ಬೆಳಗಾವಿ: ಬೆಳಗಾವಿ ಜಿಲ್ಲಾ ಪೊಲೀಸರು ಭರ್ಜರಿ ಕಾರ್ಯಾಚರಣೆ ನಡೆಸಿದ್ದು, ಕಳ್ಳತನವಾಗಿದ್ದ 8 ಕೋಟಿ 58 ಲಕ್ಷ 23 ಸಾವಿರದ 999 ರೂ. ಮೌಲ್ಯದ ವಸ್ತುಗಳನ್ನು ಜಪ್ತಿ ಮಾಡಿದ್ದಾರೆ.
2020 - 2021ನೇ ಸಾಲಿನಲ್ಲಿ ಬೆಳಗಾವಿ ಜಿಲ್ಲೆಯಲ್ಲಿ ಕಳ್ಳತನವಾಗಿದ್ದ ವಸ್ತುಗಳು ಇವಾಗಿವೆ. ಅಂತರರಾಜ್ಯ ಕಳ್ಳರನ್ನು ಬಂಧಿಸಿರುವ ಪೊಲೀಸರು, ಒಟ್ಟು 206 ಪ್ರಕರಣ ಪತ್ತೆ ಹಚ್ಚಿದ್ದಾರೆ. 3 ಕೆಜಿ 38 ಗ್ರಾಂ ಚಿನ್ನಾಭರಣ, 18 ಕೆಜಿ 156 ಗ್ರಾಂ ಬೆಳ್ಳಿ ಆಭರಣಗಳು ಇವೆ. ಉಳಿದಂತೆ, 1 ಕೋಟಿ 21 ಲಕ್ಷ 2 ಸಾವಿರದ 450 ರೂಪಾಯಿ ನಗದು ವಶಪಡಿಸಿಕೊಳ್ಳಲಾಗಿದೆ.
ಇಷ್ಟೇ ಅಲ್ಲದೇ ದರೋಡೆಕೋರರಿಂದ 168 ಬೈಕ್, 32 ವಾಹನ ಸೇರಿ ವಿವಿಧ ಉಪಕರಣಗಳನ್ನು ಜಪ್ತಿ ಮಾಡಲಾಗಿದೆ.
ಬೆಳಗಾವಿ ಎಸ್ಪಿ ಲಕ್ಷ್ಮಣ್ ನಿಂಬರಗಿ ನೇತೃತ್ವದಲ್ಲಿ ವಾರಸುದಾರರಿಗೆ ವಸ್ತುಗಳ ಮರುಸಂದಾಯವಾಗಿದೆ. ಕಳುವಾಗಿದ್ದ ವಸ್ತು ಮರಳಿ ಸಿಗುವುದೇ ಇಲ್ಲ ಎಂದುಕೊಂಡಿದ್ದ ಜನರು ತಮ್ಮ ವಸ್ತುಗಳು ವಾಪಸಾದುದಕ್ಕೆ ಕುಣಿದು ಕುಪ್ಪಳಿಸಿದ್ದಾರೆ.
