ಕ್ರಸ್ಟ್ ಲೆವೆಲ್ ತಲುಪಿದ ಲಿಂಗನಮಕ್ಕಿ | linganamakki dam status

ಕಾರ್ಗಲ್: ಮುಂಗಾರು ಆರಂಭದಲ್ಲಿ ಮಳೆ ಕೊರತೆಯಿಂದ ಲಿಂಗನಮಕ್ಕಿ ಜಲಾಶಯದ ನೀರಿನ ಮಟ್ಟ ಬೆಡ್ ಲೆವೆಲ್ ತಲುಪುವುದೇ ಅನುಮಾನವಿತ್ತು. ಆದರೆ ಶರಾವತಿ ಕಣಿವೆ ಉತ್ತಮ ಮಳೆಯಾಗಿದ್ದರಿಂದ ಕ್ರಸ್ಟ್ (ಬೆಡ್ ಲೆವೆಲ್) ಮಟ್ಟವನ್ನು ತಲುಪಿದೆ.

ಸಮುದ್ರ ಮಟ್ಟದಿಂದ 1819 ಅಡಿಗಳ ಎತ್ತರವಿರುವ ಜಲಾಶಯದಲ್ಲಿ 1795 ಅಡಿ ಮಟ್ಟವನ್ನು ಬೆಡ್ ಲೆವೆಲ್ ಎನ್ನಲಾಗುತ್ತದೆ. ಮಂಗಳವಾರ ಬೆಳಗ್ಗೆ 8 ಗಂಟೆಗೆ ಡ್ಯಾಂ ನೀರಿನ ಮಟ್ಟ 1795.15 ಅಡಿ ತಲುಪಿದೆ.

ನೀರು 1795 ಅಡಿ ತಲುಪಿದಾಗ ಅಣೆಕಟ್ಟಿಗೆ ಅಳವಡಿಸಲಾದ 24 ಅಡಿ ಎತ್ತರದ ಹನ್ನೊಂದು ರೇಡಿಯಲ್ ಗೇಟ್‌ಗಳ ತಳಭಾಗವನ್ನು ನೀರು ಸ್ಪರ್ಶಿಸುತ್ತದೆ. ಇದರ ನಂತರ ಜಲಾಶಯದ ಸಂಗ್ರಹದಲ್ಲಿ ಹೆಚ್ಚಳವಾಗುವ ನೀರನ್ನು ಮಾತ್ರ ಸ್ಪಿಲ್ ವೇ ಮೂಲಕ ಹೊರಹರಿಸಬಹುದು.

ಮಳೆ ಕಡಿಮೆಯಾಗಿ ಜಲಾಶಯದಲ್ಲಿ ನೀರಿನ ಸಂಗ್ರಹ ಕಡಿಮೆಯಾದರೆ ಕನಿಷ್ಠ ಬೆಡ್ ಲೆವೆಲ್ ತಲುಪಿದರೆ ಒಂದು ವರ್ಷ ನಿರ್ವಹಣೆ ಮಾಡಬಹುದು ಎನ್ನುವ ಲೆಕ್ಕಾಚಾರವಿದೆ. ಆದ್ದರಿಂದಲೇ ಬೆಡ್ ಲೆವೆಲ್ ತಲುಪುವುದು ಪ್ರಾಮುಖ್ಯತೆ ಪಡೆದಿದೆ. 2024 ಮತ್ತು 2025 ಜಲಾಶಯ ಪೂರ್ಣ ಮಟ್ಟವನ್ನು ತಲುಪಿತ್ತು. 2023ರಲ್ಲಿ 1790.70 ಅಡಿ ಮಾತ್ರ ತುಂಬಿ ಬೆಡ್ ಲೆವೆಲ್ ಕೂಡ ತಲುಪಿರಲಿಲ್ಲ. 151.64 ಟಿಎಂಸಿ ಸಾಮರ್ಥ್ಯದ ಜಲಾಶಯದಲ್ಲಿ ಪ್ರಸ್ತುತ 84.29 ಟಿಎಂಸಿ ನೀರು ಸಂಗ್ರಹವಾಗಿದೆ. ಇದೇ ಸಮಯಕ್ಕೆ ಕಳೆದ ವರ್ಷ  ಜಲಾಶಯದ ನೀರಿನ ಮಟ್ಟ 1815.05 (ಗರಿಷ್ಠ 1819)ಅಡಿಗೆ ತಲುಪಿತ್ತು. 

ಜಲಾಶಯ ಗರಿಷ್ಠ ಮಟ್ಟ ತಲುಪುವಷ್ಟು ದೊಡ್ಡ ಮಳೆಯ ಮುನ್ಸೂಚನೆ ಇಲ್ಲ. ಅಂದಿನ ದಿನಗಳಲ್ಲಿ ರಾಜ್ಯದ ಜನಸಂಖ್ಯೆಗೆ ಅನುಗುಣವಾಗಿ ಬೆಡ್ ಲೆವೆಲ್ ತಲುಪಿದರೆ ಒಂದು ವರ್ಷ ನಿರ್ವಹಣೆ ಮಾಡಬಹುದಿತ್ತು. ಆದರೆ ಪ್ರಸ್ತುತ ಈಗಿರುವ ನೀರು ಸಾಕಾಗುವುದಿಲ್ಲ. ಅಂದು ರಾಜ್ಯಕ್ಕೆ ಶೇ.75ರಷ್ಟು ವಿದ್ಯುತ್ ಪೂರೈಸಬಹುದಿತ್ತು, ಆದರೆ ಇಂದು ಬೇಡಿಕೆ ಹೆಚ್ಚಾಗಿದ್ದು ರಾಜ್ಯಕ್ಕೆ ಶೇ.15ರಿಂದ 20 ಮಾತ್ರ ವಿದ್ಯುತ್ ಪೂರೈಸಬಹುದು ಎಂದು ಕೆಪಿಸಿ ಕಾರ್ಯನಿರ್ವಾಹಕ ಅಭಿಯಂತ ಆರ್.ಶಿವಕುಮಾರ್ ಮಾಹಿತಿ ನೀಡಿದರು.