ಬಂಗಾರದ ಆಸೆ ತೋರಿಸಿ 10 ಲಕ್ಷ ರೂ. ವಂಚನೆ | Fake Gold

ಶಿವಮೊಗ್ಗ: ವಿಜಯವಾಡ(Vijayawada)ದಲ್ಲಿ ಟೆಲಿಫೋನ್ ಕೇಬಲ್ ಟ್ರಂಚ್ ಹೊಡೆಯುವಾಗ ಮಡಿಕೆಯಲ್ಲಿ ಮೂರು ಕೆಜಿಯಷ್ಟು ಚಿನ್ನದ ಸರಗಳು ಸಿಕ್ಕಿದ್ದು, ಕಡಿಮೆ ಬೆಲೆ ನೀಡುವುದಾಗಿ ನಂಬಿಸಿದ ಮೂವರು ಶಿವಮೊಗ್ಗದ ಖಾಸಗಿ ಟ್ರಾವೆಲ್ಸ್‌ನ ಮ್ಯಾನೇಜರ್‌ಗೆ ನಕಲಿ ಬಂಗಾರ ನೀಡಿ 10 ಲಕ್ಷ ರೂ. ವಂಚಿಸಲಾಗಿದೆ.

ಶಿವಮೊಗ್ಗದ ಸ್ವಾಮಿ ವಿವೇಕಾನಂದ ಬಡಾವಣೆ (Swami Vivekananda Layout)ನಿವಾಸಿ, ಎನ್‌ಟಿ ರಸ್ತೆಯ ಖಾಸಗಿ ಟ್ರಾವೆಲ್ಸ್‌ನ ಮ್ಯಾನೇಜರ್ ವಂಚನೆಗೆ ಒಳಗಾದವರು. ಖಾಸಗಿ ಟ್ರಾವೆಲ್ಸ್‌(Private Travels)ನ ಬಸ್‌ನಲ್ಲಿ ಈ ಹಿಂದೆ ಕ್ಲೀನರ್ ಆಗಿದ್ದ ಗಣೇಶ್ ಹಾಗೂ ಮತ್ತಿಬ್ಬರು ವಂಚಿಸಿದವರು. 

ಮೇ 10ರಿಂದ 20ರ ನಡುವೆ ಮೂರು ಮೊಬೈಲ್ ನಂಬರ್‌ಗಳಿಂದ ಮ್ಯಾನೇಜರ್‌ಗೆ ಗಣೇಶ್ ಫೋನ್ ಮಾಡಿದ್ದ.  ತಾನು ಈ ಹಿಂದೆ ಅದೇ ಸಂಸ್ಥೆಯ ಬಸ್‌(Bus)ಗಳಲ್ಲಿ ಕೆಲಸ ಮಾಡಿದ್ದಾಗಿ ಪರಿಚಯಿಸಿಕೊಂಡಿದ್ದ. ನಂತರ ವಿಜಯವಾಡದಲ್ಲಿ ಕೇಬಲ್‌ಗೆ ಟ್ರಂಚ್ ಮಾಡುವಾಗ ಮಡಿಕೆ ಸಿಕ್ಕಿದ್ದು, ಅದರಲ್ಲಿ ಮೂರು ಕೆಜಿ ಚಿನ್ನದ ಸರಗಳಿವೆ. ಹಣದ ಅವಶ್ಯಕತೆ ಇರುವುದರಿಂದ ಕಡಿಮೆ ಬೆಲೆಗೆ ಮಾರಾಟ ಮಾಡುವುದಾಗಿ ನಂಬಿಸಿದ್ದ.

ಮೇ20ರಂದು ಶಿವಮೊಗ್ಗದ ಹಳೇ ಮಂಡ್ಲಿ(Old Mandli)ಯ ಖಾಲಿ ಜಾಗದಲ್ಲಿ ಭೇಟಿಯಾಗಿದ್ದ ಗಣೇಶ್ ಹಾಗೂ ಮತ್ತಿಬ್ಬರು ಮ್ಯಾನೇಜರ್‌ಗೆ 2 ಗ್ರಾಂನ ಚಿನ್ನದ ಮಣಿಗಳನ್ನು ಸ್ಯಾಂಪಲ್‌ಗಾಗಿ ನೀಡಿದ್ದರು. ಪರಿಚಯಸ್ಥರ ಬಳಿ ಮ್ಯಾನೇಜರ್ ಪರೀಕ್ಷಿಸಿದಾಗ ಶೇ.92ರಷ್ಟು ಫ್ಯೂರಿಟಿಯಾಗಿತ್ತು. ತದನಂತರ 10 ಲಕ್ಷ ರೂ. ಮಾತ್ರ ಇರುವುದಾಗಿ ಮ್ಯಾನೇಜರ್ ತಿಳಿಸಿದಾಗ 1.5 ಕೆಜಿ ಮಾತ್ರ ಕೊಡುವುದಾಗಿ ಹೇಳಿದ್ದರು.

ಅದರಂತೆ ಹಳೇ ಮಂಡ್ಲಿಯ ಖಾಲಿ ಜಾಗದಲ್ಲಿ ಮ್ಯಾನೇಜರ್(Manager) ತನ್ನಿಬ್ಬರು ಸ್ನೇಹಿತರ ಜತೆ ತೆರಳಿದ್ದು, ನೀಲಿ ಬಣ್ಣದ ಕವರ್‌ನಲ್ಲಿದ್ದ ಬಂಗಾರ ನೀಡಿ ತೆರಳುವಂತೆ ಹೇಳಿದ್ದರು. ಮ್ಯಾನೇಜರ್ ಮತ್ತು ಆತನ ಸ್ನೇಹಿತರು ನೀಲಿ ಕವರ್‌ನಲ್ಲಿದ್ದ ಬಂಗಾರ ಪರೀಕ್ಷಿಸಿದಾಗ ಅವು ನಕಲಿ ಆಗಿದ್ದವು. ತಕ್ಷಣವೇ ಗಣೇಶ್‌ಗೆ ಫೋನ್ ಮಾಡಿದಾಗ ಮೊಬೈಲ್ ಸ್ವಿಚ್‌ಆಫ್ ಆಗಿತ್ತು. ತಾವು ಮೋಸ ಹೋಗಿರುವುದು ಅರಿವಿಗೆ ಬಂದ ಬಳಿಕ ದೊಡ್ಡಪೇಟೆ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.