ಉಪ್ಪಿನಂಗಡಿಗೆ ಧೂಳು ಕಂಟಕ! : ಸರ್ವೀಸ್ ರಸ್ತೆ ಗುಂಡಿಗಳಿಂದ ಸಮಸ್ಯೆ ಉಲ್ಬಣ : ಜನತೆ ಹೈರಾಣ

ವಿಜಯವಾಣಿ ಸುದ್ದಿಜಾಲ ಉಪ್ಪಿನಂಗಡಿ

ಹೆದ್ದಾರಿ ಚತುಷ್ಪಥ ಕಾಮಗಾರಿಯಿಂದಾಗಿ ಸಮಸ್ಯೆಗೆ ಸಿಲುಕುತ್ತಿರುವ ಉಪ್ಪಿನಂಗಡಿ ಪೇಟೆಯಲ್ಲಿ ಬಿಸಿಲಿನ ವಾತಾವರಣ ಕಂಡರೆ ಸಾಕು ಪರಿಸರವಿಡೀ ಧೂಳುಮಯವಾಗುತ್ತಿದೆ. ಇದರಿಂದಾಗಿ ಜನರಿಗೆ ಆರೋಗ್ಯ ಸಮಸ್ಯೆ ಭೀತಿ ಎದುರಾಗಿದೆ.

ಉಪ್ಪಿನಂಗಡಿಯಲ್ಲಿ ಚತುಷ್ಪಥ ರಸ್ತೆಯಲ್ಲಿ ಎತ್ತರಿಸಿದ ರಸ್ತೆ ನಿರ್ಮಿಸಲಾಗಿದ್ದು, ಅದರ ಪಾರ್ಶ್ವದಲ್ಲಿ ಸರ್ವೀಸ್ ರಸ್ತೆಗಳನ್ನು ನಿರ್ಮಿಸಲಾಗಿದೆ. ಈ ಸರ್ವೀಸ್ ರಸ್ತೆಯ ಅಲ್ಲಲ್ಲಿ ಗುಂಡಿಗಳಿದ್ದು, ಅದನ್ನು ಮುಚ್ಚುವ ಸಲುವಾಗಿ ಜಲ್ಲಿ ಹುಡಿ ಹಾಕಲಾಗುತ್ತಿದೆ. ಆದರೆ ಹಾಕಲಾದ ಜಲ್ಲಿ ಹುಡಿಯು ಬಿಸಿಲಾವರಿಸಿದಾಕ್ಷಣ ಒಣಗಿ ಭಾರಿ ವಾಹನಗಳ ಸಂಚಾರದ ಸಮಯದಲ್ಲಿ ಧೂಳೆಬ್ಬಿಸುತ್ತಿದ್ದು, ಇದರಿಂದಾಗಿ ಪರಿಸರದಲ್ಲಿನ ಅಂಗಡಿ ಮುಂಗಟ್ಟುಗಳ ಜನ ಗಾಳಿಯೊಂದಿಗೆ ಧೂಳನ್ನೂ ಸೇವಿಸುವ ಸ್ಥಿತಿ ಉಂಟಾಗಿದೆ. ಹಲವರು ಆರೋಗ್ಯ ಸಂಬಂಧಿ ಸಮಸ್ಯೆಗೆ ಸಿಲುಕಿದ್ದು, ವ್ಯವಸ್ಥೆಯ ಲೋಪದಿಂದಾಗಿ ನಾವೆಲ್ಲಾ ಅನಾರೋಗ್ಯಪೀಡಿತರಾಗುವ ಸ್ಥಿತಿ ಉದ್ಭವಿಸಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸರ್ವೀಸ್ ರಸ್ತೆಯನ್ನು ನಿಯಮಾನುಸಾರ ಕಾಂಕ್ರೀಟ್ ರಸ್ತೆಯನ್ನಾಗಿಸುವ ಮೂಲಕ ಈ ಭಾಗದ ಧೂಳಿನ ಸಮಸ್ಯೆ ಬಗೆಹರಿಸಬಹುದು.

ಹೆದ್ದಾರಿ ಸಂಪರ್ಕ ರಸ್ತೆಯಲ್ಲೂ ಗುಂಡಿ: ಉಪ್ಪಿನಂಗಡಿಯಲ್ಲಿ ನೇತ್ರಾವತಿ ಸೇತುವೆಯಿಂದ ಹೆದ್ದಾರಿ ಸಂಪರ್ಕದ ರಸ್ತೆಯಲ್ಲೂ ಹಲವಾರು ಗುಂಡಿಗಳು ನಿರ್ಮಾಣವಾಗಿದ್ದು, ಎಲ್ಲೆಡೆಯಿಂದಲೂ ಧೂಳು ಪಸರಿಸಿ ಉಪ್ಪಿನಂಗಡಿ ಪೇಟೆಗೆ ಸಂಕಷ್ಟ ಎದುರಾದಂತಿದೆ. ನೇತ್ರಾವತಿ ಸೇತುವೆಯಿಂದ ಹೆದ್ದಾರಿ ಸಂಪರ್ಕ ರಸ್ತೆಯ ಡಾಂಬರೀಕರಣಕ್ಕಾಗಿ ಪುತ್ತೂರು ಶಾಸಕರು 10 ಲಕ್ಷ ರೂ. ಅನುದಾನ ಒದಗಿಸಿ ಕಳೆದ ಮೇ ತಿಂಗಳಲ್ಲಿ ಶಿಲಾನ್ಯಾಸ ನೆರವೇರಿಸಿದ್ದರೂ ಬಳಿಕ ಸುರಿದ ಸತತ ಮಳೆಯಿಂದಾಗಿ ಕಾಮಗಾರಿ ನಡೆಸಲಾಗಿಲ್ಲ. ಇನ್ನಾದರೂ ಈ ಭಾಗದಲ್ಲಿ ಡಾಂಬರೀಕರಣ ಕಾಮಗಾರಿ ನಡೆಸಿ ಸುಗಮ ಸಂಚಾರಕ್ಕೆ ಅನುವು ಮತ್ತು ಧೂಳಿನ ಸಮಸ್ಯೆ ನಿವಾರಣೆಗೆ ಗಮನಹರಿಸಬೇಕಾಗಿದೆ.

https://www.vijayavani.net/yakshagana-training-innagarshan

https://www.vijayavani.net/district-level-pu-section-kabaddi-in-sullia