ಪ್ರತಿದಿನ ಲಿಂಗ ಪೂಜೆಯಿಂದ ಮಾನಸಿಕ ನೆಮ್ಮದಿ | charitable lecture

ಭದ್ರಾವತಿ: ನಾವು ಆದರ್ಶ, ತತ್ವ, ಮೌಲ್ಯಗಳು ಹಾಗೂ ಆಚರಣೆಗಳ ಬಗ್ಗೆ ಮಾತನಾಡುತ್ತೇವೆ. ಆದರೆ ಅನುಸರಿಸುವುದಿಲ್ಲ. ಬಸವಾದಿ ಶಿವಶರಣರ ಆದರ್ಶಗಳನ್ನು ಅಳವಡಿಸಿಕೊಂಡಲ್ಲಿ ಮಾತ್ರ ಸಮಾಜದಲ್ಲಿ ಶಾಂತಿ, ನೆಮ್ಮದಿ ಸಾಧ್ಯ ಎಂದು ಚನ್ನಗಿರಿ ಶ್ರೀ ಕೇದಾರ ಶಾಖಾ ಹಿರೇಮಠದ ಶ್ರೀ ಕೇದಾರಲಿಂಗ ಶಿವಶಾಂತವೀರ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.

ಹಳೇ ನಗರದ ಶ್ರೀ ವೀರಭದ್ರೇಶ್ವರ ಸಮುದಾಯ ಭವನದಲ್ಲಿ ತಾಲೂಕು ಶರಣ ಸಾಹಿತ್ಯ ಪರಿಷತ್‌ನಿಂದ ಏರ್ಪಡಿಸಿದ್ದ 674ನೇ ವಚನ ಮಂಟಪದಲ್ಲಿ ಮಾದಮ್ಮ ಮತ್ತು ಲಿಂ.ಬನ್ನಿಹಟ್ಟಿ ಹಾಲಪ್ಪ ಮಹಾದೇವಪ್ಪ ದತ್ತಿ ಉಪನ್ಯಾಸ ಕಾರ್ಯಕ್ರಮದ ಸಾನ್ನಿಧ್ಯವಹಿಸಿ  ಆಶೀರ್ವಚನ ನೀಡಿದರು.

ಕೃಷಿ-ಋಷಿ, ಸಂತ-ಮಹಾತ್ಮರ ಸಂಸ್ಕೃತಿಯ ಹರಿಕಾರರಾದ ನಾವು ಸರಳ, ಸಾತ್ವಿಕ ಬದುಕು ಕಂಡುಕೊಳ್ಳಬೇಕು. ವೀರಶೈವ ಲಿಂಗಾಯಿತ ಎಂಬುದು ಬೇರೆ ಬೇರೆ ಅಲ್ಲ. ಸಮಾಜದಲ್ಲಿ ಉಂಟಾಗುವ ಗೊಂದಲಗಳ ಬಗ್ಗೆ ಎಚ್ಚರವಹಿಸಬೇಕು. ಎಲ್ಲರೂ ಕಡ್ಡಾಯವಾಗಿ ಲಿಂಗ ಧರಿಸಿ ಪ್ರತಿದಿನ ಪೂಜಿಸಬೇಕು. ಅಷ್ಟಾಚಾರ, ಷಟಸ್ಥಳ, ಲಿಂಗಾಚಾರಗಳನ್ನು ಪಾಲಿಸಿ ಎಂದು ಸಲಹೆ ನೀಡಿದರು.

ಶಿವಮೊಗ್ಗ ಜಿಎಸ್‌ಎಸ್ ಪ್ರತಿಷ್ಠಾನದ ಅಧ್ಯಕ್ಷೆ ಪ್ರೊ. ಕಿರಣ್ ದೇಸಾಯಿ ಮಾತನಾಡಿ, ಆದರ್ಶದ ಜೀವನ ಎಂದು ಹೇಳುವುದು ಸುಲಭ, ಆಚರಣೆ ಕಷ್ಟ. ಆದರೆ ಮೌಲ್ಯ ಎಂಬುದು ಜೀವನ ಪೂರ್ತಿ ಕಾಪಾಡಿಕೊಂಡು ನಡೆಯುವಂಥದ್ದು. ವರ್ಷಗಳ ಅಂಕಿ ಸಂಖ್ಯೆಗಳು ಬದಲಾಯಿತು. ಆದರೆ ಜೀವನದ ಆದರ್ಶಗಳು ಬದಲಾಗಲಿಲ್ಲ. ಮಹಿಳೆಯರನ್ನು ಎರಡನೇ ನಾಗರಿಕರಂತೆ ನೋಡುತ್ತಿರುವ ಸಮಯದಲ್ಲಿ ಶಿವಶರಣೆಯರು ಬದುಕಿಗೆ ಉನ್ನತ ಮೌಲ್ಯಗಳನ್ನು ತಂದುಕೊಟ್ಟರು.

ಹೊನ್ನಾಳಿ ಸರ್ಕಾರಿ ಪ್ರಥಮದರ್ಜೆ ಕಾಲೇಜಿನ ಪ್ರಾಚಾರ್ಯ ಡಾ. ಬಿ.ಜಿ.ಧನಂಜಯ ಮಾತನಾಡಿ, ವಚನ ಮಂಟಪ ನಿರ್ಮಾಣದಲ್ಲಿ ಶರಣರಿಗಿಂತ ಶರಣೆಯರ ಕೊಡುಗೆ ಹಾಗೂ ಚನ್ನಬಸವಣ್ಣ ಅವರ ಪಾತ್ರ ಅತಿ ಹೆಚ್ಚಿನದು. ಇವರು ಜನರ ಬೌದ್ಧಿಕ ಬೆಳವಣಿಗೆಗೆ ಕಾರಣರಾದರು ಎಂದು ತಿಳಿಸಿದರು.

ಹೆಬ್ಬಂಡಿ ಶಿವರುದ್ರಪ್ಪ ಕಾರ್ಯಕ್ರಮ ಉದ್ಘಾಟಿಸಿದರು. ಕತ್ತಲಗೆರೆ ತಿಮ್ಮಪ್ಪ, ದತ್ತಿ ದಾನಿ ಎಂ.ಮನು ಉಪಸ್ಥಿತರಿದ್ದರು.