ಕವಣಾಪುರ ಅಡ್ಡರಸ್ತೆಯಿಂದ ಹೊಸದೊಡ್ಡಿ ನಂಜಾಪುರ ದೊಡ್ಡನಹಳ್ಳಿಗೆ ರಸ್ತೆ ಸಂಪರ್ಕ ಕಲ್ಪಿಸುವುದರಿಂದ ಕಾಡನಕುಪ್ಪೆ-ಕವಣಾಪುರ ಮಾರ್ಗದಿಂದ ಬರುವ ರಾಮನಗರ ಹಾಗೂ ಚನ್ನಪಟ್ಟಣದ ಖಾಸಗಿ ಶಾಲಾ ವಾಹನಗಳು ಇದೇ ಮಾರ್ಗದಲ್ಲಿ ಸಂಚರಿಸುತ್ತವೆ. ಆದರೆ, ರಸ್ತೆಯಲ್ಲಿನ ಗುಂಡಿಗಳು ಶಾಲಾ ಬಸ್ಗಳ ಓಡಾಟಕ್ಕೂ ಸಮಸ್ಯೆ ತಂದೊಡ್ಡಿವೆ. ಅಲ್ಲದೆ ರಾಮನಗರ ತಾಲೂಕಿನ ಕಾಡನಕುಪ್ಪೆ, ಹೊಸದೊಡ್ಡಿ, ಚನ್ನಪಟ್ಟಣ ತಾಲೂಕಿನ ಅರಳಾಳುಸಂದ್ರ, ಭೂಹಳ್ಳಿ, ಮೆಣಸಿಗನಹಳ್ಳಿ, ದೊಡ್ಡನಹಳ್ಳಿ, ಮಲ್ಲಂಗೆರೆ, ವಿಠಲೇನಹಳ್ಳಿ ರೈತರು, ಸಾರ್ವಜನಿಕರು, ವಿದ್ಯಾರ್ಥಿಗಳು ಜಿಲ್ಲಾ ಕೇಂದ್ರ, ಮಾರುಕಟ್ಟೆ ಹಾಗೂ ಶಾಲೆಗಳಿಗೆ ಹೋಗಲು ಹತ್ತಿರದ ರಸ್ತೆ ಎಂದು ಹೆಚ್ಚಾಗಿ ಈ ಮಾರ್ಗವನ್ನೇ ಬಳಸುತ್ತಾರೆ. ಜತೆಗೆ ಪ್ರಸಿದ್ಧ ಪ್ರವಾಸಿ ತಾಣ ಅವ್ವೇರಹಳ್ಳಿ ರೇವಣಸಿದ್ದೇಶ್ವರ ಬೆಟ್ಟಕ್ಕೆ, ಕಬ್ಬಾಳು ದೇವಾಲಯದಿಂದ ಕೈಲಾಂಚ ಕನಕಪುರ ರಸ್ತೆಗೆ ಬರುವವರು, ಕನಕಪುರ ರಸ್ತೆಗೆ ಸಂಪರ್ಕ ಪಡೆಯುವವರು, ಚನ್ನಪಟ್ಟಣ ತಾಲೂಕಿನಿಂದ ಕಾಡನಕುಪ್ಪೆ ಭಾಗದಿಂದ ಕೈಲಾಂಚ ಹೋಬಳಿ ಕೇಂದ್ರಕ್ಕೆ ಹೋಗುವವರು ಹೆಚ್ಚಾಗಿ ಇದೇ ದಾರಿಯಲ್ಲಿ ಸಂಚರಿಸುತ್ತಾರೆ.
