ಆಶ್ರಯ ಮನೆ ಪಡೆಯಲು ನಿರಾಸಕ್ತಿ | Ashraya meeting

ಸೊರಬ: ಆಶ್ರಯ ಮನೆಗಳ ಅಳತೆ ತುಂಬ ಚಿಕ್ಕದಾಗಿದೆ. ಮುಂಚೆ ನಿಗದಿಪಡಿಸಿದ ಮೊತ್ತಕ್ಕಿಂತ ಹೆಚ್ಚು ದುಬಾರಿಯಾಗಿದೆ. ಸಾಲದ ಹೊರೆಯೂ ಹೆಚ್ಚಾಗುತ್ತದೆ. ಸಾಲದ ಮೇಲಿನ ಬಡ್ಡಿಯನ್ನಾದರೂ ಕಡಿಮೆ ಮಾಡಿ ಎಂದು ಆಶ್ರಯ ಸಮಿತಿ ಸದಸ್ಯರು, ಬ್ಯಾಂಕ್ ಅಧಿಕಾರಿಗಳನ್ನು ವಸತಿ ಯೋಜನೆ ಫಲಾನುಭವಿಗಳು ಒತ್ತಾಯಿಸಿದರು.

2021-22ರಲ್ಲಿ ಅರ್ಜಿ ಹಾಕಿದವರಿಗೆ 288 ಮನೆಗಳು ಮಂಜೂರಾಗಿವೆ. ಪುರಸಭೆಯು ಪಟ್ಟಣದ ಕಾನುಕೇರಿಯಲ್ಲಿ ಮನೆಗಳನ್ನು ನಿರ್ಮಿಸುತ್ತಿದೆ. ಆದರೆ ಫಲಾನುಭವಿಗಳು ನಿರಾಸಕ್ತಿ ತೋರಿದ ಹಿನ್ನೆಲೆಯಲ್ಲಿ ಅವರ ಮನವೊಲಿಸಲು ಪಟ್ಟಣದಲ್ಲಿ ಕುಂದು ಕೊರತೆ ಸಭೆ ಕರೆಯಲಾಗಿತ್ತು.

ಆಗ ಒಂದು ಮನೆ ನಿರ್ಮಾಣ ವೆಚ್ಚ  6.25 ಲಕ್ಷ ರೂ. ಎಂದು ಅರ್ಜಿ ಆಹ್ವಾನಿಸಲಾಗಿತ್ತು. ಇದೀಗ ವಿವಿಧ ಯೋಜನೆಯಡಿ 25 ಕೋಟಿ ರೂ. ಅನುದಾನ ಮುಂಜುರಾಗಿದೆ. ಈಗ ಒಂದು ಮನೆಯ ಮೊತ್ತ 7.43 ಲಕ್ಷ ರೂ.ಗೆ ಏರಿಕೆಯಾಗಿದೆ. ಈ ಹಿಂದೆ ಆಯ್ಕೆಯಾದ ಫಲಾನುಭವಿಗಳಿಂದ 12 ಸಾವಿರ ರೂ. ಕಟ್ಟಿಸಿಕೊಳ್ಳಲಾಗಿತ್ತು. ಸಾಮಾನ್ಯರಿಗೆ  190, ಅಲ್ಪಸಂಖ್ಯಾತರಿಗೆ 29 ಹಾಗೂ ಎಸ್ಸಿಗೆ 64, ಎಸ್‌ಟಿಗೆ 5 ಮನೆಗಳು ಮುಂಜೂರಾಗಿವೆ. ಕೇಂದ್ರ, ರಾಜ್ಯ ಸರ್ಕಾರ, ನಗರೋತ್ಥಾನದಡಿ ಸಹಾಯಧನ ಮತ್ತು ಈ ಹಿಂದೆ ಕಟ್ಟಿದ ಅನುದಾನ ಸೇರಿ ಸಾಮಾನ್ಯ ವರ್ಗದವರು 4.49 ಲಕ್ಷ ರೂ. ಮತ್ತು ಪರಿಶಿಷ್ಟರು 2.86 ಲಕ್ಷ ರೂ. ಬಾಕಿ ಪಾವತಿಸಬೇಕಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದರು. 

ಬಾಕಿ ಮೊತ್ತ ಪಾವತಿಸಲು ನಾವು ಬಡವರಿದ್ದೇವೆ. ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದೇವೆ. ನಮಗೆ ಬ್ಯಾಂಕ್ ಬಡ್ಡಿ ಕಟ್ಟಿ ಸಾಲ ಪಡೆಯಲು ಸಾಧ್ಯವಿಲ್ಲ. ಬಡ್ಡಿ ರಹಿತ ದೀರ್ಘಾವಧಿ ಕಂತು ಸಾಲ ನೀಡಬೇಕು. ಈಗಾಗಲೇ ಬ್ಯಾಂಕ್ ಸಾಲ ಪಡೆದು ತೀರಿಸುತ್ತಿದ್ದೇವೆ. ಬ್ಯಾಂಕುಗಳು ಸಿಬಿಲ್ ಸ್ಕೋರ್ ಇಲ್ಲದೆ ಸಾಲ ನೀಡುವುದಿಲ್ಲ.  ಈಗಾಗಿ ಮನೆ ನಿರ್ಮಾಣ ಕಷ್ಟ ಎಂದು ಅಳಲು ತೋಡಿಕೊಂಡರು.

ಆಶ್ರಯ ಸಮಿತಿ ಅಧ್ಯಕ್ಷ ಪ್ರಶಾಂತ ಮೇಸ್ತ್ರಿ ಮಾತನಾಡಿ, ಯೋಜನೆಯ ನಿಯಮಗಳಂತೆ ಮನೆ ನಿರ್ಮಾಣ ಮಾಡಬೇಕು. ಸಾಲ ಸೌಲಭ್ಯ ಮತ್ತು ಬಡ್ಡಿ ಇತರೆ ಸೌಲಭ್ಯಗಳ ಬಗ್ಗೆ ಸರ್ಕಾಗಳು ತಿಳಿಸಬೇಕು. ಈಗಾಗಲೇ ಸಾವಿರಾರು ಜನರು ಅರ್ಜಿ ಹಾಕಿದ್ದಾರೆ. ತಮಗೆ ಸಿಕ್ಕಿರುವುದನ್ನು ಸದ್ಬಳಕೆ ಮಾಡಿಕೊಳ್ಳಿ. ನೀವು ಬೇಡ ಎಂದರೆ ಹೊಸದಾಗಿ ಫಲಾನುಭವಿಗಳನ್ನು ಆಯ್ಕೆ ಮಾಡಬೇಕಾಗುತ್ತದೆ. ಬೇಕಾದವರು ಸಹಿ ಹಾಕಿ ಎಂದರು. ಆಗ ಕೆಲವರು ಸಹಿ ಹಾಕದೆ ವಾಪಸಾದರು.

ಪುರಸಭೆ ಮುಖ್ಯಧಿಕಾರಿ ಚಂದನ್, ಬ್ಯಾಂಕ್ ಸಿಬ್ಬಂದಿ ಸುಹಾಸ್, ಹನುಮಂತಪ್ಪ, ಆಶ್ರಯ ಸಮಿತಿ ಸದಸ್ಯರಾದ ನೆಹರು, ಚಿನ್ನಪ್ಪ, ರಶೀದ್ ಇತರರಿದ್ದರು.