ಅಡಿಕೆ ಸಸಿಗಳಿಗೆ ಭರ್ಜರಿ ಡಿಮಾಂಡ್ I areca plants

ವರ್ಷದಿಂದ ವರ್ಷಕ್ಕೆ ಅಡಿಕೆ (areca) ಬೆಳೆಗೆ ಸವಾಲುಗಳು ಹೆಚ್ಚುತ್ತಲೇ ಇವೆ. ಆದರೆ ಅಡಿಕೆ ಬೆಳೆಯುವ ಪ್ರದೇಶ ವಿಸ್ತರಣೆ ಮಾತ್ರ ನಿಲ್ಲುತ್ತಿಲ್ಲ. ಸಂಕಷ್ಟಗಳ ನಡುವೆಯೂ ಈ ಬೆಳೆ ತನ್ನ ಆಕರ್ಷಣೆ (attraction) ಕಳೆದುಕೊಂಡಿಲ್ಲ. ಇದಕ್ಕೆ ಸಾಕ್ಷಿ ಈಗ ಅಡಿಕೆ ಸಸಿಗಳಿಗೆ ಇರುವ ಬೇಡಿಕೆ! (demand)

ಭತ್ತ ಬೆಳೆಯುವ ಗದ್ದೆಗಳನ್ನು ವರ್ಷದಿಂದ ವರ್ಷಕ್ಕೆ ಅಡಿಕೆ ತೋಟವಾಗಿ ಪರಿವರ್ತಿಸಲಾಗುತ್ತಿದೆ. ಇನ್ನೊಂದೆಡೆ ಮೆಕ್ಕೆಜೋಳ ಬೆಳೆಯುವ ಪ್ರದೇಶಗಳಲ್ಲಿ ಕೊಳವೆ ಬಾವಿ ಕೊರೆದು ಅಡಿಕೆಯನ್ನು ಸ್ವಾಗತಿಸಲಾಗುತ್ತಿದೆ. ಇದೆಲ್ಲ ಅಡಿಕೆ ಸಸಿ ಧಾರಣೆ ಹೆಚ್ಚಳಕ್ಕೆ ಕಾರಣವಾಗಿದೆ.

ಇನ್ನೊಂದೆಡೆ ಎಲೆಚುಕ್ಕಿ ರೋಗದಿಂದ ಕಳೆದ ಮೂರಾಲ್ಕು ವರ್ಷಗಳಲ್ಲಿ ಸಾವಿರಾರು ಸಸಿಗಳು ನಾಶವಾಗಿವೆ. ಕೆಲ ತಿಂಗಳ ಹಿಂದೆ ಜಿಲ್ಲೆಯ ವಿವಿಧೆಡೆ ರಭಸವಾದ ಗಾಳಿ, ಮಳೆಗೆ ಸಾವಿರಾರು ಅಡಿಕೆ ಮರಗಳು ಧರೆಗುರುಳಿವೆ. ಇವೆಲ್ಲವಕ್ಕೆ ಪರ್ಯಾಯವಾಗಿ ಗಿಡಗಳನ್ನು ನೆಡಬೇಕಾದುದು ಅನಿವಾರ್ಯ ಆಗಿರುವುದರಿಂದ ಅಡಿಕೆ ಸಸಿಗಳಿಗೆ ಬೇಡಿಕೆ ಹೆಚ್ಚಿದೆ.

ಕಳೆದ ವರ್ಷ ಜಿಲ್ಲೆಯ ಬಹುತೇಕ ಕಡೆಗಳಲ್ಲಿ 30-40 ರೂ.ಗೆ ಅಡಿಕೆ ಸಸಿಗಳನ್ನು ಮಾರಾಟ ಮಾಡಿದ್ದರು. ಈ ವರ್ಷ ಬೆಳೆಗಾರರ ಬಳಿಗೆ ರೈತರು ಆಗಮಿಸಿ 60-70 ರೂ.ಗೆ ಸಸಿ ಖರೀದಿಸುತ್ತಿದ್ದಾರೆ. ಸಸಿಗಳನ್ನು ಸಿದ್ಧಪಡಿಸಿ ಮಾರಾಟ ಮಾಡುವುದನ್ನೇ ದೊಡ್ಡ ವ್ಯವಹಾರ ಮಾಡಿಕೊಂಡಿರುವ ಅನೇಕರು ಹಾಗೂ ಕೆಲವು ನರ್ಸರಿಗಳಲ್ಲಿ ಈಗಾಗಲೇ ಒಂದು ಸಸಿಯ ದರ 100 ರೂಪಾಯಿ ಗಡಿ ದಾಟಿದೆ.

ಕಳೆದೊಂದು ವರ್ಷದಲ್ಲಿ ಆರಕ್ಕೇರದೆ ಮೂರಕ್ಕಿಳಿಯದೆ ತೂಕಡಿಸುತ್ತಿರುವ ಧಾರಣೆಯಿಂದ ಅಡಿಕೆ ದಾಸ್ತಾನು ಇಟ್ಟಿರುವ ಬೆಳೆಗಾರ ಬೇಸತ್ತು ಹೋಗಿದ್ದಾನೆ. ಇದೇ ಸಮಯದಲ್ಲಿ ಅಡಿಕೆ ಸಸಿ ಮಾಡಿರುವ ರೈತ ಹೆಚ್ಚು ಹಣ ಗಳಿಸುತ್ತಿದ್ದಾನೆ. ಹವಾಮಾನ ವೈಪರೀತ್ಯ ಇದೇ ರೀತಿ ಮುಂದುವರಿದರೆ ಮುಂದಿನ ವರ್ಷ ಅಡಿಕೆ ಸಸಿಗಳಿಗೆ ಮತ್ತಷ್ಟು ಡಿಮಾಂಡ್ ಸೃಷ್ಟಿಯಾದರೆ ಆಶ್ಚರ್ಯವಿಲ್ಲ.

ಪಾರಂಪರಿಕವಾಗಿ ಅಡಿಕೆ ಬೆಳೆಯುತ್ತಿದ್ದ ಮಲೆನಾಡು ಮಾತ್ರವಲ್ಲದೆ ಅರೆ ಮಲೆನಾಡು, ಬಯಲುಸೀಮೆ ಪ್ರದೇಶದಲ್ಲೂ ಈಗ ಅಡಿಕೆ ಬೆಳೆ ವಿಸ್ತರಣೆಯಾಗುತ್ತಿದೆ. ಅಷ್ಟೇ ಅಲ್ಲ, ರಾಜಧಾನಿ ಬೆಂಗಳೂರಿನ ಅಕ್ಕಪಕ್ಕದ ಗ್ರಾಮಾಂತರ ಭಾಗಗಳಲ್ಲೂ ಈಗ ಅಡಿಕೆ ಮರಗಳು ನಳನಳಿಸುತ್ತಿವೆ. ನಿರ್ವಹಣೆ ವೆಚ್ಚ ಕಡಿಮೆ. ಅದರಲ್ಲೂ ಮಲೆನಾಡು ಹೊರತುಪಡಿಸಿ ಬೇರೆ ಕಡೆಗಳಲ್ಲಿ ಅಡಿಕೆಗೆ ಎಲೆಚುಕ್ಕಿ, ಕೊಳೆರೋಗ, ಹಳದಿ ರೋಗ ಮುಂತಾದ ಬಾಧೆಗಳೂ ಇಲ್ಲ. ಈ ಕಾರಣದಿಂದ ಅಡಿಕೆ ಬೆಳೆಯುವುದು ಹೆಚ್ಚು ಸೂಕ್ತ ಎಂದು ಅನೇಕರು ಭಾವಿಸುತ್ತಾರೆ. ಇಂಥವರಿಗೆ ನೆನಪಾಗುವುದು ಮಲೆನಾಡಿನ ಅಡಿಕೆ ಸಸಿಗಳು. ಶಿವಮೊಗ್ಗ, ಚಿಕ್ಕಮಗಳೂರು, ಶಿರಸಿ ಮುಂತಾದ ಭಾಗಗಳ ಅಡಿಕೆ ಸಸಿಗಳಿಗೆ ವ್ಯಾಪಕ ಬೇಡಿಕೆಯಿದೆ.

ಅಡಿಕೆ ಗಿಡಗಳನ್ನು ಮಾಡುವುದು ತುಸು ತ್ರಾಸದಾಯಕ, ಸ್ವಲ್ಪ ಹೆಚ್ಚಿನ ಕೆಲಸವೂ ಹೌದು. ಹೆಚ್ಚು ಗೊನೆ ಬರುವ ಉತ್ತಮವಾಗಿ ಬೆಳೆದ ಅಡಿಕೆ ಮರದ ಕಾಯಿಗಳನ್ನು ಸಸಿ ಮಾಡಲು ಬಳಕೆ ಮಾಡಲಾಗುತ್ತದೆ. ಮೊದಲ ಕೊಯ್ಲಿನಲ್ಲಿ ಬೆಳೆದಿರದ ಅಡಕೆ ಗೊನೆಗಳನ್ನು ಇದಕ್ಕೆ ಗುರುತಿಸಲಾಗುತ್ತದೆ. ಏಪ್ರಿಲ್-ಮೇ ತಿಂಗಳಲ್ಲಿ ಆ ಗೊನೆ ಸಂಪೂರ್ಣ ಹಣ್ಣಾದ ಬಳಿಕ ಅಡಿಕೆ ಕಾಯಿಗಳನ್ನು ತಂದು ತೇವಾಂಶ ಇರುವ ಜಾಗದಲ್ಲಿ ಒಂದೆಡೆ ಹಾಕಿ ತೆಳುವಾಗಿ ಮಣ್ಣು ಮುಚ್ಚಲಾಗುತ್ತದೆ. ಆರೇಳು ತಿಂಗಳ ಬಳಿಕ ಈ ಅಡಿಕೆ ಕಾಯಿಗಳು ಮೊಳಕೆಯೊಡೆದ ಬಳಿಕ ಅದನ್ನು ಗೊಬ್ಬರ, ಮಣ್ಣುಮಿಶ್ರಿತವಾದ ಪ್ಲಾಸ್ಟಿಕ್‌ಗಳಲ್ಲಿ ಹಾಕಿ ಬೆಳೆಸಲಾಗುತ್ತದೆ. ನಿಗದಿತ ಸಮಯಕ್ಕೆ ಕಳೆ ತೆಗೆದು, ನೀರುಣಿಸಿ ಸಸಿಗಳನ್ನು ಪೋಷಿಸಲಾಗುತ್ತದೆ. ಸಾವಯವ ಪದ್ಧತಿಯಲ್ಲಿ ಬೆಳೆಸಿದ ಸಸಿಗಳಿಗೆ ಹೆಚ್ಚು ಬೇಡಿಕೆಯಿದೆ.

ಹಲವು ಕೃಷಿ ಹಾಗೂ ತೋಟಗಾರಿಕೆ ಬೆಳೆಗಳಂತೆ ಅಡಿಕೆಯಲ್ಲೂ ವೈವಿಧ್ಯಮಯ ತಳಿಗಳಿವೆ. ದೀರ್ಘಕಾಲ ಫಸಲು ನೀಡುವ ಹೆಚ್ಚು ರೋಗ ನಿರೋಧಕ ಶಕ್ತಿ ಹೊಂದಿರುವ ಕ್ಯಾಸನೂರು ತಳಿ ಬಹುತೇಕ ಪ್ರದೇಶಗಳಿಗೆ ಹೊಂದಿಕೆಯಾಗುತ್ತದೆ. ಮಲೆನಾಡು, ಕರಾವಳಿ, ಅರೆ ಮಲೆನಾಡು ಹಾಗೂ ಬಯಲುಸೀಮೆ ಭಾಗದಲ್ಲಿ ಈ ತಳಿಗಿಂತಲೂ ಹೆಚ್ಚು ಆದಾಯ ನೀಡಬಲ್ಲ ತಳಿ ಮತ್ತೊಂದಿಲ್ಲ ಎಂಬುದು ಅಧ್ಯಯನಗಳಿಂದ ಸಾಬೀತಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ವಿಶ್ವವಿದ್ಯಾಲಯಗಳಲ್ಲೂ ಹಲವು ತಳಿಯ ಅಡಿಕೆ ಸಸಿಗಳನ್ನು ಅಭಿವೃದ್ಧಿಪಡಿಸಿದ್ದಾರೆ. ಮಂಗಳ, ಸುಮಂಗಳ, ಶ್ರೀವರ್ಧನ, ಶ್ರೀಮಂಗಳ್, ಮೋಹಿತ್ ನಗರ, ಸಮೃದ್ಧಿ, ಸ್ವರ್ಣಮಂಗಳ, ಕಾಹಿಕುಚಿ, ಮಧುರ ಮಂಗಳ, ನಲ್‌ಬರಿ , ಶತಮಂಗಳ, ಇವೆಲ್ಲವೂ ಬೇರೆ ದೇಶ ಇಲ್ಲವೇ ರಾಜ್ಯಗಳ ಮೂಲದ ತಳಿಗಳಾಗಿವೆ. ಹಿರೇಹಳ್ಳಿ ಹೆಸರಿನ ತಳಿಯ ಗಿಡಗಳು ಮಂಡ್ಯ, ಹಾಸನ, ಬೆಂಗಳೂರು, ತುಮಕೂರು ಸೇರಿ ನಾನಾ ಜಿಲ್ಲೆಗಳಲ್ಲಿ ಚಾಲ್ತಿಯಲ್ಲಿವೆ.

"

ಕಳೆದ ಎರಡು ವರ್ಷಗಳಿಂದ ಎಲೆಚುಕ್ಕಿ ಹಾಗೂ ಕೊಳೆ ರೋಗದ ಕಾರಣದಿಂದ ನಮ್ಮ ಭಾಗದಲ್ಲಿ ಅಡಿಕೆ ಸಸಿಗಳ ಉತ್ಪಾದನೆ ಹೆಚ್ಚಿನ ಪ್ರಮಾಣದಲ್ಲಿ ಆಗಿರಲಿಲ್ಲ. ಈ ವರ್ಷ ಸಸಿಗಳಿಗೆ ಬೇಡಿಕೆ ಹೆಚ್ಚಾಗಲು ಇದೂ ಒಂದು ಕಾರಣ. ಸಸಿಗಳ ಧಾರಣೆ ಏಕರೂಪವಾಗಿಲ್ಲ. ಒಂದೊಂದು ಭಾಗದಲ್ಲಿ ವಿಪರೀತ ಬೇಡಿಕೆಯಿದೆ. ಸ್ಥಳೀಯವಾಗಿ 70 ರೂ.ಗೆ ಮಾರಾಟವಾಗುತ್ತಿದೆ.

— ಸುನೀಲ್, ಅಡಿಕೆ ಬೆಳೆಗಾರ, ತೀರ್ಥಹಳ್ಳಿ