ಫೆ.6ರಿಂದ ಚಾಮುಂಡೇಶ್ವರಿ ದೇವಿ ಉತ್ಸವ | FAIR

ಕಾರ್ಗಲ್: ಮೈಸೂರು ಅರಸು ಸಂಸ್ಥಾನದ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರಿಂದ ಪ್ರತಿಷ್ಠಾಪಿಸಲ್ಪಟ್ಟ ಶರಾವತಿ ಕಣಿವೆ ಯೋಜನೆಯ ಅಧಿದೇವತೆ ಏಕಶಿಲೆಯ ದ್ವಿಮುಖಿ ಶ್ರೀ ಚಾಮುಂಡೇಶ್ವರಿ ದೇವಿ ವರ್ಧಂತಿಗೆ ಸಿದ್ಧತೆಗಳು ಭರದಿಂದ ಸಾಗಿವೆ.

ಫೆ.6ರಿಂದ 8ರವರೆಗೆ ವಿವಿಧ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ. ಪ್ರತಿದಿನ ಮಧ್ಯಾಹ್ನ ಮತ್ತು ರಾತ್ರಿ ಅನ್ನಸಂತರ್ಪಣೆ ಏರ್ಪಡಿಸಲಾಗಿದೆ. ಉತ್ಸವದಲ್ಲಿ ವಿಶೇಷವಾಗಿ ದೇವಸ್ಥಾನದ ನೂತನ ವಿಮಾನ ಗೋಪುರ ನಿರ್ಮಾಣಕ್ಕೆ ಮೈಸೂರು ರಾಜ ವಂಶಸ್ಥ, ಸಂಸದ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್ ಭೂಮಿಪೂಜೆ ನೆರವೇರಿಸುವರು.

ಚಾಮುಂಡೇಶ್ವರಿ ದೇವಿ ಶರಾವತಿ ಕಣಿವೆಯಲ್ಲಿ ನೆಲೆಗೊಂಡು 60 ವರ್ಷ ಸಮೀಪಿಸುತ್ತಿದೆ. ಇಂತಹ ಅಪರೂಪದ ಕ್ಷಣ ಶಾಶ್ವತವಾಗಿಸಲು ಸಮಿತಿ ಹಾಗೂ ಭಕ್ತರು ಮೈಸೂರು ಚಾಮುಂಡೇಶ್ವರಿ ದೇವಾಲಯದ ಮುಂಭಾಗದ ಮಾದರಿಯಲ್ಲೇ ಸುಮಾರು ಒಂದು ಕೋಟಿ ರೂ. ವೆಚ್ಚದಲ್ಲಿ ನೂತನ ವಿಮಾನ ಗೋಪುರದ ನಿರ್ಮಾಣಕ್ಕೆ ಸಂಕಲ್ಪ ಮಾಡಿದ್ದಾರೆ.

ಇನ್ನು ಮೂರು ವರ್ಷ ಕಳೆದರೆ ದೇವಾಲಯ ನಿರ್ಮಾಣವಾಗಿ 60 ವರ್ಷ ಪೂರ್ಣವಾಗಲಿದೆ. ಹಾಗಾಗಿ ವಿಮಾನ ಗೋಪುರ ನಿರ್ಮಾಣಕ್ಕೆ ನಿರ್ಧರಿಸಿದ್ದೇವೆ. ಮೈಸೂರು ಅರಸು ವಂಶಸ್ಥರಿಂದಲೇ ಶುಭ ಕಾರ್ಯಕ್ಕೆ ಚಾಲನೆ ನೀಡಲಾಗುವುದು ಎಂದು ಶ್ರೀ ಚಾಮುಂಡೇಶ್ವರಿ ದೇವಸ್ಥಾನ ಸಮಿತಿ ಅಧ್ಯಕ್ಷ ಕೃಷ್ಣೇಗೌಡ ತಿಳಿಸಿದರು.