ಇಲ್ಲಿ ವಾಸವಿರುವವರ ಬಳಿ ನಾಲ್ಕು ಚಕ್ರಗಳ ವಾಹನ ಇದ್ದರೂ ಸಂಚಾರ ಅಸಾಧ್ಯ ಎನಿಸಿದ್ದರಿಂದ ಮಾರಾಟ ಮಾಡಿದ್ದಾರೆ. ಸ್ಥಳೀಯ ನಿವಾಸಿಯೊಬ್ಬರು ಹೋಲೋ ಬ್ಲಾಕ್ ಉದ್ಯಮ ಆರಂಭಿಸಿದರೂ ಸಾಮಗ್ರಿ ತರಲು ಮತ್ತು ಸಾಗಾಟ ಮಾಡಲು ವಾಹನಗಳು ಬರಲು ಅಸಾಧ್ಯವಾದ ಹಿನ್ನೆಲೆ ಉದ್ಯಮ ಬಂದ್ ಮಾಡಿದ್ದಾರೆ. ಇಲ್ಲಿನವರ ಜೀವನಕ್ಕೆ ಕೃಷಿಯೇ ಆಧಾರ, ಆದರೆ ಕೃಷಿ ವಸ್ತುಗಳು, ಪರಿಕರ ಸಾಗಾಟ ಸಾಧ್ಯವಾಗದೆ ಕಂಗೆಟ್ಟಿದ್ದಾರೆ. ಕೆಲವರಲ್ಲಿ ದ್ವಿಚಕ್ರ ವಾಹನ ಇದೆಯಾದರೂ ಜೀವ ಕೈಯಲ್ಲಿ ಹಿಡಿದು ಸಾಗಬೇಕಿದೆ. ಹಲವು ವರ್ಷಗಳ ಹಿಂದೆ ಇಲ್ಲಿ ಕಾಲುದಾರಿ ಇದ್ದು, ಸ್ಥಳೀಯರೇ ರಸ್ತೆಯ ರೂಪ ನೀಡಿದ್ದರು. ಆದರೆ ಜನಪ್ರತಿನಿಧಿಗಳ ಕೃಪಕಟಾಕ್ಷ ಇಲ್ಲದ ಕಾರಣ ಈ ರಸ್ತೆ ಅಭಿವೃದ್ಧಿಯೇ ಆಗಿಲ್ಲ. ಬೇಸಗೆಯಲ್ಲಿ ರಸ್ತೆ ಚರಳು ಕಲ್ಲಿನಿಂದಾವೃತ್ತವಾದರೆ, ಮಳೆಗಾಲದಲ್ಲಿ ಚರಂಡಿಯಂತಾಗುತ್ತದೆ. ಜನಪ್ರತಿನಿಧಿಗಳ ಬಳಿ ಮಾಡಿದ ಮನವಿ ಪ್ರಯೋಜನವಾಗದೆ ಸ್ಥಳೀಯರು ಕಂಗೆಟ್ಟಿದ್ದಾರೆ.
