ಪರೋಪಕಾರಂನಿಂದ ಕಲ್ಯಾಣಿ ಸ್ವಚ್ಛತೆ

ಶಿಕಾರಿಪುರ: ಪರೋಪಕಾರಂ ಸಂಸ್ಥೆ ಸ್ವಯಂಸೇವಕರು ಪಟ್ಟಣದ ಶ್ರೀ ಹುಚ್ಚರಾಯಸ್ವಾಮಿ ದೇವಸ್ಥಾನದ ಕಲ್ಯಾಣಿಯಲ್ಲಿ ಸ್ವಚ್ಛತಾ ಕಾರ್ಯ ನಡೆಸಿದರು.

ಸಮಾಜಸೇವಾ ಚಟುವಟಿಕೆಯ 375ನೇ ಕಾರ್ಯವಾಗಿ ಕಲ್ಯಾಣಿ ಸ್ವಚ್ಛಗೊಳಿಸಿದರು. ದೇವಸ್ಥಾನದ ಕಲ್ಯಾಣಿಯಲ್ಲಿದ್ದ ಕಸ-ಕಡ್ಡಿ, ಪಾಚಿ ಹಾಗೂ ಅನಗತ್ಯ ವಸ್ತುಗಳನ್ನು ತೆಗೆದುಹಾಕಿದರು.

ಪರೋಪಕಾರಂ ಸಂಸ್ಥೆ ಸ್ವಯಂಸೇವಕರು ಪ್ರತಿ ಭಾನುವಾರ ಸ್ವಚ್ಛತಾ ಕಾರ್ಯ ನಡೆಸುತ್ತಾರೆ. ಈ ವಾರ ಮೊದಲು ಹುಚ್ಚರಾಯಸ್ವಾಮಿ ದೇವಸ್ಥಾನದ ಕಲ್ಯಾಣಿ ಸುತ್ತಮುತ್ತ ಬೆಳೆದಿದ್ದ ಹುಲ್ಲು, ಕಳೆ ಮತ್ತು ಮುಳ್ಳಿನ ಪೊದೆಗಳನ್ನು ತೆರವುಗೊಳಿಸಿದರು. ಕಲ್ಯಾಣಿ ಮೆಟ್ಟಿಲುಗಳ ಮೇಲಿದ್ದ ಪಾಚಿ ಸ್ವಚ್ಛಗೊಳಿಸಿದರು. ಸಾರ್ವಜನಿಕರು ಎಸೆದಿದ್ದ ಪ್ಲಾಸ್ಟಿಕ್ ಬಾಟಲಿಗಳು, ಕಸದ ಕವರ್ ಹಾಗೂ ಅನುಪಯುಕ್ತ ಪೂಜಾ ಸಾಮಗ್ರಿಗಳನ್ನು ಸಂಪೂರ್ಣ ಆಯ್ದು ವಿಲೇವಾರಿ ಮಾಡಿದರು.

ಶ್ರಮದಾನದ ಪರಿಣಾಮವಾಗಿ ಕಲ್ಯಾಣಿ ಆವರಣ ಈಗ ಸ್ವಚ್ಛ ಹಾಗೂ ಸುಂದರವಾಗಿದೆ. ಪರೋಪಕಾರಂನ ಮಧುಕೇಶ್ವರ್ ಮಾತನಾಡಿ, ಪಟ್ಟಣದ ಧಾರ್ಮಿಕ ಮತ್ತು ಐತಿಹಾಸಿಕ ತಾಣಗಳನ್ನು ಕಾಪಾಡಿಕೊಳ್ಳುವುದು ಪ್ರತಿಯೊಬ್ಬ ನಾಗರಿಕನ ಕರ್ತವ್ಯ. ಕಲ್ಯಾಣಿಗಳಿಗೆ ಕಸ ಎಸೆಯುವುದನ್ನು ನಿಲ್ಲಿಸಬೇಕು ಎಂದು ಮನವಿ ಮಾಡಿದರು.