಾಡಿ, ಕಟ್ಟಡವಿದ್ದರೆ ಸಾಲದು. ರಾಸುಗಳಿಗೆ ಅಗತ್ಯವಿರುವ ಎಲ್ಲ ಸೌಲಭ್ಯಗಳನ್ನು ಒದಗಿಸುವುದು ಮುಖ್ಯ. ಈ ನಿಟ್ಟಿನಟ್ಟಿ ಶಾಸಕರೊಂದಿಗೆ ಮಾತನಾಡುತ್ತೇನೆ ಎಂದು ಹೇಳಿದರು.

ಪಶುಇಲಾಖೆ ಉಪನಿರ್ದೇಶಕ ಡಾ. ನಾಗರಾಜ್​, ಪಶುವೈದ್ಯಾಧಿಕಾರಿ ಡಾ. ಬಿ.ಬಿ.ರಾಜಶೇಖರ್​, ನಗರಸಭಾ ಸದಸ್ಯೆ ಅನುಸುಧಾ ಮೋಹನ್​, ಕೃಷಿಕ ಸಮಾಜದ ಅಧ್ಯ ಎಚ್​.ಎನ್​.ನಾಗರಾಜ್​, ಸುದರ್ಶನ್​ ಇದ್ದರು.