ಸಾಗರ: ಜೀವ ಪರಿಸರದಲ್ಲಿ ಸಾಕಷ್ಟು ವ್ಯತ್ಯಾಸವನ್ನು ಕಾಣುತ್ತಿದ್ದೇವೆ. ಮನುಷ್ಯ ಪರಿಸರವನ್ನೇ ತಿರುಚಿ ಬದುಕುತ್ತಿದ್ದಾನೆ. ಉಳಿದ ಜೀವಿಗಳು ಬದಲಾದ ಪರಿಸರದಲ್ಲಿ ಹೊಂದಿಕೊಳ್ಳುವ ಪ್ರಯತ್ನ ಮಾಡುತ್ತಿವೆ ಎಂದು ವನ್ಯಜೀವಿ ತಜ್ಞ ಸೇನಾನಿ ಕಳವಳ ವ್ಯಕ್ತಪಡಿಸಿದರು.

ತಾಲೂಕಿನ ಹೆಗ್ಗೋಡಿನ ನೀನಾಸಂ ಆವರಣದಲ್ಲಿ ಗುರುವಾರ ರಂಗಕರ್ಮಿ ಕೆ.ವಿ.ಸುಬ್ಬಣ್ಣ ಸಂಸ್ಮರಣೆ ಅಂಗವಾಗಿ ಆಯೋಜಿಸಿದ್ದ ‘ಕಾಡು-ನಾಡಿನ ಸಂಘರ್ಷ’ ಕುರಿತು ಉಪನ್ಯಾಸ ನೀಡಿದ ಅವರು, ಶೇ.95ರಷ್ಟು ಪರಿಸರ ಬದಲಾವಣೆ ಮನುಷ್ಯನಿಂದಲೇ ನಡೆಯುತ್ತಿದೆ ಎಂದರು.

ನಾನು ಮತ್ತು ಕೃಪಾಕರ್ ಬಹಳ ವರ್ಷಗಳ ಕಾಲ ದಲಿತ ಸಂಘಟನೆ ಮತ್ತು ರೈತ ಸಂಘಟನೆಗಳಲ್ಲಿ ತೊಡಗಿಕೊಂಡಿದ್ದರಿಂದ ಕಾಡು-ನಾಡಿನ ಸಂಘರ್ಷ ಮತ್ತು ಸಮಸ್ಯೆಗಳನ್ನು ಬಹಳ ಹತ್ತಿರದಿಂದ ಗಮನಿಸುತ್ತ ಬಂದಿದ್ದೇನೆ ಎಂದರು.

ಗುಬ್ಬಚ್ಚಿಗಳು ಮಾಯವಾಗುತ್ತಿವೆ. ಕಾಗೆಗಳು ಕಾಣಿಸುತ್ತಿಲ್ಲ. ಮಲೆನಾಡಿನಲ್ಲಿ ಮಂಗಗಳ ಕಾಟ ಹೆಚ್ಚಾಗಿದೆ. ಕಾಡು ಪ್ರಾಣಿಗಳು ನಗರದೊಳಗೆ ನುಗ್ಗುತ್ತವೆ ಎನ್ನುವ ಅನೇಕ ಸಂಗತಿಗಳನ್ನು ಇಂದು ಚರ್ಚೆಯಲ್ಲಿ ತೆರೆದಿಟ್ಟಿದ್ದೀರಿ. ಇದಕ್ಕೆ ಹತ್ತು ಹಲವು ಮುಖಗಳಿವೆ. ಮಲೆನಾಡಿನಲ್ಲಿ ಮನೆಕಟ್ಟುವ ಚಿಂತನೆಗಳು ಬದಲಾದವು. ಹೆಂಚಿನ ಮನೆಯ ಬೊಂಬುಗಳಿಗೆ ತೂಗುಬೀಳುತ್ತಿದ್ದ ಗುಬ್ಬಚ್ಚಿ ಗೂಡುಗಳಿಗೆ ಅವಕಾಶವಾಗದೆ ತಾರಸಿ ಮನೆಗಳು ತೆರೆದುಕೊಂಡವು. ಮನೆಯ ಹಿಂಭಾಗದಲ್ಲಿ ಪಾತ್ರೆ, ಬಟ್ಟೆ ತೊಳೆಯುವ ಸಂಪ್ರದಾಯ ದೂರವಾಗಿ ಎಲ್ಲವೂ ಮನೆಯ ಗೋಡೆಯೊಳಗೆ ನಡೆಯಲು ಆರಂಭವಾಯಿತು ಎಂದರು.

ಸುಲಭವಾಗಿ ಸಿಗುತ್ತಿದ್ದ ಆಹಾರ ಗುಬ್ಬಚ್ಚಿಗಳಿಗೆ ಮಾಯವಾಗಿ ಅವುಗಳು ಬೇರೆದಾರಿ  ಹಿಡಿದವು. ಮನುಷ್ಯ ಭೂಮಿಗೆ ಬಂದು ಸುಮಾರು 3 ಲಕ್ಷ ವರ್ಷಗಳಾದವು. ಮನುಷ್ಯ ಅಸ್ತಿತ್ವಕ್ಕೆ ಬರುವುದರೊಳಗೇ ಆತನಿಗೊಂದು ಸಿದ್ಧ ವೇದಿಕೆ ನಿರ್ಮಾಣವಾಗಿತ್ತು. ಆತ ತಿರುಚಿದ ಬದಲಾವಣೆಗಳಿಂದ ಸಮಸ್ಯೆಗಳನ್ನು ಮೈಮೇಲೆ ಎಳೆದುಕೊಳ್ಳುತ್ತಲೇ ಇದ್ದಾನೆ ಎಂದು ಹೇಳಿದರು.

ಕಾಡುಗಳನ್ನು ನಾವು ಸೃಷ್ಟಿ ಮಾಡುತ್ತೇವೆ ಎಂಬುದು ಬರೀ ಘೋಷಣೆಯಷ್ಟೆ. ಫೋಟೋ ಪೋಸ್‌ಗಾಗಿ ವನಮಹೋತ್ಸವ ಮಾಡುತ್ತೇವೆ. ನಿತ್ಯಹರಿದ್ವರ್ಣದ ಕಾಡುಗಳು ಸೃಷ್ಟಿಯಾಗಲು ನೂರಾರು ವರ್ಷಗಳೇ ಬೇಕಾಗುತ್ತದೆ. ಪರಿಸರವನ್ನು ವೈಜ್ಞಾನಿಕವಾಗಿ ನೋಡುವ ಚಿಂತನೆಯೂ ಮುಖ್ಯ. ಅಭಿವೃದ್ಧಿ ಎನ್ನುವ ಹೆಸರಿನಲ್ಲಿ ಪರಿಸರದ ಮೇಲೆ ಒತ್ತಡ ಹೇರುತ್ತಲೇ ಇದ್ದೇವೆ. ಜೀವನದ ಪದ್ಧತಿ ಬದಲಾಗುತ್ತಲೇ ಇದೆ. ಕಪ್ಪೆಯ ಕೂಗು, ಹಕ್ಕಿಯ ಕೂಗು ಗೊತ್ತೇ ಇಲ್ಲದವರಿಗೆ ಪರಿಸರದ ಸಂಗತಿ ಹೇಳುವುದಾದರೂ ಹೇಗೆ ಎಂದು ಪ್ರಶ್ನಿಸಿದರು.

ವಿಮರ್ಶಕ ಟಿ.ಪಿ.ಅಶೋಕ್ ಮಾತನಾಡಿದರು. ಕೆ.ವಿ.ಅಕ್ಷರ, ಜಶವಂತ ಜಾಧವ್, ಮಾಧವ ಚಿಪ್ಳಿ, ಕೆ.ಜಿ.ಕೃಷ್ಣಮೂರ್ತಿ, ಶೈಲೇಂದ್ರ ಬಂದಗದ್ದೆ, ಎಚ್.ಎಸ್.ನಾಗಭೂಷಣ್, ಸಿದ್ಧಾರ್ಥ್, ಶಿಶಿರ, ಸಂಧ್ಯಾ ಕಾವೇರಿ, ಜಯರಾಮ ಪಾಟೀಲ್, ಅಖಿಲೇಶ್ ಚಿಪ್ಳಿ ಇತರರಿದ್ದರು.