ಇ-ಸ್ವತ್ತು ದಾಖಲೆ ನೀಡಲು ವಿಳಂಬ

ಹೊಳೆಹೊನ್ನೂರು: ಪಟ್ಟಣ ಪಂಚಾಯಿತಿ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಜನವಿರೋಧಿ ನೀತಿ ಅನುಸರಿಸುತ್ತಿದ್ದಾರೆ ಎಂದು ಆರೋಪಿಸಿ ಪಟ್ಟಣದ ನಿವಾಸಿಗಳು ಪಪಂ ಕಚೇರಿ ಎದುರು ಮಂಗಳವಾರ ಪ್ರತಿಭಟನೆ ನಡೆಸಿದರು.

ಜನರು ತಮ್ಮ ಆಸ್ತಿ ಹಕ್ಕು ಪಡೆದುಕೊಳ್ಳಲು ಎಲ್ಲ ದಾಖಲೆ ಸಲ್ಲಿಸಿದರೂ ವರ್ಷಗಳಟ್ಟಲೆ ಅಲೆದಾಡಿಸುತ್ತಿದ್ದಾರೆ. ಪಪಂನಲ್ಲಿ ಭ್ರಷ್ಟರು ಸೇರಿಕೊಂಡಿದ್ದಾರೆ. ಸ್ಥಳೀಯ ಕೆಲ ಮುಖಂಡರೊಂದಿಗೆ ಶಾಮೀಲಾಗಿ ಕೆಲವೇ ಜನರ ಕೆಲಸಗಳನ್ನು ಮಾತ್ರ ಮಾಡುತ್ತಿದ್ದಾರೆ. ಸಾರ್ವಜನಿಕರ ಕೆಲಸದ ಬಗ್ಗೆ ಅಸಡ್ಡೆ ತೋರುತ್ತಿದ್ದಾರೆ ಎಂದು ದೂರಿದರು.

ಪಪಂ ವ್ಯಾಪ್ತಿಯ ಗ್ರಾಮಗಳ ಆಸ್ತಿಗಳಿಗೆ ಸಂಬಂಧಿಸಿ ಪಂಚಾಯಿತಿಯಿಂದ ಇ-ಆಸ್ತಿ ದಾಖಲೆ ನೀಡಲು ಸಾಧ್ಯವಾಗುತ್ತಿಲ್ಲ. ಇದಕ್ಕೆ ಅಧಿಕಾರಿ ಹಾಗೂ ಸಿಬ್ಬಂದಿ ಬೇಜವಾಬ್ದಾರಿ ಪ್ರಮುಖ ಕಾರಣ. ಈ ಬಗ್ಗೆ ಮನವಿ ಮಾಡಿದರೂ ವಿನಾಕಾರಣ ವಿಳಂಬ ಮಾಡುತ್ತಿದ್ದಾರೆ ಎಂದು ಆರೋಪಿಸಿದರು.

ಕುಡಿಯುವ ನೀರು, ವಿದ್ಯುತ್ ದೀಪ, ಚರಂಡಿ, ರಸ್ತೆ ಸೇರಿ ಮೂಲ ಸೌಕರ್ಯ ಪಡೆಯುವುದಕ್ಕೂ ಅಲೆದಾಡಬೇಕಾಗಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ಪಪಂ ಕಚೇರಿಗೆ ಬೀಗ ಹಾಕಲು ಮುಂದಾದರು. ಸ್ಥಳಕ್ಕಾಗಮಿಸಿದ ಪೊಲೀಸ್ ಇನ್ಸ್‌ಪೆಕ್ಟರ್ ಶಿವಪ್ರಸಾದ್ ಪ್ರತಿಭಟನಾಕಾರರ ಮನವೊಲಿಸಿ ಪಪಂನಲ್ಲಿ ಸಭೆ ನಡೆಸಿದರು. ಮೂರು ತಿಂಗಳ ಮುಂಚೆ ನೀಡಿದ ಅರ್ಜಿಗಳನ್ನು ಮೊದಲು ಇತ್ಯರ್ಥಗೊಳಿಸಬೇಕು. ನಂತರ ಹಿಂದಿನ ಅರ್ಜಿಗಳ ಬಗ್ಗೆ ಕ್ರಮ ಕೈಗೊಳ್ಳುವಂತೆ ತೀರ್ಮಾನಿಸಲಾಯಿತು.

ಗ್ರಾಪಂ ಮಾಜಿ ಅಧ್ಯಕ್ಷರಾದ ಆರ್.ಉಮೇಶ್, ಎಚ್.ಕೆ.ಶ್ರೀನಿವಾಸ್, ಮಾಜಿ ಉಪಾಧ್ಯಕ್ಷ ಎ.ನಾಗೇಶ್, ಮುಖಂಡರಾದ ಕೆ.ವಿ.ಶಿವಕುಮಾರ್, ದ್ಯಾಮಪ್ಪ, ಬಿ.ಸಂದೇಶ್, ನವೀನ್, ಎಚ್.ಕೆ.ಮಂಜುನಾಥ್, ಕನ್ನಯ್ಯ ಲಾಲ್, ಸಂತೋಷ್ ಲಾಲ್, ಆದಿತ್ಯ, ಜಾವೀದ್, ಕೇಶವ, ಇಮ್ರಾನ್, ಖಲೀಲ್, ಶೇಖರಪ್ಪ, ಬೀರೇಂದ್ರ, ಅಣ್ಣಪ್ಪ ಇತರರಿದ್ದರು.