ಬೇಲೂರು ಪಟ್ಟಣದಿಂದ ಸಿಂಗಾಪುರ-ಮರೂರು, ಗೆಂಡೇಹಳ್ಳಿ-ಮೂಡಿಗೆರೆ, ಆಲ್ದೂರು ಮೂಲಕ ಬಾಳೆಹೊನ್ನೂರು-ರಂಭಾಪುರಿ ಪೀಠ, ಶೃಂಗೇರಿಯಂತಹ ಪ್ರವಾಸಿ ತಾಣಗಳಿಗೆ ರಾಜ್ಯದ ಬೆಂಗಳೂರು, ಮೈಸೂರು ಸೇರಿದಂತೆ ವಿವಿಧ ಭಾಗಗಳಿಂದ ಮೊಬೈಲ್ ರೂಟ್ ಮ್ಯಾಪ್ ಬಳಸಿ ಇದೇ ರಸ್ತೆ ಮೂಲಕ ದಿನನಿತ್ಯ ನೂರಾರು ವಾಹನಗಳಲ್ಲಿ ಸಾವಿರಾರು ಪ್ರವಾಸಿಗರು ಸಂಚರಿಸುತ್ತಾರೆ. ಅಲ್ಲದೆ ಸಮೀಪದ ಸಾಮಿಲ್ಗಳಿಗೆ ಮರ ತುಂಬಿಕೊಂಡು ಬರುವ ಭಾರಿ ತೂಕದ ಲಾರಿಗಳು ಯಗಚಿ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ಮುಖ್ಯರಸ್ತೆಯ ಸೇತುವೆಯ ಮೇಲೆಯೇ ಸಂಚರಿಸಬೇಕಿದೆ. ಆದರೆ ಈಗಾಗಲೇ ಸೇತುವೆಗೆ ಹೊಂದಿಕೊಂಡಂತಿರುವ ರಸ್ತೆ ಪಕ್ಕದಲ್ಲಿ ಒಂದು ಬದಿ ಕೆಲ ದಿನಗಳಿಂದ ಬರುತ್ತಿರುವ ಮಳೆಗೆ ಶಿಥಿಲವಾಗಿ ಕುಸಿಯಲಾರಂಭಿಸಿದೆ.
