ವೃತ್ತಿ ಬದ್ಧತೆ ಇರುವ ಶಿಕ್ಷಕರಿಗೆ ಗೌರವ | Honors program

ತೀರ್ಥಹಳ್ಳಿ: ಶಿಕ್ಷಕರಾದವರು ವೃತ್ತಿ ಪಾವಿತ್ರೃವನ್ನು ಅರಿತು ಭವಿಷ್ಯದ ಪೀಳಿಗೆಯನ್ನು ರೂಪಿಸುವಲ್ಲಿ ನಿಷ್ಠೆಯಿಂದ ಕಾರ್ಯನಿರ್ವಹಿಸಬೇಕಿದೆ ಎಂದು ಶಿಕ್ಷಣ ತಜ್ಞ, ಕಾರ್ಕಳದ ಜ್ಞಾನಸುಧಾ ಶಿಕ್ಷಣ ಸಂಸ್ಥೆ ಮುಖ್ಯಸ್ಥ ಡಾ. ಸುಧಾಕರ ಶೆಟ್ಟಿ ಹೇಳಿದರು.

ಪಟ್ಟಣದ ಗೋಪಾಲ ಗೌಡ ರಂಗಮಂದಿರದಲ್ಲಿ ಕಳೆದ ಶೈಕ್ಷಣಿಕ ಸಾಲಿನ ಪಿಯುಸಿ ಹಾಗೂ ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ ಉತ್ತಮ ಲಿತಾಂಶ ಬಂದಿರುವ ಹಿನ್ನೆಲೆಯಲ್ಲಿ ತೀರ್ಥಹಳ್ಳಿ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯ ಎಲ್ಲ ಪಿಯು ಕಾಲೇಜು ಹಾಗೂ ಪ್ರೌಢಶಾಲೆಗಳ ಶಿಕ್ಷಕರಿಗೆ ಶಾಸಕ ಆರಗ ಜ್ಞಾನೇಂದ್ರ ನೇತೃತ್ವದಲ್ಲಿ ಹಮ್ಮಿಕೊಂಡಿದ್ದ ಸನ್ಮಾನ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಶಿಕ್ಷಕರಲ್ಲಿ ಎರಡು ವಿಧ. ಸರ್ಕಾರದ ಸವಲತ್ತಿಗಾಗಿ ಕೆಲಸ ಮಾಡುವವರು ಮತ್ತು ವೃತ್ತಿಗೆ ತಮ್ಮ ಬದುಕನ್ನು ಅರ್ಪಿಸಿಕೊಳ್ಳುವವರು. ಭವಿಷ್ಯದ ಮೇಲಿನ ಕಾಳಜಿಯಿಂದ ವೃತ್ತಿ ಪಾವಿತ್ರೃ ಕಾಪಾಡುವ ಎರಡನೇ ವರ್ಗದ ಶಿಕ್ಷಕರನ್ನು ಸಮಾಜ ಅತ್ಯಂತ ಗೌರವದಿಂದ ಕಾಣುತ್ತದೆ ಎಂಬುದನ್ನು ಮರೆಯಬಾರದು. ಸಮಾಜದ ಮಾರ್ಗದರ್ಶಕರಾದ ಶಿಕ್ಷಕರು ಜೀವನದ ಸಾರ್ಥಕ್ಯಕ್ಕಾಗಿ ನಿವೃತ್ತಿ  ನಂತರವೂ ಬೋಧನೆ ಮುಂದುವರಿಸಬೇಕು ಎಂದು ಸಲಹೆ ನೀಡಿದರು.

ಶಾಸಕ ಆರಗ ಜ್ಞಾನೇಂದ್ರ ಮಾತನಾಡಿ, ಶಿಕ್ಷಣ ಇಲಾಖೆ ಅಧಿಕಾರಿಗಳ ಪ್ರಾಮಾಣಿಕ ಮತ್ತು ಬದ್ಧತೆಯ ಸೇವೆಯಿಂದಾಗಿ ಖಾಸಗಿ ಶಾಲೆಗಳು ಮಾತ್ರವಲ್ಲದೆ ಸರ್ಕಾರಿ ಹಾಗೂ ವಸತಿ ಶಾಲೆಗಳು ಉತ್ತಮ ಲಿತಾಂಶ ನೀಡುತ್ತಿವೆ. ಹಾಗಾಗಿ ಈ ಶೈಕ್ಷಣಿಕ ಸಾಧನೆಗೆ ರಾಜ್ಯ ನನ್ನ ಕ್ಷೇತ್ರವನ್ನು ತಿರುಗಿ ನೋಡುವಂತಾಗಿದೆ. ಈ ಪರಂಪರೆ ಮುಂದುವರಿಯುವಂತೆ ಶಿಕ್ಷಕರು ಬದ್ಧತೆ ಮೆರೆಯಬೇಕು ಎಂದರು.

ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಎಂಎಡಿಬಿ ಅಧ್ಯಕ್ಷ ಆರ್.ಎಂ.ಮಂಜುನಾಥ ಗೌಡ, ಸಮಾಜ ನಿರ್ಮಾಣದ ಶಿಲ್ಪಿಗಳಾದ ಶಿಕ್ಷಕರನ್ನು ಬೆನ್ನು ತಟ್ಟಿ ಉತ್ತೇಜಿಸುವ ಕಾರ್ಯ ಮಾದರಿ. ಪಾಲಕರು ನೀಡುತ್ತಿರುವ ಸವಲತ್ತನ್ನು ದುರ್ಬಳಕೆ ಮಾಡಿಕೊಳ್ಳುವ ವಿದ್ಯಾರ್ಥಿಗಳು ಮಾದಕ ವ್ಯಸನಗಳಿಗೆ ಬಲಿಯಾಗುತ್ತಿರುವುದು ಆತಂಕಕಾರಿ. ಈ ಬಗ್ಗೆ ಶಿಕ್ಷಕರು ನಿಗಾವಹಿಸಬೇಕು ಎಂದು ತಿಳಿಸಿದರು.

ಪಪಂ ಅಧ್ಯಕ್ಷ ರತ್ನಾಕರ ಶೆಟ್ಟಿ, ಉಪಾಧ್ಯಕ್ಷೆ ಗೀತಾ ರಮೇಶ್, ಗ್ಯಾರಂಟಿ ಸಮಿತಿ ತಾಲೂಕು ಅಧ್ಯಕ್ಷ ಶಚ್ಚೀಂದ್ರ ಹೆಗ್ಡೆ, ತಹಸೀಲ್ದಾರ್ ಎಸ್.ರಂಜಿತ್, ಡಿಡಿಪಿಐ ಮಂಜುನಾಥ್, ತಾಪಂ ಇಒ ಎಂ.ಶೈಲಾ, ತೀರ್ಥಹಳ್ಳಿ ಮತ್ತು ಹೊಸನಗರ ಬಿಇಒಗಳಾದ ಮಂಜುನಾಥ್ ಹಾಗೂ ವೈ.ಗಣೇಶ್, ಬಿಇಒ ಗಿರೀಶ್, ಅಕ್ಷರ ದಾಸೋಹದ ಪ್ರವೀಣ್ ಇದ್ದರು.