ವನ ಸೇರಿದ ಸಾಗರದ ಶ್ರೀ ಮಾರಿಕಾಂಬೆ

ಸಾಗರ: ಒಂಬತ್ತು ದಿನದ ಸಾಗರ ಶ್ರೀ ಮಾರಿಕಾಂಬಾ ಜಾತ್ರೆ ಯಶಸ್ವಿಯಾಗಿದ್ದು, ಅಮ್ಮನವರನ್ನು ವನಕ್ಕೆ ಬಿಡುವ ಶಾಸ್ತ್ರದ ಮೂಲಕ ಜಾತ್ರೆ ಸಂಪನ್ನಗೊಂಡಿದೆ. ಒಂಬತ್ತು ದಿನಗಳಲ್ಲಿ 25 ಲಕ್ಷಕ್ಕೂ ಹೆಚ್ಚು ಜನರು ದೇವರ ದರ್ಶನ ಮಾಡಿದ್ದಾರೆ.

ಅಮ್ಮನವರನ್ನು ವನಕ್ಕೆ ಬಿಡುವ ಶಾಸ್ತದಲ್ಲಿ ಪಾಲ್ಗೊಂಡು ಮಾತನಾಡಿದ ಶಾಸಕ ಗೋಪಾಲಕೃಷ್ಣ ಬೇಳೂರು, ಅಮ್ಮನ ಸೇವೆ ಮಾಡಲು ಸಾಗರ ಜನತೆ ಅವಕಾಶ ಕಲ್ಪಿಸಿದ್ದರು. ಜನರ ಸಹಕಾರದಿಂದ ಜಾತ್ರೆ ಯಶಸ್ವಿಯಾಗಿದೆ. ಇಡೀ ಸಮಿತಿ ಹಗಲಿರುಗಳೂ ಶ್ರಮಿಸಿದ್ದು, ಅವರ ಶ್ರಮ ಅಪಾರ ಎಂದು ತಿಳಿಸಿದರು.

ಅಮ್ಮನವರನ್ನು ವನಕ್ಕೆ ಬಿಡುವ ಸಂದರ್ಭದಲ್ಲಿ ಅಮ್ಮನವರ ಪಕ್ಕ ನಿಂತು ಮೈಕ್ ಹಿಡಿದು ಜನರು ಮುಂದಕ್ಕೆ ಸಾಗುವಂತೆ ಸೂಚನೆ ನೀಡುತ್ತಿದ್ದರು. ಎಲ್ಲ ವೃತ್ತಗಳಲ್ಲೂ ತಾಯಿಗೆ ಪೂಜೆ ಮಾಡಿಸುವ ಭಕ್ತರಿಗೆ ಸಮಯವಕಾಶ ಮಾಡಿಕೊಡುತ್ತಿದ್ದರು. ವನಕ್ಕೆ ಬಿಡುವ ಸಂದರ್ಭದಲ್ಲಿ ದೇವಿ ಮೇಲೆ ಹಾರಿಬಿಟ್ಟ ಕೋಳಿಯನ್ನು ಹಿಡಿಯಲು ಭಕ್ತರು ಹರಸಾಹಸ ಪಡುತ್ತಿದ್ದರು.

ನಾಟಕ ನೋಡಲು ಪ್ರಚಾರ: ಅಧಿಕೃತವಾಗಿ ಜಾತ್ರೆ 9 ದಿನ ನಡೆದು ಸಂಪನ್ನಗೊಂಡರೂ ವಸ್ತು ಪ್ರದರ್ಶನ ಮತ್ತು ಇತರ ಚಟುವಟಿಕೆಗಳು ಇನ್ನೂ ಒಂದು ವಾರ ಇರಲಿದೆ. ಈ ಹಿನ್ನೆಲೆಯಲ್ಲಿ ಸಾಗರಕ್ಕೆ ಆಗಮಿಸಿರುವ ಗದಗ ಜಿಲ್ಲೆಯ ಶ್ರೀಶೈಲ ಮಲ್ಲಿಕಾರ್ಜುನ ನಾಟಕ ಸಂಘ ಪ್ರದರ್ಶನ ನೀಡುತ್ತಿರುವ ನಾಟಕ ಗಂಡನಿಗೆ ತಕ್ಕ ಹೆಂಡತಿ ಹೆಚ್ಚು ಜನಪ್ರಿಯಗೊಳ್ಳುತ್ತಿದೆ. ಸಾಗರದ ಪುರೋಹಿತ, ಗಣಪತಿ ಬ್ಯಾಂಕ್ ನಿರ್ದೇಶಕ ಎಸ್.ಗಜಾನನ ಜೋಯ್ಸ ತಾವೇ ಒಂದು ಕರಪತ್ರ ಹೊರಡಿಸಿ ಜಾತ್ರೆಯಲ್ಲಿ ಜನತೆಗೆ ನಾಟಕ ನೋಡುವಂತೆ ಕೋರುತ್ತಿದ್ದಾರೆ.

ಮಾರಿಕಾಂಬಾ ದೇವಿ ನ್ಯಾಸ ಪ್ರತಿಷ್ಠಾನದ ಅಧ್ಯಕ್ಷ ಕೆ.ಎನ್.ನಾಗೇಂದ್ರ, ಉಪಾಧ್ಯಕ್ಷ ಸುಂದರ ಸಿಂಗ್, ಕಾರ್ಯದರ್ಶಿ ಗಿರಿಧರ ರಾವ್, ಸಹ ಕಾರ್ಯದರ್ಶಿ ಎಸ್.ವಿ.ಕೃಷ್ಣಮೂರ್ತಿ, ಕೋಶಾಧ್ಯಕ್ಷ ನಾಗೇಂದ್ರ ಕುಮಟ, ಉಪವಿಭಾಗಾಧಿಕಾರಿ ವಿರೇಶ್‌ಕುಮಾರ್, ಎಎಸ್‌ಪಿ ಡಾ. ಬೆನಕಪ್ರಸಾದ್, ವಿವಿಧ ಸಮಿತಿ ಸಂಚಾಲಕರು ಭಾಗವಹಿಸಿದ್ದರು.