ಕಾಡಾನೆ ಸೆರೆ ಕಾರ್ಯಾಚರಣೆ ಆರಂಭ | Elephant operation

ಭದ್ರಾವತಿ: ಭದ್ರಾವತಿ ಅರಣ್ಯ ವ್ಯಾಪ್ತಿಯ ಚನ್ನಗಿರಿ ವಲಯದಲ್ಲಿ ಸಂಚರಿಸುತ್ತಿರುವ ಕಾಡಾನೆ ಸೆರೆಹಿಡಿಯುವ ಕಾರ್ಯಾಚರಣೆಗೆ ಸಕ್ರೆಬೈಲು ಕ್ಯಾಂಪ್‌ನ ಸಾಕಾನೆಗಳನ್ನು ಕರೆತಂದು ಮಂಗಳವಾರ ಚಾಲನೆ ನೀಡಲಾಯಿತು.

ಚನ್ನಗಿರಿ ವಲಯದ ರೊಪ್ಪದಹಟ್ಟಿ, ರಾಜಗೊಂಡನಹಳ್ಳಿ, ಮರವಂಜಿ, ಬಂಡಿಗುಡ್ಡ ಸೇರಿ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಕೆಲವು ದಿನಗಳಿಂದ ಕಾಡಾನೆ ಸಂಚರಿಸುತ್ತಿದೆ. ಬೆಳೆಗಳನ್ನು ಹಾಳು ಮಾಡುವುದಲ್ಲದೆ ಗ್ರಾಮಗಳೊಳಗೆ ನುಗ್ಗಿ ಆತಂಕ ಸೃಷ್ಟಿಸಿತ್ತು. ಈ ಹಿನ್ನೆಲೆಯಲ್ಲಿ ಆನೆಯನ್ನು ಸೆರೆಹಿಡಿಯಲು ಅರಣ್ಯ ಇಲಾಖೆ ಸಾಕಾನೆಗಳನ್ನು ಬಳಸಿಕೊಂಡು ರೇಡಿಯೋ ಕಾಲರ್ ಅಳವಡಿಸಿ ಸ್ಥಳಾಂತರಿಸುವ ಕಾರ್ಯಕ್ಕೆ  ಮುಂದಾಗಿದೆ.

ಸಕ್ರೆಬೈಲು ಬಿಡಾರದ ಸಾಗರ್, ಭೀಷ್ಮ, ಅರ್ಜುನ, ಬಹದ್ದೂರ್, ಸೋಮಣ್ಣ ಹಾಗೂ ಮಕ್ನ ಆನೆಗಳನ್ನು ಕಾಡಾನೆ ಸೆರೆ ಕಾರ್ಯಾಚರಣೆಯಲ್ಲಿ ತೊಡಗಿಸಿಕೊಳ್ಳಲಾಗಿದೆ. ಕಾವಾಡಿಗಳು, ಮಾವುತರು, ಸಿಬ್ಬಂದಿ ಭಾಗವಹಿಸಿದ್ದಾರೆ. ಸಕ್ರೆಬೈಲಿನ ಮುಖ್ಯ ಪಶುವೈದ್ಯಾಧಿಕಾರಿ ಡಾ. ಮುಜೀಬ್ ಉರ್ ರಹಮಾನ್, ಡಾ. ಮುರಳಿ ನೇತೃತ್ವದಲ್ಲಿ ವಿಶೇಷ ತಂಡ ರಚಿಸಲಾಗಿದೆ. ಉಂಬ್ಳೇಬೈಲು, ತರೀಕೆರೆ, ಲಕ್ಕವಳ್ಳಿ, ಮಾವಿನಕಟ್ಟೆ ಭಾಗದ ಅರಣ್ಯ ಸಿಬ್ಬಂದಿಯೂ ಪಾಲ್ಗೊಂಡಿದ್ದಾರೆ.