ತುಮರಿ: ಸಿಗಂದೂರು ಸೇತುವೆ ಕೇವಲ ಕಾಂಕ್ರೀಟ್ ರಚನೆಯಲ್ಲ. ಇದು ಹಿನ್ನೀರಿನ ಜನರ ದಶಕಗಳ ಕಣ್ಣೀರು ಮತ್ತು ಸತತ ಹೋರಾಟದ ಪ್ರತಿಫಲ ಎಂದು ಸೇತುವೆ ಹೋರಾಟ ಸಮಿತಿ ಪ್ರಮುಖ, ಕೇಂದ್ರ ಸಾಂಬಾರು ಮಂಡಳಿ ಸದಸ್ಯ ಪ್ರಸನ್ನ ಕೆರೆಕೈ ಹೇಳಿದರು.

ಶರಾವತಿ ಹಿನ್ನೀರಿನಲ್ಲಿ ನಿರ್ಮಿಸಲಾದ ಸಿಗಂದೂರು ಸೇತುವೆ ಉದ್ಘಾಟನೆಯಾಗಿ ಒಂದು ವರ್ಷ ಪೂರ್ಣವಾದ ಹಿನ್ನೆಲೆಯಲ್ಲಿ ಕರೂರು ಹೋಬಳಿಯ ನಾಗರಿಕರು ಸೋಮವಾರ ಸೇತುವೆ ಮೇಲೆ ಆಯೋಜಿಸಿದ್ದ ಸಂಭ್ರಮಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಒಂದು ಕಾಲದಲ್ಲಿ ಲಾಂಚ್‌ಗಾಗಿ ಗಂಟೆಗಟ್ಟಲೆ ಕಾಯುತ್ತಿದ್ದ ದಿನಗಳು, ತುರ್ತು ಚಿಕಿತ್ಸೆ ಸಿಗದೆ ಅನುಭವಿಸಿದ ಯಾತನೆಗಳು ಇಂದಿಗೂ ಕಣ್ಣಮುಂದೆ ಬರುತ್ತವೆ. ಈ ಸೇತುವೆ ನಿರ್ಮಾಣಕ್ಕಾಗಿ ನಡೆಸಿದ ನಿರಂತರ ಧರಣಿಗಳು, ಸರ್ಕಾರದ ಗಮನ ಸೆಳೆಯಲು ಪಟ್ಟಪಾಡು ಅಷ್ಟಿಷ್ಟಲ್ಲ. ಇಂದು ಈ ಸೇತುವೆ ಕರೂರು ಹೋಬಳಿಯ ಜನರ ಆರ್ಥಿಕ ಮತ್ತು ಸಾಮಾಜಿಕ ಜೀವನದಲ್ಲಿ ದೊಡ್ಡ ಬದಲಾವಣೆ ತಂದಿದೆ. ಇದಕ್ಕೆ ಸಹಕರಿಸಿದ ಪ್ರತಿಯೊಬ್ಬ ಹೋರಾಟಗಾರರಿಗೂ, ಜನಪ್ರತಿನಿಧಿಗಳಿಗೆ ಕೃತಜ್ಞತೆ ಸಲ್ಲಿಸುತ್ತೇನೆ ಎಂದರು. ಸಂಪರ್ಕ ಕ್ರಾಂತಿಯು ಕರೂರು ಹೋಬಳಿಯ ಭಾಗದಲ್ಲಿ ಸಕಾರಾತ್ಮಕ ಪರಿಣಾಮ ಬೀರಲಿದೆ. ಈ ಹಿಂದೆ ಲಾಂಚ್ ಇದ್ದಾಗ ನೀರಿನ ಹರಿವು ಇಲ್ಲದ ಸಮಯದಲ್ಲಿ ಲಾಂಚ್ ಸ್ಥಗಿತಗೊಂಡು ಜನರಿಗೆ ಸಾಕಷ್ಟು ಅನಾನುಕೂಲ ಉಂಟಾಗುತ್ತಿತ್ತು. ಲಾಂಚ್ ನಿಲ್ದಾಣದಿಂದ ನಡೆದು ಬಂದು ಮಹಿಳೆಯರು, ವೃದ್ಧರು ತೀವ್ರ ಸಾಹಸ ಪಟ್ಟು ಬಸ್ ಏರಬೇಕಾದ ದುಸ್ಥಿತಿ ಇತ್ತು ಎಂದು ನೆನಪಿಸಿಕೊಂಡರು.

ಪ್ರಮುಖರಾದ ಕೆ.ಜಿ.ಪ್ರಶಾಂತ್, ಮಂಜಯ್ಯ, ಗಣಪತಿ, ಸಂತೋಷ, ಸಚಿನ್, ಅಣ್ಣಪ್ಪ, ಸಿರಿ, ಮಂಜುನಾಥ್, ಸಾವಿತ್ರಿ ಶಿವರಾಜ್, ಅರುಣ್, ಮಂಜುನಾಥ, ಗಣಪತಿ, ಸನ್ಮಾನ್, ಶ್ರೀಧರ್, ಕರೂರು ಹೋಬಳಿಯ ಹಿರಿಯರು, ಯುವಕರು ಇತರರಿದ್ದರು.