ಶಾಸಕರ ನಡೆಯಿಂದ ಬಗರ್​ಹುಕುಂ ರೈತರಿಗೆ ಸಮಸ್ಯೆ

ತೀರ್ಥಹಳ್ಳಿ: ಬಗರ್​ಹುಕುಂ ಮಂಜೂರಾತಿ ಸಕ್ರಮದ ಕುರಿತು ಶಾಸಕ ಆರಗ ಜ್ಞಾನೇಂದ್ರ ಅಧಿಕಾರಿಗಳಿಂದ ವಿವರಣೆ ಕೇಳಿದ್ದಾರೆ. ಇದರಿಂದ ಹತ್ತು ಸಾವಿರಕ್ಕೂ ಹೆಚ್ಚಿನ ಬಗರ್​ಹುಕುಂ ಫಲಾನುಭವಿಗಳಿಗೆ ಸಮಸ್ಯೆ ಎದುರಾಗುವ ಆತಂಕವಿದೆ ಎಂದು ಕಾಂಗ್ರೆಸ್​ ವಕ್ತಾರ, ಮಾಜಿ ಶಾಸಕ ಕಿಮ್ಮನೆ ರತ್ನಾಕರ್​ ಹೇಳಿದರು.

ಸಾರ್ವಜನಿಕ ಲೆಕ್ಕಪತ್ರ ಸಮಿತಿ ಅಧ್ಯಕ್ಷರಾಗಿರುವ ಶಾಸಕರು ಕಾಂಗ್ರೆಸ್​ ಕಾರ್ಯಕರ್ತರ ಮೇಲಿನ ದ್ವೇಷದಿಂದ ಕೇಳಿರುವ ಮಾಹಿತಿಯಿಂದಾಗಿ ಕಳೆದ ಸುಮಾರು 40 ವರ್ಷಗಳ ಹಿಂದೆ ಮಂಜೂರಾಗಿರುವ ಫಲಾನುಭವಿಗಳಿಗೂ ಸಮಸ್ಯೆ ಎದುರಾಗುವ ಆತಂಕವಿದೆ ಎಂದು ಶುಕ್ರವಾರ ಪಟ್ಟಣದಲ್ಲಿ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಸಮಗ್ರ ವರದಿ ನೀಡುವಂತೆ ಸರ್ಕಾರ ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ಸಮಿತಿ ನೇಮಿಸಿದೆ. ಬಗರ್​ಹುಕುಂ ಸಂತ್ರಸ್ತರ ಪರ ಎಂದು ಹೇಳುವ ಶಾಸಕರು ಕಾಂಗ್ರೆಸ್​ ಕಾರ್ಯಕರ್ತರನ್ನು ಗುರಿಯಾಗಿಸಿಕೊಂಡು ಸದನದಲ್ಲಿ ಮಾಡಿರುವ ಆರೋಪ ಬಗರ್​ಹುಕುಂ ಸಂತ್ರಸ್ತರ ಸಂಕಷ್ಟಕ್ಕೆ ಕಾರಣವಾಗಿದೆ. ಈ ಕುರಿತು ಎಲ್ಲ ಬಗರ್​ಹುಕುಂ ರೈತರಿಗೂ ಪತ್ರ ಬರೆಯುವುದಾಗಿ ತಿಳಿಸಿರುವ ಶಾಸಕರು, ಬಗರ್​ಹುಕುಂ ಸಂತ್ರಸ್ತರ ಪರವಾಗಿದ್ದಾರೆಯೇ ಎಂದು ಪ್ರಶ್ನಿಸಿದರು.

ಕಡೇಮನೆ ಗ್ರಾಮದ ರಸ್ತೆಗೆ ಮಂಜೂರಾಗಿದ್ದ 2.50 ಕೋಟಿ ರೂ. ಅನುದಾನವನ್ನು ಭಿಂತಳ ಗ್ರಾಮದಲ್ಲಿರುವ ಸ್ವಂತ ಜಮೀನಿಗೆ ಹೋಗುವ ರಸ್ತೆಗೆ ಬಳಸಿಕೊಂಡು ಸರ್ಕಾರದ ಹಣ ದುರ್ಬಳಕೆ ಮಾಡಿಕೊಂಡಿದ್ದಾರೆ. ಗೋಶಾಲೆ ಮಾಡುವ ಉದ್ದೇಶವಿದ್ದ 10 ಎಕರೆ ಈ ಭೂಮಿ ದಟ್ಟ ಅರಣ್ಯದಿಂದ ಕೂಡಿದೆ. ಅಲ್ಲಿರುವ ಮರಗಳನ್ನು ಸಂಪೂರ್ಣ ಖಾಲಿ ಮಾಡಲಾಗಿದೆ. ಬೈಪಾಸ್​ ಹೆದ್ದಾರಿಯನ್ನು ಶಾಸಕರ ಜಮೀನಿನ ಸಮೀಪ ಹೋಗುವಂತೆ ಮಾಡಲಾಗಿದೆ ಎಂದು ಆರೋಪಿಸಿದರು.

ನಂದಿತಾ ಪ್ರಕರಣವನ್ನು ಸಿಬಿಐ ತನಿಖೆಗೆ ವಹಿಸುವಂತೆ ಕೇಂದ್ರ ಗೃಹ ಸಚಿವ ಅಮಿತ್​ ಷಾ ಅವರನ್ನು ಶಾಸಕರು ಒತ್ತಾಯಿಸಬೇಕು. ಅವರ ದ್ವೇಷದ ರಾಜಕಾರಣ ಮತ್ತು ೇತ್ರದಲ್ಲಿ ನಡೆದಿರುವ ಅಭಿವೃದ್ಧಿ ಕಾಮಗಾರಿ ಸೇರಿ ಎಲ್ಲ ವಿಚಾರಗಳ ಬಗ್ಗೆ ಚರ್ಚೆಗೆ ಸಿದ್ಧ ಎಂದರು.

ಮುಖಂಡರಾದ ಜಿ.ಎಸ್​.ನಾರಾಯಣ ರಾವ್​, ಬಾಳೇಹಳ್ಳಿ ಪ್ರಭಾಕರ್​, ಗೀತಾ ರಮೇಶ್​, ಆದರ್ಶ ಹುಂಚದಕಟ್ಟೆ, ವಿಲಿಯಂ ಮಾರ್ಟಿಸ್​, ಅಮರನಾಥ ಶೆಟ್ಟಿ, ಶ್ರೇಯಸ್​ ರಾವ್​, ಶಬನಂ ಇತರರಿದ್ದರು.

ಶಾಸಕರ ಆರೋಪಕ್ಕೆ ಸ್ಪಷ್ಟನೆ

ಶಾಸಕ ಜ್ಞಾನೇಂದ್ರ ಹಣಗೆರೆಕಟ್ಟೆ ಧಾರ್ಮಿಕ ಕೇಂದ್ರದ ಹೈಮಾಸ್ಟ್​ ದೀಪದ ಅಳವಡಿಕೆ ಬಗ್ಗೆ ಆರೋಪಿಸಿದ್ದಾರೆ. ಈ ಬಗ್ಗೆ ಧರ್ಮದರ್ಶಿ ಮಂಡಳಿ ಅಧ್ಯಕ್ಷ ಕೆರೆಹಳ್ಳಿ ರಾಮಪ್ಪ, ಸದಸ್ಯ ಸುನಿಲ್​ ಶಿರನೆಲ್ಲಿ ಸ್ಪಷ್ಟನೆ ನೀಡಿದರು. ಧಾರ್ಮಿಕ ಕೇಂದ್ರದಲ್ಲಿ ಯಾವುದೇ ರೀತಿಯ ನಿಯಮ ಉಲ್ಲಂನೆಯಾಗಿಲ್ಲ. ಎಲ್ಲವೂ ನಿಯಮ ಬದ್ಧವಾಗಿಯೇ ನಡೆದಿದೆ. ಶಾಸಕರ ಆರೋಪ ರಾಜಕೀಯ ಪ್ರೇರಿತ. ನಮ್ಮ ಅಧಿಕಾರದ ಅವಧಿಯಲ್ಲಿ ಆದಾಯ ಗಣನೀಯ ಪ್ರಮಾಣದಲ್ಲಿ ಏರಿಕೆಯಾಗಿದೆ ಎಂದು ತಿಳಿಸಿದರು.