ಶಿವಮೊಗ್ಗದಲ್ಲಿ ಬುಧವಾರ ಹೋಳಿ ಹಬ್ಬ I holi celebration

ಶಿವಮೊಗ್ಗ: ಸಂಭ್ರಮದ ಹೋಳಿ (holi) ಆಚರಣೆ (celebrate)ಗೆ ಶಿವಮೊಗ್ಗ (shivamogga) ಸಜ್ಜಾಗಿದೆ. ನಗರದ ಕೆಲವೆಡೆ ಮಾ.3ರಂದು ಹೋಳಿ ಆಚರಿಸಿದರೆ, ಹೆಚ್ಚಿನ ಮಂದಿ ಮಾ.4ರಂದು ಬಣ್ಣದೋಕುಳಿ ಆಡಲಿದ್ದಾರೆ.

ನಗರದ ಗಾಂಧಿ ಬಜಾರ್ ಬಸವೇಶ್ವರಸ್ವಾಮಿ ದೇವಸ್ಥಾನ, ತುಳಜಾ ಭವಾನಿ ದೇವಸ್ಥಾನ, ರವಿವರ್ಮ ರಸ್ತೆಯ ರಾಮಮಂದಿರ, ಬಿಬಿ ರಸ್ತೆಯ ಆರ್ಯ ಅಕ್ಷೋಭ್ಯತೀರ್ಥ ಮಠದ ಆವರಣ ಹಾಗೂ ಕುಂಬಾರ ಬೀದಿಯಲ್ಲಿ ಈಗಾಗಲೆ ಕಾಮಣ್ಣನ ಪ್ರತಿಕೃತಿ ಪ್ರತಿಷ್ಠಾಪಿಸಲಾಗಿದೆ. ಈ ಭಾಗದಲ್ಲಿ ವಿಶಿಷ್ಟವಾಗಿ ಹೋಳಿ ಆಚರಿಸಲಾಗುತ್ತಿದೆ.

ಕಳೆದ ಕೆಲ ವರ್ಷಗಳಲ್ಲಿ ಶಿವಮೊಗ್ಗದಲ್ಲಿ ಹೋಳಿಯ ರಂಗು ಹೆಚ್ಚಿದೆ. ಕೇವಲ ಬಣ್ಣ ಎರಚುವ, ಪರಸ್ಪರ ಶುಭಾಶಯ ಕೋರುವ ಬದಲು ಹೋಳಿ ಹಬ್ಬಕ್ಕೆ ಸಾಂಸ್ಕೃತಿಕ ಹಾಗೂ ಧಾರ್ಮಿಕ ರೂಪ ನೀಡಲಾಗುತ್ತಿದೆ. ಇತ್ತೀಚಿನ ವರ್ಷಗಳಲ್ಲಿ ಅನ್ಯ ರಾಜ್ಯದವರು, ಅದರಲ್ಲೂ ವಿಶೇಷವಾಗಿ ಗುಜರಾತ್, ರಾಜಸ್ತಾನ ಮುಂತಾದ ರಾಜ್ಯಗಳ ಜನರು ಇಲ್ಲಿ ವ್ಯಾಪಾರ ವಹಿವಾಟು ನಡೆಸಿಕೊಂಡು ಶಿವಮೊಗ್ಗ ನಗರದಲ್ಲೇ ನೆಲೆ ನಿಂತ ಕಾರಣ ಹೋಳಿ ಹಬ್ಬದ ಸಂಭ್ರಮ ಹೆಚ್ಚಾಗಿರುತ್ತದೆ.

ವಿಶೇಷವಾಗಿ ರಾಜಸ್ತಾನಿ ಸಮುದಾಯದವರು ಸಭಾ ಭವನದಲ್ಲಿ ಹೋಳಿ ಅಂಗವಾಗಿ ಕಾರ್ಯಕ್ರಮ ಆಯೋಜಿಸುತ್ತಾರೆ. ಹೋಳಿಗೂ ಮೂರು ದಿನ ಮುಂಚಿತವಾಗಿ ಸಾಂಸ್ಕೃತಿಕ ಕಾರ್ಯಕ್ರಮ ಆರಂಭವಾಗುತ್ತದೆ. ಪ್ರತಿ ರಾತ್ರಿ ಸಮುದಾಯದವರು ಒಂದೆಡೆ ಸೇರಿ, ಅವರ ಸಂಸ್ಕೃತಿ ಅನಾವರಣಗೊಳಿಸುತ್ತಾರೆ. ಹೋಳಿ ದಿನದಂದು ರಾಜಸ್ತಾನಿ ಹಾಗೂ ಗುಜರಾತಿ ಸಮುದಾಯದವರು ಗಾಂಧಿ ಬಜಾರ್‌ನಲ್ಲಿ ಹೋಳಿಯನ್ನು ಅದ್ಧೂರಿಯಾಗಿ ಆಚರಿಸುತ್ತಾರೆ. ಶಿವಮೊಗ್ಗದ ದುರ್ಗಿಗುಡಿ ಬಡಾವಣೆಯ ದುರ್ಗಮ್ಮ ದೇವಾಲಯದ ರಥೋತ್ಸವ ಮಾ.3ರಂದು ಜರುಗಲಿದೆ. ತೇರು ಎಳೆದ ಬಳಿಕ ಅಲ್ಲಿಯೂ ಓಕುಳಿಯಾಟ ಆರಂಭವಾಗುತ್ತದೆ.

ಈ ವರ್ಷವೂ ಕುಂಬಾರ ಕೇರಿಯಲ್ಲಿ ರತಿ-ಮನ್ಮಥರನ್ನು ಪ್ರತಿಷ್ಠಾಪಿಸಲಾಗಿದೆ. ಬಿಬಿ ರಸ್ತೆಯ ಕೂಡಲಿ ಶ್ರೀ ಆರ್ಯ ಅಕ್ಷೋಭ್ಯತೀರ್ಥ ಮಠದಲ್ಲಿ ಮನ್ಮಥ ಸೇವಾ ಸಮಿತಿಯಿಂದ ರತಿ-ಮನ್ಮಥರನ್ನು ಪ್ರತಿಷ್ಠಾಪಿಸಲಾಗಿದೆ. ಸೋಮವಾರ ಸಂಜೆಯಿಂದಲೇ ಸಾರ್ವಜನಿಕರು ರತಿ-ಮನ್ಮಥರ ಸೊಬಗನ್ನು ಕಣ್ತುಂಬಿಕೊಳ್ಳುತ್ತಿದ್ದಾರೆ. ಈ ಬಾರಿಯೂ ರತಿ-ಮನ್ಮಥರನ್ನು ಆಕರ್ಷಕವಾಗಿ ಕೆತ್ತನೆ ಮಾಡಲಾಗಿದೆ.

ಶಿವಮೊಗ್ಗ ದುರ್ಗಿಗುಡಿ ದುರ್ಗಾಪರಮೇಶ್ವರಿ ದೇವಸ್ಥಾನ ಸಮಿತಿಯಿಂದ ದುರ್ಗಮ್ಮ -ಮರಿಯಮ್ಮ ದೇವಿಯ ರಥೋತ್ಸವ ಮಾ.3ರ ಬೆಳಗ್ಗೆ 9ಕ್ಕೆ ಮೇಷ ಲಗ್ನದಲ್ಲಿ ನೆರವೇರಲಿದೆ. 4ರಂದು ಬೆಳಗ್ಗೆ ಓಕುಳಿ ಕಾರ್ಯಕ್ರಮವಿರುತ್ತದೆ. ನಂತರ ಹೋಳಿ ಸಂಭ್ರಮಾಚರಣೆಗೆ ಚಾಲನೆ ಸಿಗಲಿದೆ.