ಬ್ಯಾಂಕ್ ಮಹಿಳಾ ಉದ್ಯೋಗಿಗೆ 2.62 ಲಕ್ಷ ರೂ. ವಂಚನೆ

ಶಿವಮೊಗ್ಗ: ಅಧಿಕ ಲಾಭಾಂಶದ ಆಸೆ ತೋರಿಸಿ ಬ್ಯಾಂಕ್ ಮಹಿಳಾ ಉದ್ಯೋಗಿ ಸೇರಿ ಐವರಿಗೆ 2.62 ಲಕ್ಷ ರೂ. ವಂಚಿಸಲಾಗಿದೆ.

ಸಾಗರ ಗಾಂಧಿನಗರದ ನಿವಾಸಿ, 23 ವರ್ಷದ ಉದ್ಯೋಗಿ ಮತ್ತು ಆಕೆಯ ನಾಲ್ವರು ಸ್ನೇಹಿತರು ವಂಚನೆಗೆ ಒಳಗಾದವರು. ಅ.9ರಂದು ಮೊಬೈಲ್‌ನಲ್ಲಿ ಬ್ಯಾಂಕ್ ಉದ್ಯೋಗಿ ಟೆಲಿಗ್ರಾಂ ನೋಡುತ್ತಿದ್ದಾಗ ವರ್ಕ್ ಆನ್‌ಲೈನ್ ಗ್ರೂಪ್‌ಗೆ ಜಾಯಿನ್ ಆಗುವಂತೆ ಸಂದೇಶಗಳು ಬಂದಿದ್ದು, ಟ್ರೇಡಿಂಗ್ ಇರಬೇಕು ಎಂದು ಒಂದು ವಾರ ವಾಚ್ ಮಾಡಿದ್ದರು. ಆನಂತರ ಕಳುಹಿಸಿದ್ದ ಟಾಸ್ಕ್‌ಲಿಂಕ್ ಕ್ಲಿಕ್ ಮಾಡುತ್ತಿದ್ದಂತೆ ಹೋಟೆಲ್ ರಿವ್ಯೆವ್ ಮಾಡಲು ವಂಚಕರು ತಿಳಿಸಿದ್ದರು.

ರಿವ್ಯೆವ್ ಮಾಡಬೇಕಾದರೆ ಒಂದು ಸಾವಿರ ರೂ. ಯುಪಿಐ ಐಡಿಗೆ ಹಾಕಬೇಕೆಂದು ಸೂಚಿಸಿದ್ದರು. ಅದರಂತೆ ಒಂದು ಸಾವಿರಕ್ಕೆ 200 ರೂ. ಲಾಂಭಾಂಶ ನೀಡಿದ್ದರು. ಬಳಿಕ 3 ಸಾವಿರ ರೂ.ಗೆ 2100 ರೂ. ಲಾಭಾಂಶ ತೋರಿಸಿದ್ದರು. ಅ.17ರಂದು ಎಚ್.ಆರ್.ದೇವಿಕಾ ಶರ್ಮಾ ಎಂಬುವರು ಫೋನ್ ಮಾಡಿ ಕಾಯಿನ್ ಖರೀದಿಸಿದರೆ ಹೆಚ್ಚಿನ ಲಾಭಾಂಶ ಸಿಗುವುದಾಗಿ ನಂಬಿಸಿದ್ದರು.

ಬ್ಯಾಂಕ್ ಉದ್ಯೋಗಿ ತನ್ನ ಬ್ಯಾಂಕ್ ಖಾತೆ, ಸ್ನೇಹಿತರ ಬ್ಯಾಂಕ್ ಖಾತೆಯಿಂದ 2,62,650 ರೂ. ಹಾಕಿದ್ದರು. ಐಡಿಯ ಪ್ರೊಫೈಲ್‌ನಲ್ಲಿ ಲಾಭಾಂಶ 4,29,225 ರೂ. ಇರುವಂತೆ ತೋರಿಸಿದ್ದರು. ಬ್ಯಾಂಕ್ ಉದ್ಯೋಗಿ ಹಣ ವಿತ್‌ಡ್ರಾ ಮಾಡಿಕೊಳ್ಳಲು ಹೋದಾಗ ಅಸಲಿಯತ್ತು ಬಯಲಾಗಿದೆ. ಈ ಬಗ್ಗೆ ಉದ್ಯೋಗಿ ಶಿವಮೊಗ್ಗ ಸೈಬರ್ ಠಾಣೆಗೆ ದೂರು ನೀಡಿದ್ದಾರೆ.