ಏಕ ಬೆಳೆ ಪದ್ಧತಿಯಿಂದ ನಷ್ಟ ಸಾಧ್ಯತೆ

ಸೊರಬ: ರೈತರು ಅಡಕೆ, ಬಾಳೆ ಇನ್ನಿತರ ಬೆಳೆಗಳಿಗೆ ರಾಸಾಯನಿಕ ಗೊಬ್ಬರ ಹಾಗೂ ಔಷಧಗಳನ್ನು ಸಕಾರಣವಿಲ್ಲದೆ ಬಳಸುತ್ತಾರೆ. ಕೃಷಿ ಪರಿಕರಗಳ ಮಾರಾಟಗಾರರು ರೈತರಿಗೆ ಗುಣಮಟ್ಟದ ಗೊಬ್ಬರ, ಔಷಧ ಮತ್ತು ಕೀಟನಾಶಕಗಳನ್ನು ಮಾತ್ರವೇ ಸಿಂಪಡಿಸುವಂತೆ ರೈತರಿಗೆ ಸಲಹೆ ನೀಡಬೇಕು ಎಂದು ಶಿವಮೊಗ್ಗ ಅಡಕೆ ಸಂಶೋಧನ ಕೇಂದ್ರದ ಮುಖ್ಯಸ್ಥ ನಾಗರಾಜ್​ ಅಡಿವೆಪ್ಪರ್​ ತಿಳಿಸಿದರು.

ಪಟ್ಟಣದ ತಾಲೂಕು ಪಂಚಾಯಿತಿ ಆವರಣದಲ್ಲಿ ಕೃಷಿ ಇಲಾಖೆಯಿಂದ ಏರ್ಪಡಿಸಿದ್ದ ತಾಲೂಕು ಕೃಷಿ ಪರಿಕರಗಳ ಮಾರಾಟಗಾರರ ತರಬೇತಿ ಕಾರ್ಯಾಗಾರದಲ್ಲಿ ಅಡಕೆ ಬೆಳೆ ವಿಷಯ ಕುರಿತು ಮಾತನಾಡಿದರು.

ಜಿಲ್ಲೆಯಲ್ಲಿ ವ್ಯಾಪಕವಾಗಿ ಅಡಕೆ ಬೆಳೆಯಲಾಗುತ್ತದೆ. ಶೇ.62ರಷ್ಟು ರೈತರು ಅಡಕೆ ಬೆಳೆಯನ್ನು ಅವಲಂಬಿಸಿದ್ದಾರೆ. ಪ್ರಸ್ತುತ ಇದೊಂದೇ ಬೆಳೆಯನ್ನು ಅವಲಂಬಿಸಿರುವುದು ಅಪಾಯಕಾರಿ. ಅನೇಕ ರೋಗಗಳಿಗೆ ಬೆಳೆ ತುತ್ತಾಗುತ್ತಿದೆ. ಬೆಳೆ ಕೈಕೊಟ್ಟರೆ ಆರ್ಥಿಕ ಸಂಕಷ್ಟ ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಿದರು.

ಅಡಕೆ ಬೆಳೆಯನ್ನು ಏಕ ಬೆಳೆಯಾಗಿ ಬೆಳೆಯದೆ ಹೂವು, ಹಣ್ಣು, ಬಾಳೆ, ತರಕಾರಿ, ಕಾಳು ಮೆಣಸು ಸೇರಿದಂತೆ ಬಹುಬೆಳೆ ಪದ್ಧತಿಯನ್ನು ಅನುಸರಿಸಿದಾಗ ಕೃಷಿ ಲಾಭದಾಯಕವಾಗುತ್ತದೆ. ಇದರಿಂದ ಯಾವುದೇ ಒಂದು ಬೆಳೆ ಕೈಕೊಟ್ಟರೂ ಆರ್ಥಿಕ ನಷ್ಟದಿಂದ ಪಾರಾಗಲು ಸಾಧ್ಯವಿದೆ. ರೈತರಿಗೆ ಕೃಷಿ ಇಲಾಖೆ ಅನೇಕ ಕಾರ್ಯಕ್ರಮಗಳ ಮೂಲಕ ಜಾಗೃತಗೊಳಿಸುವ ಕೆಲಸ ಮಾಡುತ್ತದೆ ಎಂದರು.

ಅಡಕೆ ತೋಟ ನಿರ್ಮಿಸುವಾಗ ತಾಯಿ ಮರದ ಅಡಕೆ ತೆಗದು 9&18 ತಿಂಗಳ ಅಡಕೆ ಸಸಿಗಳನ್ನು, ಮಣ್ಣಿನ ಗುಣಲಣಗಳನ್ನು ತಿಳಿಯಬೇಕು. ನಂತರದಲ್ಲಿ ತೋಟಗಳ ನಿರ್ವಹಣೆ ಬಹಳ ಮುಖ್ಯ. ವಾತಾವರಣದಿಂದ ಕೆಲವು ಮರದಲ್ಲಿ ರೋಗಗಳು ಕಾಣಿಸಿಕೊಳ್ಳುತ್ತವೆ. ಆಗ ತೋಟಗಾರಿಕೆ ಅಧಿಕಾರಿಗಳು ತಿಳಿಸಿದ ಔಷಧೋಪಚಾರ ಮಾಡುವುದು ಸೂಕ್ತ ಎಂದು ತಿಳಿಸಿದರು.

ಬಿತ್ತನೆ ಬೀಜ, ರಸಗೊಬ್ಬರ, ಕೀಟನಾಶಕಗಳ ಮಾರಾಟ ಕಾಯ್ದೆ ಬಗ್ಗೆ ಕೃಷಿ ಪರಿಕರಗಳ ಮಾರಾಟಗಾರರಿಗೆ ಜಿಲ್ಲಾ ಸಹಾಯಕ ಕೃಷಿ ಜಂಟಿ ನಿರ್ದೇಶಕ ಬಿ.ಸಿ.ಶಶಿಧರ್​ ಮಾಹಿತಿ ನೀಡಿದರು. ತಾಲೂಕು ಕೃಷಿ ಸಹಾಯಕ ನಿರ್ದೇಶಕ ಕೆ.ಜಿ.ಕುಮಾರ, ತಾಂತ್ರಿಕ ಕೃಷಿ ಅಧಿಕಾರಿ ಕಾಂತರಾಜ್​, ಪರಿಕರ ಮಾರಾಟಗಾರರ ಸಂದ ಸದಸ್ಯ ಉಮೇಶ್​ ಇತರರಿದ್ದರು.