2.68 ಲಕ್ಷ ಟ್ರಾಫಿಕ್ ಕೇಸ್ ಬಾಕಿ | Traffic violation

ಶಿವಮೊಗ್ಗ ಜಿಲ್ಲಾದ್ಯಂತ ಅತ್ಯಾಧುನಿಕ ನೂರಾರು ಸಿಸಿ ಕ್ಯಾಮರಾಗಳನ್ನು ಅಳವಡಿಸುವ ಮೂಲಕ ಸಂಚಾರ ನಿಯಮ ಉಲ್ಲಂಘನೆ(Traffic violation) ಪ್ರಕರಣಗಳ ಮೇಲೆ ಖಾಕಿ ಪಡೆ ಕಣ್ಗಾವಲಿಟ್ಟಿದೆ. ವಾಹನಗಳ ಸವಾರರಿಗೆ ನಿರಂತರವಾಗಿ ದಂಡದ ಬಿಸಿ ಮುಟ್ಟಿಸುತ್ತಿದೆ. ಐಟಿಎಂಎಸ್(ಇಂಟಿಗ್ರೇಟೆಡ್ ಟ್ರಾಫಿಕ್ ಮ್ಯಾನೇಜ್‌ಮೆಂಟ್ ಸಿಸ್ಟಂ) ಕೇಸ್‌ಗಳಿಗೆ ಈ-ಚಲನ್ ಮೂಲಕ ದಂಡ ಪಾವತಿಗೆ ರಿಯಾಯಿತಿಯನ್ನೂ ನೀಡುತ್ತಿದೆ. ಆದರೂ ಸಂಚಾರ ನಿಯಮ ಉಲ್ಲಂಘನೆ ಪ್ರಕರಣಗಳು ಕರಗುತ್ತಿಲ್ಲ.

ಜಿಲ್ಲೆಯಲ್ಲಿ ಪ್ರತಿನಿತ್ಯ ಲಕ್ಷಾಂತರ ವಾಹನಗಳ ಸಂಚಾರವಿದ್ದು, ಐಟಿಎಂಎಸ್(ITMS) ಮೂಲಕ ಸೇರಿ ನಿತ್ಯವೂ ಸರಾಸರಿ 200ರಿಂದ 300 ಸಂಚಾರ ನಿಯಮ ಉಲ್ಲಂಘನೆ ಪ್ರಕರಣಗಳು ದಾಖಲಾಗುತ್ತಿವೆ. ಶಿವಮೊಗ್ಗ ಮತ್ತು ಭದ್ರಾವತಿಯ ಸಂಚಾರ ಠಾಣೆ(Shivamogga and Bhadravati Traffic police station)ಗಳು, ಸಮೀಪದ ಪೊಲೀಸ್ ಠಾಣೆಗಳ ಜತೆಗೆ ಸ್ಥಳದಲ್ಲೇ ದಂಡ ಪಾವತಿಗೆ ಅವಕಾಶ ಕಲ್ಪಿಸಿದ ಹೊರತಾಗಿ ಇನ್ನೂ 2.68 ಲಕ್ಷಕ್ಕೂ ಅಧಿಕ ಪ್ರಕರಣಗಳಲ್ಲಿ ದಂಡ ಪಾವತಿ ಬಾಕಿ ಇವೆ.

ಸಂಚಾರ ಪೊಲೀಸರು ವಾಹನಗಳ ಸವಾರರಿಗೆ ದಂಡ ಪಾವತಿ ಬಗ್ಗೆ ನಿರಂತರ ಜಾಗೃತಿ ಮೂಡಿಸುತ್ತಿದ್ದಾರೆ. ಮನೆ ಬಾಗಿಲಿಗೆ ಅಥವಾ ಮೊಬೈಲ್ ನಂಬರ್ ಮೂಲಕ ನೋಟಿಸ್ ರವಾನೆಯಾಗುತ್ತಿದೆ. ಕಸ ವಿಲೇವಾರಿ ವಾಹನಗಳ ಮೂಲಕವೂ ಅರಿವು ಮೂಡಿಸಲಾಗುತ್ತಿದೆ. ಅಲ್ಲದೆ, ರಾಜ್ಯ ಸರ್ಕಾರ ಈಗಾಗಲೇ ಮೂರು ಬಾರಿ ಶೇ.50ರಷ್ಟು ರಿಯಾಯಿತಿ(50% discount) ಮೂಲಕ ದಂಡ ಪಾವತಿಗೂ ಅವಕಾಶ ಕಲ್ಪಿಸುತ್ತಿದೆ. ಆದರೂ ಸವಾರರ ಸಂಚಾರ ನಿಯಮ ಉಲ್ಲಂಘನೆಯ ಲಕ್ಷಾಂತರ ಪ್ರಕರಣಗಳಲ್ಲಿ ದಂಡ ಪಾವತಿಗೆ ವಾಹನ ಸವಾರರು ಮೀನಾಮೇಷ ಎಣಿಸುತ್ತಿದ್ದಾರೆ.

1.27 ಕೊಟಿ ರೂ. ದಂಡ ಸಂಗ್ರಹ !: ಪೊಲೀಸ್ ಠಾಣೆಗಳನ್ನು ಹೊರತುಪಡಿಸಿ ಪ್ರಮುಖ ವೃತ್ತ, ರಸ್ತೆಗಳಲ್ಲಿ ಪಿಎಸ್‌ಐ, ಎಎಸ್‌ಐ, ಮೇಲ್ಪಟ್ಟ ಅಧಿಕಾರಿಗಳು ಪ್ರತಿನಿತ್ಯವೂ ದಂಡ ಸಂಗ್ರಹ ಮಾಡುತ್ತಿದ್ದಾರೆ. ಈ ನಡುವೆ ಸರ್ಕಾರದ ಆದೇಶದ ಮೇರೆಗೆ ಬಾಕಿ ಇದ್ದ ಇ-ಚಲನ್ (E-challan)ದಂಡದ ಮೊತ್ತಕ್ಕೆ ಜೂ.21ರಿಂದ ಜು.10ರವರೆಗೆ ಶೇ.50ರಷ್ಟು ರಿಯಾಯಿತಿ ನೀಡಲಾಗಿತ್ತು. 20 ದಿನದಲ್ಲಿ 30,218 ಇ-ಚಲನ್ ಪ್ರಕರಣಗಳಲ್ಲಿ 1,27,95,250 ರೂ. ದಂಡವನ್ನು ಸವಾರರು ಪಾವತಿಸಿದ್ದಾರೆ.

ವಾಹನ ಸವಾರರಿಂದ ಉತ್ತಮ ಸ್ಪಂದನೆ: ಸಂಚಾರ ನಿಯಮ ಉಲ್ಲಂಘನೆ ಬಾಕಿ ಪ್ರಕರಣಗಳ ಸಂಖ್ಯೆ ದಿನದಿಂದ ದಿನಕ್ಕೆ ಏರಿಕೆ ಆಗುತ್ತಿರುವುದನ್ನು ಮನಗಂಡ ರಾಜ್ಯ ಸರ್ಕಾರ(State Government) ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ಉದ್ದೇಶದಿಂದ ಕ್ಷಮಾದಾನ ಯೋಜನೆಯಡಿ ಈಗಾಗಲೇ ಮೂರು ಬಾರಿ ದಂಡದ ಮೊತ್ತದಲ್ಲಿ ಶೇ.50ರಷ್ಟು ರಿಯಾಯಿತಿ ಘೋಷಿಸಿದೆ. ಬಾಕಿ ಪ್ರಕರಣಗಳ ಇತ್ಯರ್ಥ, ನ್ಯಾಯಾಲಯಗಳ ಮೇಲಿನ ವ್ಯಾಜ್ಯಗಳ ಒತ್ತಡ ಕಡಿಮೆ ಮಾಡುವುದು, ಸಂಚಾರ ಶಿಸ್ತು ಸುಧಾರಿಸುವುದು ಹಾಗೂ ಸರ್ಕಾರದ ಆದಾಯ ಹೆಚ್ಚಿಸುವುದು ಯೋಜನೆ ಪ್ರಮುಖ ಉದ್ದೇಶವಾಗಿದ್ದು, ಸಂಚಾರ ಪೊಲೀಸರ ಮನವಿಗೆ ಸಾರ್ವಜನಿಕರಿಂದಲೂ ಉತ್ತಮ ಸ್ಪಂದನೆ ದೊರೆತಿದೆ.

ಐಟಿಎಂಎಸ್ ಮೂಲಕ ಕಠಿಣ ನಿಯಮಗಳನ್ನು ಜಾರಿಗೊಳಿಸಿದ್ದು, 100ಕ್ಕೂ ಅಧಿಕ ಅತ್ಯಾಧುನಿಕ ಸಿಸಿ ಕ್ಯಾಮರಾ(CCTV camera)ಗಳನ್ನು ಅಳವಡಿಸಲಾಗಿದೆ. ಇದು ಪೊಲೀಸ್ ಇಲಾಖೆಗೆ ವರವಾಗಿದೆ. ಸಿಗ್ನಲ್‌ಗಳಲ್ಲೇ 72 ಕ್ಯಾಮರಾ, ಅತಿ ವೇಗವಾಗಿ ಸಂಚರಿಸುವ ವಾಹನಗಳ ಪತ್ತೆಗೆ 30 ಕ್ಯಾಮರಾ, ವಾಹನಗಳ ನೋಂದಣಿ ಸಂಖ್ಯೆ ಗುರುತಿಸಲು 44 ಕ್ಯಾಮರಾಗಳಿವೆ. 360 ಡಿಗ್ರಿ ಸುತ್ತಲಿನ ದೃಶ್ಯಾವಳಿ ಸೆರೆಹಿಡಿಯುವ ಸ್ಮಾರ್ಟ್ ಪೋಲ್‌(Smart Poll)ಗಳು ಒಎಫ್‌ಸಿ ನೆಟ್‌ವರ್ಕ್ ಮೂಲಕ ಸ್ಮಾರ್ಟ್‌ಸಿಟಿ ಕಚೇರಿಯ ಕಮ್ಯಾಂಡ್ ಕಂಟ್ರೋಲ್ ಸೆಂಟರ್‌(Command Control Center)ಗೆ ಸಂಚಾರ ನಿಯಮ ಉಲ್ಲಂಘನೆಯ ದೃಶ್ಯಾವಳಿ ಸೆರೆಹಿಡಿದು ರವಾನಿಸುತ್ತಿವೆ. ಐಟಿಎಂಎಸ್ ತಂತ್ರಾಂಶದಲ್ಲಿ ನೋಟಿಸ್ ಸೃಜನೆ ಮಾಡಲಾಗುತ್ತಿದ್ದು ಫೋಟೊ ಸಹಿತ ನೋಟಿಸ್ ಸವಾರರ ಮನೆಗೆ ರವಾನೆ ಆಗುತ್ತಿದೆ. 

ದಂಡ ಪಾವತಿಗೆ ಗ್ರಾಮೀಣರಿಗಿಂತ ನಗರದ ನಿವಾಸಿಗಳಿಂದಲೇ ಅಧಿಕ ಸ್ಪಂದನೆ ದೊರೆಯುತ್ತಿದೆ. ಮೊದಲು ಮನೆಗೆ ನೋಟಿಸ್ ಕಳುಹಿಸಿದರೂ ದಂಡ ಪಾವತಿಸುತ್ತಿರಲಿಲ್ಲ. ಈಗ ಸವಾರರೇ ಪೊಲೀಸರನ್ನು ಹುಡುಕಿಕೊಂಡು ಬಂದು ದಂಡ ಕಟ್ಟುತ್ತಿದ್ದಾರೆ. ಪೊಲೀಸ್ ಠಾಣೆಗೆ ತೆರಳಿ ದಂಡದ ಮೊತ್ತ ಪರಿಶೀಲಿಸಿ ಪಾವತಿಸುತ್ತಿರುವುದು ವಿಶೇಷ. ಇದೇ ಮೊದಲ ಬಾರಿಗೆ ಆನ್‌ಲೈನ್(Online) ಮೂಲಕವೇ 3ರಿಂದ 4 ಸಾವಿರ ಪ್ರಕರಣಗಳು ಇತ್ಯರ್ಥಗೊಂಡಿವೆ ಎನ್ನುತ್ತಾರೆ ಶಿವಮೊಗ್ಗ ಸಂಚಾರ ವೃತ್ತದ ಪೊಲೀಸ್ ಇನ್‌ಸ್ಪೆಕ್ಟರ್ ಟಿ.ವಿ.ದೇವರಾಜ್.

ವರ್ಷ	ಅವಧಿ	ಪ್ರಕರಣ ಇತ್ಯರ್ಥ	ದಂಡ ಸಂಗ್ರಹ
2023	ಫೆ.2ರಿಂದ 11	29,226	2,99,06,250 ರೂ.
2025	ಆ.23ರಿಂದ ಸೆ.9	26,973	1,09,96,250 ರೂ.
2026	ಜೂ.21ರಿಂದ ಜು.10	30,218	1,27,95,250 ರೂ.

"

ಐಟಿಎಂಎಸ್ ಮೂಲಕ ಆಟೋಮೆಟಿಕ್ ಆಗಿ ಜನರೇಟ್ ಆಗುವ ಕೇಸ್‌ಗಳಿಗೆ ಈ-ಚಲನ್ ಮೂಲಕ ಶೇ.50ರಷ್ಟು ರಿಯಾಯಿತಿಯಲ್ಲಿ ದಂಡ ಸಂಗ್ರಹ ಮಾಡುತ್ತಿದ್ದು, ವಿಶೇಷ ಅಭಿಯಾನಕ್ಕೆ ಸಾರ್ವಜನಿಕರು ಸ್ಪಂದನೆ ವ್ಯಕ್ತವಾಗಿದೆ. ವಾಹನ ಸವಾರರು ಸಂಚಾರ ನಿಯಮ ಕಟ್ಟುನಿಟ್ಟಾಗಿ ಪಾಲಿಸಿ ಸುರಕ್ಷಿತ ಹಾಗೂ ಶಿಸ್ತುಬದ್ಧ ಸಂಚಾರ ವ್ಯವಸ್ಥೆ ನಿರ್ಮಿಸಲು ಪೊಲೀಸ್ ಇಲಾಖೆಯೊಂದಿಗೆ ಸಹಕರಿಸಬೇಕಿದೆ.

— ಬಿ.ನಿಖಿಲ್, ಶಿವಮೊಗ್ಗ ಎಸ್‌ಪಿ