ಹೇಳಿಕೆ ದಾಖಲಿಸಿದ ಡಾ. ಸಮೀಕ್ಷಾ ರೆಡ್ಡಿ ಪಾಲಕರು | Dr. Sameeksha Reddy

ಶಿವಮೊಗ್ಗ: ತ್ಯಾವರೆಕೊಪ್ಪದ ಹುಲಿ-ಸಿಂಹಧಾಮದಲ್ಲಿ ನೀರಾನೆ ದಾಳಿಗೆ ಮೃತಪಟ್ಟ ತರಬೇತಿನಿರತ ಪಶು ವೈದ್ಯೆ ಡಾ. ಸಮೀಕ್ಷಾ ರೆಡ್ಡಿ(Dr. Sameeksha Reddy) ಪಾಲಕರು ಬುಧವಾರ ತುಂಗಾನಗರ ಠಾಣೆಗೆ ಹಾಜರಾಗಿ ತಮ್ಮ ಹೇಳಿಕೆಗಳನ್ನು ದಾಖಲಿಸಿದರು. 

ಪೊಲೀಸರ ಮನವಿ(Police appeal) ಮೇರೆಗೆ ತಂದೆ ದ್ರುವಕುಮಾರ್ ರೆಡ್ಡಿ, ತಾಯಿ ಶೈಲಜಾ ರೆಡ್ಡಿ ಮತ್ತು ಸೋದವ ಮಾವ ರಾಜಶೇಖರ್ ಅವರು ತುಂಗಾನಗರ ಠಾಣೆಗೆ ಭೇಟಿ ನೀಡಿದ್ದರು. ಸುಮಾರು ಒಂದು ಗಂಟೆಗೂ ಅಧಿಕ ಸಮಯ ದಂಪತಿ ಹೇಳಿಕೆ ನೀಡಿದರು.

ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ತಾಯಿ ಶೈಲಜಾ ರೆಡ್ಡಿ, ಪುತ್ರಿ ಡಾ. ಸಮೀಕ್ಷಾ ರೆಡ್ಡಿ ಸಾವಿನ ದಿನ ನಮಗೆ ಮಾತಾನಾಡುವ ಶಕ್ತಿ ಇರಲಿಲ್ಲ. ಪೊಲೀಸರು ಹೇಳಿಕೆ ತೆಗೆದುಕೊಳ್ಳಲು ಕರೆದಿದ್ದರು. ಪೊಲೀಸರ ಮುಂದೆ ಎಲ್ಲ ಹೇಳಿಕೆಗಳನ್ನು ನೀಡಿದ್ದೇವೆ. ಪೊಲೀಸರು ಉತ್ತಮವಾಗಿ ತನಿಖೆ(Investigation) ಮಾಡುತ್ತಿದ್ದು, ಗೊತ್ತಿಲ್ಲದೇ ಏನು ಮಾತಾಡಬಾರದು ಎಂದರು.

ನನ್ನ ಮಗಳು ಡಾ. ಸಮೀಕ್ಷಾ ರೆಡ್ಡಿ ಸಾವಿಗೆ ನ್ಯಾಯ ಬೇಕಿದೆ ಎಂದು ಶೈಲಜಾ ರೆಡ್ಡಿ ಹೇಳಿದರು. ಮಗಳಂತೂ ಹೋದಳು. ಮರಳಿ ಬರುವುದಿಲ್ಲ. ಇರುವ ಪಶುವೈದ್ಯರಾದರೂ ಧೈರ್ಯವಾಗಿ ಕೆಲಸ ಮಾಡುವ ವಾತವರಣ ಮೃಗಾಲಯಗಳಲ್ಲಿ ಬರಬೇಕು. ಅವರ ಎಸ್‌ಒಪಿ ನಿಯಮಗಳು ಸರಿಯಾಗಿ ಪಾಲನೆಯಾಗಬೇಕು. ಪಶುವೈದ್ಯರಾದ ಮೇಲೆ ಒತ್ತಡ ಇದ್ದೇ ಇರುತ್ತದೆ. ಸಫಾರಿಯಲ್ಲಿನ ಸಮಸ್ಯೆಗಳ ಬಗ್ಗೆ ಮಗಳು ಹೇಳುತ್ತಿದ್ದಳು. ಆಕೆಯನ್ನು ಅಷ್ಟೋತ್ತಲ್ಲಿ ಕರೆಸುವ ಅಗತ್ಯವೇನಿತ್ತು ಎಂದು ಪ್ರಶ್ನಿಸಿದರು. ಯುಗಾದಿ ಹಬ್ಬಕ್ಕೆ ಬಾರದೇ ಕೆಲಸ ಮಾಡಿದ್ದಾಳೆ. ಒಬ್ಬ ತಾಯಿಯಾಗಿ ನನಗೂ ಭಯವಿದೆ. ಇದೇ ರೀತಿ ಬೇರೆ ತಾಯಂದಿರು ಭಯ ಪಡುತ್ತಿದ್ದಾರೆ. ಮುಂದೆ ಈ ರೀತಿ ಯಾರಿಗೂ ಆಗಬಾರದು ಎಂದರು.