ಮಿಲಿಟರಿ ಮದ್ಯದ ಹೆಸರಲ್ಲಿ ಕಳಪೆ ಲಿಕ್ಕರ್​ ಮಾರಾಟ:ಎಂಟು ತಿಂಗಳಲ್ಲಿ 6,835 ಲೀ. ಜಪ್ತಿ

ಬೆಂಗಳೂರು: ರಾಜ್ಯದಲ್ಲಿ ಅಕ್ರಮವಾಗಿ ಮಿಲಿಟರಿ ಮದ್ಯ ಮಾರಾಟ ದಂಧೆ ಜೋರಾಗಿದೆ. ಅಬಕಾರಿ ಇಲಾಖೆ ಅಧಿಕಾರಿಗಳ ಕಾರ್ಯಾಚರಣೆಯಲ್ಲಿ 8 ತಿಂಗಳಲ್ಲಿ 6,835 ಲೀ. ಡಿಫೆನ್ಸ್​ ಮದ್ಯ ಜಪ್ತಿ ಮಾಡಲಾಗಿದೆ. ಬೆಳಗಾವಿ ವಿಭಾಗದಲ್ಲೇ ಅತಿ ಹೆಚ್ಚು 5,746 ಲೀ. ಮದ್ಯ ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ.

ನಿವೃತ್ತ ಮಿಲಿಟರಿ ಸೈನಿಕರಿಗೆ 4, ವೃತ್ತಿಯಲ್ಲಿರುವವರಿಗೆ 5 ಹಾಗೂ ಕರ್ನಲ್​, ಕಮಾಂಡರ್​ ಸೇರಿ ಇತರ ರ್ಯಾಂಕಿಂಗ್​ ಆಧಾರಿತ ಅಧಿಕಾರಿಗಳಿಗೆ ತಿಂಗಳಿಗೆ ಇಂತಿಷ್ಟು ಮದ್ಯವನ್ನು ರಕ್ಷಣಾ ಇಲಾಖೆ ನಿಗದಿಪಡಿಸಿದೆ. ಕ್ಯಾಂಟೀನ್​ ಸ್ಟೋರ್​ ಡಿಪಾರ್ಟ್​ಮೆಂಟ್​(ಸಿಎಸ್​ಡಿ)ನಲ್ಲಿ ಇವರಿಗೆ ಬ್ರಾಂಡೆಂಡ್ ಮದ್ಯಕ್ಕೆ ಶೇ.60ರವರೆಗೆ ರಿಯಾಯಿತಿ ಸಿಗಲಿದೆ. ಮಿಲಿಟರಿ ಸಿಬ್ಬಂದಿ ಗುರುತಿನ ಚೀಟಿ ತೋರಿಸುವ ಮೂಲಕ ಡಿಸ್ಕೌಂಟ್​ ದರದಲ್ಲಿ ಡಿಫೆನ್ಸ್​ ಮದ್ಯ ಖರೀದಿಸಲು ಅವಕಾಶವಿದೆ. ಮದ್ಯ ಸೇವನೆ ಮಾಡದವರೂ ಖರೀದಿಸಿ ಬೇರೆಯವರಿಗೆ ನೀಡುತ್ತಾರೆ. ಇಂಥವರು ಡಿಫೆನ್ಸ್​ ಮದ್ಯ ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಮಿಲಿಟರಿ ಕೋಟಾ ದುರ್ಬಳಕೆ ಮಾಡಿಕೊಂಡು ಕೆಲ ದಂಧೆಕೋರರು ಕಡಿಮೆ ಮೊತ್ತದ ಮದ್ಯವನ್ನು ಬ್ರಾಂಡೆಂಡ್​ ಬಾಟಲಿಗೆ ತುಂಬಿ ಮಿಲಿಟರಿ ಎಣ್ಣೆಯೆಂದು ಮಾರಾಟ ಮಾಡುತ್ತಿರುವುದು ಕಂಡುಬಂದಿದೆ. ಸಿಎಸ್​ಡಿಯಲ್ಲಿ 10 ಸಾವಿರ ರೂ. ಮೌಲ್ಯದ ಡಿಫೆನ್ಸ್​ ಮದ್ಯದ ಬಾಟಲಿಗೆ 4 ಸಾವಿರ ರೂ.ಗೆ ಮಿಲಿಟರಿ ಸಿಬ್ಬಂದಿಗೆ ನೀಡಲಾಗುತ್ತದೆ. ಅದೇ ಬಾಟಲ್​ ಅನ್ನು ಹೊರಗಡೆ ತಂದು 5-7 ಸಾವಿರ ರೂ.ನಂತೆ ಮಾರಾಟ ಮಾಡಲಾಗುತ್ತಿದೆ. ನಗರದಲ್ಲಿ ನಡೆಯುತ್ತಿದ್ದ ಈ ದಂಧೆ ಗ್ರಾಮೀಣ ಭಾಗದ ಸಣ್ಣ-ಪುಟ್ಟ ಅಂಗಡಿಗಳಿಗೂ ವಿಸ್ತರಣೆಯಾಗಿದೆ.

ನಶೆಯಲ್ಲಿ ಗ್ರಾಮಗಳು: ರಾಜ್ಯದ 25 ಸಾವಿರ ಹಳ್ಳಿಗಳು ಅಕ್ರಮ ಮದ್ಯದ ನಶೆಯಲ್ಲಿ ತೇಲಾಡುತ್ತಿವೆ. ಕಿರಾಣಿ ಅಂಗಡಿ, ಮನೆಗಳು ಹಾಗೂ ಮಾಂಸಾಹಾರಿ ಹೋಟೆಲ್​ಗಳಲ್ಲಿ ಪರವಾನಗಿ ಇಲ್ಲದೆ ಮಾರಾಟ ಮಾಡಲಾಗುತ್ತಿದೆ. ಈ ಮಾರಾಟದಿಂದಲೇ ಪ್ರತಿ ವರ್ಷ ಅಂದಾಜು 4 ಸಾವಿರ ಕೋಟಿ ರೂ. ಆದಾಯ ಸರ್ಕಾರದ ಬೊಕ್ಕಸಕ್ಕೆ ಹರಿದು ಬಂದಿದೆ. ಪ್ರತಿ ವರ್ಷ ಸಾವಿರಾರು ಅಕ್ರಮ ಮದ್ಯ ಮಾರಾಟ ಪ್ರಕರಣಗಳು ದಾಖಲಾದರೂ ಇಲಾಖೆ ಕಠಿಣ ಕ್ರಮ ಕೈಗೊಳ್ಳುತ್ತಿಲ್ಲ. ನಾಮ್​ ಕೇ ವಾಸ್ತೆ ಎಂಬಂತೆ ಅಧಿಕಾರಿಗಳು ಕೇಸ್​ ದಾಖಲಿಸಿ ಲಂಚ ಪಡೆದು ಸುಮ್ಮನಾಗುತ್ತಾರೆ.

ನಕಲಿ ಮದ್ಯ ದಂಧೆ ಜೋರು: ಚೀಪ್​ ಲಿಕ್ಕರ್​ ಅನ್ನು ದುಬಾರಿ ಬಾಟಲಿಗೆ ತುಂಬಿ ಬ್ರಾ$್ಯಂಡೆಡ್​ ಮದ್ಯವೆಂದು ನಂಬಿಸಿ ಮಾರಾಟ ಮಾಡಲಾಗುತ್ತಿದೆ. ಕೆಲ ಮದ್ಯದಂಗಡಿ ಮಾಲೀಕರು, ಮುಂಬೈ ಸೇರಿ ಇತರ ನಗರಗಳಲ್ಲಿ 300 ರೂ.ಗೆ ಸಿಗುವ ಪುಲ್​ ಬಾಟಲ್​ ತಂದು ದುಬಾರಿ ಬೆಲೆಯ ಖಾಲಿ ಬಾಟಲ್​ಗಳಿಗೆ ತುಂಬಿಸಿ ಮಾರಾಟ ಮಾಡುತ್ತಿದ್ದಾರೆ. ಈ ದಂಧೆಯಿಂದ ಮಾಲೀಕರು ಲಾಂತರ ರೂ.ಹಣ ಮಾಡಿಕೊಳ್ಳುತ್ತಿದ್ದಾರೆ. 2024ರ ಜು.1ರಿಂದ 2025ರ ಜ.25ರವರೆಗೆ 818 ಲೀ. ನಕಲಿ ಮದ್ಯ ವಶಪಡಿಸಿಕೊಳ್ಳಲಾಗಿದೆ.

2.03 ಲಕ್ಷ ಲೀಟರ್​ ವಶ: ರಾಜ್ಯದಲ್ಲಿ 2024ರ ಜು.1ರಿಂದ 2025ರ ಜ.25ರವರೆಗೆ ಅಕ್ರಮವಾಗಿ ಮಾರಾಟ ಮಾಡುತ್ತಿದ್ದ 2,03,599 ಲೀ.ಮದ್ಯ, 2,45,829 ಲೀ. ಬಿಯರ್​ ಮತ್ತು 3,09,446 ಲೀ.ವೈನ್​ ವಶಪಡಿಸಿಕೊಳ್ಳಲಾಗಿದೆ. ಜತೆಗೆ, ಕರ್ನಾಟಕದಲ್ಲಿ ಮಾರಾಟಕ್ಕೆ ಅನುಮತಿ ಇಲ್ಲದ 14,850 ಲೀ.ಮದ್ಯ ವಶಕ್ಕೆ ಪಡೆಯಲಾಗಿದೆ. ಗೋವಾ ಸೇರಿ ಇತರ ರಾಜ್ಯಗಳ ಮದ್ಯ ಮಾರಾಟವನ್ನು ರಾಜ್ಯದಲ್ಲಿ ನಿಷೇಧಿಸಲಾಗಿದೆ. ಆದರೂ, ಅಂತಾರಾಜ್ಯ ಜಾಲ ಹೊರ ರಾಜ್ಯಗಳ ಮದ್ಯವನ್ನು ರಾಜ್ಯಕ್ಕೆ ಅಡ್ಡದಾರಿಯಲ್ಲಿ ಸಾಗಿಸುತ್ತಿದೆ. ಖಾಸಗಿ ವಾಹನ, ಬೋಟ್​, ದೋಣಿ ಹಾಗೂ ಯಾಂತ್ರೀಕೃತ ಬೋಟ್​ಗಳ ಮೂಲಕ ಸಾಗಣೆ ಮಾಡಿ ಮಾರಾಟ ಮಾಡಲಾಗುತ್ತಿದೆ. ಪೊಲೀಸ್​, ಕರಾವಳಿ ಕಾವಲು ಪಡೆ ಕಣ್ತಪ್ಪಿಸಿ ಮದ್ಯ ನುಸುಳುತ್ತಲೇ ಇರುವುದು ನಡೆಯುತ್ತಿದೆ.

ಡಿಫೆನ್ಸ್​ ಮದ್ಯ ವಶದ ವಿವರ

ವಿಭಾಗ            ಮದ್ಯ(ಲೀ.ಗಳಲ್ಲಿ)

ಬೆಳಗಾವಿ             5,746

ಬೆಂಗಳೂರು ದಕ್ಷಿಣ 488

ಬೆಂಗಳೂರು ಉತ್ತರ 392

ಮೈಸೂರು               81

ಬೆಂ.ಗ್ರಾಮಾಂತರ    49

ಹೊಸಪೇಟೆ              24

ಕಲಬುರಗಿ               30

https://www.vijayavani.net/strong-opposition-to-premium-far-policy-request-to-the-government-to-revise-it