ಭಗವದಾರಾಧನೆಯಿಂದ ಮಾತ್ರವೇ ಮೋಕ್ಷ I pooja of god

ಶಿವಮೊಗ್ಗ: ಸನಾತನ ಧರ್ಮ ಮೋಕ್ಷ ಹಾಗೂ ಶ್ರೇಯಸ್ಸಿನ ಮಾರ್ಗವನ್ನು ವಿವರಿಸುತ್ತದೆ. ಎಲ್ಲ ರೀತಿಯ ಪ್ರಶ್ನೆಗಳಿಗೂ ಸನಾತನ (sanatana) ಧರ್ಮದಲ್ಲಿ ಉತ್ತರವಿದೆ. ಬೇರೆ ಯಾವುದೇ ಮತ, ಧರ್ಮದಲ್ಲಿ ಇಂತಹ ಸ್ಥಿತಿಯಿಲ್ಲ. ನಾನು ಹೇಳಿದ್ದಷ್ಟನ್ನೇ ಪಾಲಿಸು, ಪ್ರಶ್ನೆಯನ್ನು ಕೇಳಬೇಡ ಎಂದು ಸನಾತನ ಧರ್ಮ (religion) ಯಾವ ಸಂದರ್ಭದಲ್ಲೂ ಹೇಳಿಲ್ಲ ಎಂದು ದಕ್ಷಿಣಾಮ್ನಾಯ ಶೃಂಗೇರಿ ಶಾರದಾ ಪೀಠದ ಶ್ರೀ ವಿಧುಶೇಖರ (vidhushekara) ಭಾರತೀ ಸ್ವಾಮೀಜಿ ತಿಳಿಸಿದರು.

ತೀರ್ಥಹಳ್ಳಿ ತಾಲೂಕು ಕೇಶವಾಪುರದ ಗಂಗಾಧರೇಶ್ವರ ದೇವಸ್ಥಾನದಲ್ಲಿ ಏರ್ಪಡಿಸಿದ್ದ ಶ್ರೀ ಮದ್ಭಾಗವತದ ಕೃಷ್ಣಾರ್ಪಣ ಕಾರ್ಯಕ್ರಮ, ದ್ವಾದಶಾಕ್ಷರೀ ಮಂತ್ರ ಹವನದ ಪೂರ್ಣಾಹುತಿಯ ಸಾನ್ನಿಧ್ಯವಹಿಸಿ ಆಶೀರ್ವಚನ ನೀಡಿದ ಶ್ರೀಗಳು, ಅನೇಕ ಮಂದಿ ಮೋಕ್ಷ ಮಾರ್ಗವನ್ನು ತಮ್ಮದೇ ರೀತಿಯಲ್ಲಿ ಅನ್ವೇಷಿಸುವ ಪ್ರಯತ್ನ ಮಾಡಿದ್ದಾರೆ. ಆದರೆ ಸನಾತನ ಧರ್ಮದಂತೆ ಯಾರಿಂದಲೂ ಎಲ್ಲ ಪ್ರಶ್ನೆಗಳಿಗೆ ಉತ್ತರ ನೀಡುವುದು ಸಾಧ್ಯವಾಗಿಲ್ಲ ಎಂದರು.

ಸನಾತನ ಧರ್ಮದಲ್ಲಿ ವೇದ, ಉಪನಿಷತ್ತು, ಪುರಾಣಗಳು, ಧಾರ್ಮಿಕ ಕೃತಿಗಳು, ಕಾವ್ಯಗಳಿವೆ. ಎಲ್ಲ ಜಿಜ್ಞಾಸೆಗೂ ಇಲ್ಲಿ ವಿವರಣೆ ಇದೆ. ಎಲ್ಲರೂ ಸುಖವನ್ನು ಬಯಸುತ್ತಾರೆ. ಅದನ್ನು ಪೂರೈಸಿಕೊಳ್ಳಲು ಪ್ರತಿ ಕ್ಷಣವೂ ಪ್ರಯತ್ನ ಮಾಡುತ್ತಾರೆ. ಆದರೆ ನಿಜವಾದ ಮೋಕ್ಷ ಮಾರ್ಗದಲ್ಲಿ ಸಾಗುವವರ ಸಂಖ್ಯೆ ಕಡಿಮೆ. ಮೋಕ್ಷವನ್ನು ತಮ್ಮ ಜ್ಞಾನಕ್ಕೆ ತಕ್ಕಂತೆ ವ್ಯಾಖ್ಯಾನಿಸುವವರೇ ಹೆಚ್ಚು ಎಂದು ಹೇಳಿದರು.

ಇರುವ ಜೀವನವನ್ನು ವ್ಯರ್ಥ ಮಾಡಬೇಡಿ ಎಂಬುದನ್ನೇ ಭಾಗವತ ನಮಗೆ ತಿಳಿಸುತ್ತದೆ. ಲೌಕಿಕವಾದ ಯಾವುದೂ ಜನರನ್ನು ದುಃಖದಿಂದ ಮುಕ್ತ ಮಾಡುವುದಿಲ್ಲ. ಭಗವದಾರಾಧನೆಯಿಂದ ಮಾತ್ರ ನಮಗೆ ಮೋಕ್ಷ ಸಿಗುತ್ತದೆ. ಲೌಕಿಕ ವ್ಯವಹಾರದ ಜತೆಗೆ ಭಗವಂತನ ಸ್ಮರಣೆಯೂ ಮುಖ್ಯ. ಶಂಕರ ಭಗವತ್ಪಾದರು ಇದೇ ಅಂಶವನ್ನು ಭಜಗೋವಿಂದಂ ಸ್ತೋತ್ರದಲ್ಲಿ ವಿವರಿಸಿದ್ದಾರೆ ಎಂದು ತಿಳಿಸಿದರು.

ಶ್ರೀಮದ್ಭಾಗವತದ ಉಪನ್ಯಾಸ ನಡೆಸಿಕೊಟ್ಟಿದ್ದ ರವಿ ಭಟ್, ಇಂತಹ ಕಾರ್ಯಕ್ರಮದ ಕಲ್ಪನೆ ಮೂಡಿ ಅದು ಸಾಕಾರಗೊಂಡ ಬಗೆಯನ್ನು ವಿವರಿಸಿದರು. ಈ ಕಾರ್ಯಕ್ಕೆ ಸಹಕಾರ ನೀಡಿದ ಎಲ್ಲರನ್ನೂ ಸ್ಮರಿಸಿದರು. ಇದೇ ವೇಳೆ ಶ್ರೀಗಳು ದೇವಸ್ಥಾನದ ಆವರಣದಲ್ಲಿ ಶ್ರೀ ಚಂದ್ರಶೇಖರ ಭಾರತೀ ಸಭಾಭವನ ಉದ್ಘಾಟಿಸಿದರು.

ಲೋಕದಲ್ಲಿ ಪ್ರಚಾರ, ಅಪಪ್ರಚಾರ, ಕಲ್ಪನೆಗಳಿಗೆ ಮಿತಿಯೇ ಇಲ್ಲ. ಆದರೆ ಶಾಸ್ತ್ರ ಎಂಬುದು ಕಲ್ಪನೆಯಲ್ಲ. ಅದು ಇರುವ ವಿಚಾರವನ್ನು ನಮಗೆ ತಿಳಿಸುತ್ತದೆ. ಯಾವ ಮಾರ್ಗ ಉತ್ತಮ ಎಂಬುದನ್ನು ತರ್ಕಬದ್ಧವಾಗಿ ನಮಗೆ ತಿಳಿಸುತ್ತದೆ. ಇಂದು ಅನೇಕರು ನಮ್ಮ ಸನಾತನ ಧರ್ಮದಲ್ಲಿನ ಅಂಶಗಳ ಬಗ್ಗೆ ಸಾಕಷ್ಟು ಪ್ರಶ್ನೆಗಳನ್ನು ಕೇಳುತ್ತಿದ್ದಾರೆ. ಶಾಸ್ತ್ರಗಳನ್ನು ನಾವು ಒಪ್ಪುವುದಿಲ್ಲ ಎಂದು ಹೇಳುವ ಅನೇಕರು ಇಂದಿಗೂ ಸುಖವಾಗಿದ್ದಾರಲ್ಲ ಎಂಬ ಪ್ರಶ್ನೆ ಉದ್ಭವವಾಗುತ್ತದೆ. ಆದರೆ ಶಾಸ್ತ್ರದ ಮಾರ್ಗವನ್ನು ಒಪ್ಪದವರು ಇಂದಿನಂತೆ ಮುಂದಿನ ಜನ್ಮದಲ್ಲಿಯೂ ಸುಖವಾಗಿರುತ್ತಾರೆ. ಮೋಕ್ಷ ಪಡೆಯುತ್ತಾರೆ ಎಂಬ ಖಚಿತತೆ ಇರುವುದಿಲ್ಲ ಎಂದು ವಿಧುಶೇಖರ ಶ್ರೀಗಳು ಎಚ್ಚರಿಸಿದರು.

ಭಗವಂತನ ನಾಮಸ್ಮರಣೆಯಿಂದ ಮನುಷ್ಯನ ಎಲ್ಲ ಪಾಪಗಳೂ ಪರಿಹಾರವಾಗುತ್ತವೆ. ಹಾಗೆಂದಮಾತ್ರಕ್ಕೆ ದೇವರ ಸ್ಮರಣೆ ಮಾಡಿ ಎಲ್ಲ ಪಾಪ ಹಾಗೂ ಕೆಟ್ಟ ಕಾರ್ಯ ಮಾಡಲು ಲೈಸೆನ್ಸ್ ಸಿಕ್ಕಿದೆ ಎಂದು ಭಾವಿಸುವುದು ತಪ್ಪು. ಎಲ್ಲ ಕೆಟ್ಟ ಕೆಲಸ ಮಾಡಿ ದೇವರನ್ನು ಸ್ಮರಿಸಿದರೆ ಕ್ಷಮೆ ಸಿಗುತ್ತದೆ ಎಂದು ಭಾವಿಸುವುದು ಸರಿಯಲ್ಲ. ನಮಗೆ ಅಪಘಾತವಾದಾಗ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತೇವೆ. ಆಸ್ಪತ್ರೆ ಇದೆ ಎಂಬ ಕಾರಣಕ್ಕೆ ಯಾರೂ ಅಪಘಾತ ಮಾಡಿಕೊಳ್ಳುವುದಿಲ್ಲ. ಲೌಕಿಕ ಬದುಕಿನಲ್ಲಿ ಅರಿಯದೆ ಮಾಡಿದ ತಪ್ಪಿಗೆ ಭಗವಂತನ ನಾಮಸ್ಮರಣೆಯಿಂದ ಕ್ಷಮೆ ದೊರೆಯುತ್ತದೆ ಎಂದು ಶ್ರೀಗಳು ಹೇಳಿದರು.

ಕೆಲವರು ಧಾರ್ಮಿಕ ಅಂಧಶ್ರದ್ಧೆ ಹೊಂದಿರುತ್ತಾರೆ. ಇದನ್ನು ಅನೇಕರು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಇಂಥವರಿಂದ ಧರ್ಮಕ್ಕೂ ಅಪವಾದ ಬರುತ್ತಿದೆ. ಶಾಸ್ತ್ರಗಳ ಅರಿತು ಅದರಲ್ಲಿ ಏನು ಹೇಳಿದೆಯೋ ಅಷ್ಟು ಧಾರ್ಮಿಕ ಭಕ್ತಿ ಹೊಂದಿದ್ದರೆ ಸಾಕು. ಯಾರೋ ನೀಡುವ ಅನುಚಿತ ಸಲಹೆಗಳನ್ನು ಪಾಲಿಸುವ ಅಗತ್ಯವಿಲ್ಲ. ಧಾರ್ಮಿಕ ನಂಬಿಕೆಗಳಿಗೂ ಒಂದು ಮಿತಿ, ಅದಕ್ಕೊಂದು ತಾರ್ಕಿಕ ಚೌಕಟ್ಟು ಬೇಕು. ಇಲ್ಲದಿದ್ದರೆ ಅದರಿಂದ ನಷ್ಟವೇ ಹೆಚ್ಚು ಎಂದು ವಿಧುಶೇಖರ ಶ್ರೀಗಳು ತಿಳಿಸಿದರು.

ನಾವು ಧಾರ್ಮಿಕ ಬಲ ಬೆಳೆಸಿಕೊಂಡಾಗ ಮಾತ್ರ ಸನಾತನ ಧರ್ಮ ಉಳಿಯುತ್ತದೆ. ಅದು ಮುಂದಿನ ಪೀಳಿಗೆಗೂ ದಾಟುತ್ತದೆ. ಸರ್ವಶಕ್ತಿಶಾಲಿಯಾದ ಅರ್ಜುನನಿಗೆ ಕುರುಕ್ಷೇತ್ರದಲ್ಲಿ ಗೊಂದಲ ಉಂಟಾಗಿತ್ತು. ಆ ಸಂದರ್ಭದಲ್ಲಿ ಭಗವಂತ ಗೀತೋಪದೇಶ ಮಾಡಿದಾಗ ಅರ್ಜುನನಿಗೆ ಆವರಿಸಿಕೊಂಡಿದ್ದ ಆವರಣ ಸರಿದು ಜ್ಞಾನದ ಬೆಳಕು ಆತನಿಗೆ ಗೋಚರವಾಯಿತು. ಇಂತಹ ಧಾರ್ಮಿಕ ಬಲ ನಮಗೆ ಇಂದು ಅಗತ್ಯ. ಧಾರ್ಮಿಕ ಉಪನ್ಯಾಸ, ಸತ್ಸಂಗಗಳಿಗೆ ಮಕ್ಕಳನ್ನು ಕರೆದೊಯ್ಯಬೇಕು. ಅವರಿಗೆ ಎಷ್ಟು ಅರ್ಥವಾಗುತ್ತದೆ ಎಂಬುದು ಬೇರೆ ಸಂಗತಿ. ಉತ್ತಮ ವಿಚಾರಗಳು ಕಡೇಪಕ್ಷ ಅವರ ಕಿವಿಗೆ ಬಿದ್ದಾಗ ಭವಿಷ್ಯದಲ್ಲಿ ಅವರು ತಮ್ಮ ಪಾಲಕರನ್ನು ಗೌರವದಿಂದ ಕಾಣುತ್ತಾರೆ. ಪಾಲಕರನ್ನು ಅವರು ಖಂಡಿತವಾಗಿಯೂ ವೃದ್ಧಾಶ್ರಮಕ್ಕೆ ಸೇರಿಸುವುದಿಲ್ಲ ಎಂದು ಶ್ರೀಗಳು ಅಭಿಪ್ರಾಯಪಟ್ಟರು.