ಸ್ಕೀಮ್‌ ಆಸೆ ತೋರಿಸಿ 3 ಕೋಟಿ ರೂ. ವಂಚಿಸಿದ್ದ ಆರೋಪಿ ಬಂಧನ | Scheme fraud

ಶಿವಮೊಗ್ಗ: ಸ್ಕೀಮ್‌(Scheme)ನ ಆಸೆ ತೋರಿಸಿ ಪ್ರತಿ ಕಾರ್ಡ್‌ಗೆ ಕಮೀಷನ್ ನೀಡುವುದಾಗಿ ನಂಬಿಸಿ ಸುಮಾರು 1960ಕ್ಕೂ ಅಧಿಕ ಜನರಿಗೆ ಬರೋಬ್ಬರಿ 3 ಕೋಟಿ ರೂ. ವಂಚಿಸಿದ್ದ ಪ್ರಕರಣದಲ್ಲಿ ಅಯಾನ್ ಗ್ರೂಪ್‌(Ayan Group)ನ ಮಾಲೀಕನನ್ನು ಹೊಸನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಅಯಾನ್ ಗ್ರೂಪ್‌ನ ಮಾಲೀಕ, ಉಡುಪಿಯ ಅಬ್ದುಲ್ ರಜಾಕ್ (47) ಬಂಧಿತ ಆರೋಪಿ. ಈತನ ವಿರುದ್ಧ ಹೊಸನಗರದ ನಿಖಿಲ್ ಎಂಬುವರು ಪೊಲೀಸರಿಗೆ ದೂರು ಕೊಟ್ಟಿದ್ದರು. ಅಬ್ದುಲ್ ರಜಾಕ್ ಮತ್ತು ಶೇಕ್ ಮಹಮ್ಮದ್ ಫಜಲ್ ಎಂಬುವರು ಅಯಾನ್ ಗ್ರೂಪ್‌ನ ಪಾಲುದಾರರಾಗಿದ್ದು, ಸ್ನೇಹಿತ ನಿಖಿಲ್‌ಗೆ ಸ್ಕೀಮ್‌ಗಳ ಆಸೆ ತೋರಿಸಿದ್ದರು. 13, 16 ಮತ್ತು 21 ತಿಂಗಳ ಸ್ಕೀಮ್‌ಗಳಿದ್ದು, ಪ್ರತಿ ತಿಂಗಳು ಸಾವಿರ ರೂ.ನಂತೆ ಸಾರ್ವಜನಿಕರಿಂದ ವಂತಿಗೆ ಪಡೆದು ಸ್ಕೀಮ್‌ನ ಮಧ್ಯದಲ್ಲಿ ಆಕರ್ಷಕ ಬಹುಮಾನ(Attractive prize) ಹಾಗೂ ಸ್ಕೀಮ್ ಮುಗಿದ ಬಳಿಕ ಸಮಾಧಾನಕರ ಬಹುಮಾನ ನೀಡುವುದಾಗಿ ನಂಬಿಸಿದ್ದರು. ಅಲ್ಲದೆ, ಪ್ರತಿ ಕಾರ್ಡ್‌ಗೆ 300 ರೂ. ಕಮೀಷನ್ ನೀಡುವುದಾಗಿ ಹೇಳಿದ್ದರು.

ಆರೋಪಿಗಳ ಮಾತು ನಂಬಿದ್ದ ನಿಖಿಲ್ 2023ನೇ ಸಾಲಿನ ಮೇ ತಿಂಗಳಿಂದ ಇಲ್ಲಿವರೆಗೆ ಒಟ್ಟು 150 ಕಾರ್ಡ್‌ದಾರರನ್ನು ಸಂಪರ್ಕಿಸಿ ಪ್ರತಿ ತಿಂಗಳ ಕಂತಿನ 24 ಲಕ್ಷ ರೂ. ಅನ್ನು ನೇರವಾಗಿ ಅಬ್ದುಲ್ ರಜಾಕ್ ಮತ್ತು ಶೇಕ್ ಮಹಮ್ಮದ್ ಫಜಲ್ ಅವರಿಗೆ ಹಂತ ಹಂತವಾಗಿ ಫೋನ್ ಪೇ(Phone Pay) ಮಾಡಿಸಿದ್ದರು. 2025ರ ಮೇ 4ರಂದು ಸ್ಕೀಮ್ ಮುಕ್ತಾಯವಾಗಿತ್ತು. ಆದರೆ ಸ್ಕೀಮ್‌ನಲ್ಲಿ ಹೇಳಿದಂತೆ ಯಾವುದೇ ಗೃಹೋಪಯೋಗಿ ವಸ್ತು(Household item) ಅಥವಾ ನಗದು ಹಣವನ್ನು ನೀಡರಲಿಲ್ಲ. ಈ ಬಗ್ಗೆ ನಿಖಿಲ್ ಹಲವು ಬಾರಿ ಪ್ರಶ್ನಿಸಿದ್ದರೂ ಅವರಿಂದ ಸಕಾರಾತ್ಮಕ ಉತ್ತರ ಬಂದಿರಲಿಲ್ಲ. ಇದೇ ವೇಳೆ ಇತರೆ ಏಳೆಂಟು ಏಜೆಂಟರ ಮೂಲಕವೂ ಆರೋಪಿಗಳಿಬ್ಬರೂ ಹಣ ಸಂಗ್ರಹ ಮಾಡಿರುವುದು ಬೆಳಕಿಗೆ ಬಂದಿದೆ.

ಸುಮಾರು 1960ಕ್ಕೂ ಅಧಿಕ ಜನರಿಗೆ ಮೋಸ, ನಂಬಿಕೆ ದ್ರೋಹ, ವಂಚನೆ ಮಾಡಿರುವ ಅಬ್ದುಲ್ ರಜಾಕ್ ಮತ್ತು ಶೇಕ್ ಮಹಮ್ಮದ್ ಫಜಲ್ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಂಡು 3 ಕೋಟಿ ರೂ. ಹಿಂದಿರುಗಿಸಿಕೊಡಿಸಬೇಕಾಗಿ ನಿಖಿಲ್ ಮತ್ತಿತರರು ದೂರು ನೀಡಿದ್ದರು. ಈ ಬಗ್ಗೆ ಹೊಸನಗರ ಪಿಎಸ್‌ಐ ಮತ್ತು ಸಿಬ್ಬಂದಿಗಳ ತಂಡ ತನಿಖೆ ಕೈಗೊಂಡು ಪ್ರಕರಣದ ಆರೋಪಿ ಅಬ್ದುಲ್ ರಜಾಕ್‌ನನ್ನು ಬಂಧಿಸಿ ನ್ಯಾಯಾಲಯದ ಮುಂದೆ ಹಾಜರುಪಡಿಸಿದೆ.