ಗ್ರಂಥಪಾಲಕ ಹುದ್ದೆಗೆ ಗ್ರಹಣ

ಕುಂಬಳೆ: ಹೊಸ ಶೈಕ್ಷಣಿಕ ವರ್ಷ ಆರಂಭವಾಗುತ್ತಿದ್ದಂತೆ ಶಿಕ್ಷಣ ಇಲಾಖೆ ಹಾಗೂ ಸರ್ಕಾರ ಶಾಲಾ ಗ್ರಂಥಾಲಯಗಳನ್ನು ಮರೆತಿದೆ. ಎಲ್ಲ ಶಾಲೆಗಳಲ್ಲಿ ದಕ್ಷ ಗ್ರಂಥಾಲಯಗಳು ಮತ್ತು ಗ್ರಂಥಪಾಲಕರ ಅಗತ್ಯ ಕಡತದಲ್ಲಿ ಬಾಕಿಯಿದೆ.

ರಾಜ್ಯದ ಸಾರ್ವಜನಿಕ ಶಾಲೆಗಳು ಓದಿನ ಮಹತ್ವವನ್ನು ಅರಿತು ಗ್ರಂಥಪಾಲಕರನ್ನು ನೇಮಿಸದಿರುವುದು ಇದಕ್ಕೆ ಕಾರಣ. 2015ರಲ್ಲಿ ಉಮ್ಮನ್ ಚಾಂಡಿ ಮುಖ್ಯಮಂತ್ರಿಯಾಗಿದ್ದಾಗ ಸರ್ಕಾರಿ ಶಾಲೆಗಳಲ್ಲಿ ಗ್ರಂಥಪಾಲಕರ ಹುದ್ದೆ ಸೃಷ್ಟಿಸಿ ಆದೇಶ ಹೊರಡಿಸಲಾಗಿತ್ತು. ಆದರೆ, ಪಿಣರಾಯಿ ಸರ್ಕಾರ ಆದೇಶವನ್ನು ಸ್ಥಗಿತಗೊಳಿಸಿದ್ದರ ವಿರುದ್ಧ ಅಭ್ಯರ್ಥಿಗಳು ನ್ಯಾಯಾಲಯದ ಮೆಟ್ಟಿಲೇರಿದ್ದು, ಅನುಕೂಲಕರ ಆದೇಶವನ್ನು ಪಡೆದುಕೊಂಡಿದ್ದರು.

ಆದರೆ, ಆದೇಶ ಜಾರಿಯಾಗದ ಹಿನ್ನೆಲೆಯಲ್ಲಿ ಅಭ್ಯರ್ಥಿಗಳು ಸಲ್ಲಿಸಿರುವ ನ್ಯಾಯಾಂಗ ನಿಂದನೆ ಪ್ರಕರಣ ಇನ್ನೂ ನ್ಯಾಯಾಲಯದಲ್ಲಿ ವಿಚಾರಣೆ ಹಂತದಲ್ಲಿದೆ. ಗ್ರಂಥಪಾಲಕ ಹುದ್ದೆ ನೇಮಕಾತಿಗೆ ಆರ್ಥಿಕ ಮುಗ್ಗಟ್ಟು ಉಂಟಾಗಿರುವುದು ಸರ್ಕಾರ ನೇಮಕಾತಿ ಮಾಡದಿರುವುದಕ್ಕೆ ಕಾರಣ ಎನ್ನಲಾಗಿದೆ.

ಶಾಲಾ ಗ್ರಂಥಾಲಯಗಳು ಧೂಳು ಹಿಡಿಯುತ್ತಿವೆ. ಸರ್ಕಾರದ ಅಡಿಯಲ್ಲಿ ಸ್ವಾಯತ್ತ ಸಂಸ್ಥೆಯಾದ ಕೇರಳ ಲೈಬ್ರರಿ ಕೌನ್ಸಿಲ್ ಅಡಿಯಲ್ಲಿ ಗ್ರಾಮೀಣ ವಾಚನಾಲಯಗಳು ಮತ್ತು ಸಾರ್ವಜನಿಕ ಗ್ರಂಥಾಲಯಗಳಿಗೆ ಕೋಟಿಗಳನ್ನು ಸರ್ಕಾರ ಖರ್ಚು ಮಾಡುತ್ತದೆ. ಕೇರಳ ಶಿಕ್ಷಣ ಕಾಯಿದೆ ಅಧ್ಯಾಯ 32, ಹೈಯರ್ ಸೆಕೆಂಡರಿ ಸ್ಕೂಲ್ ವಿಶೇಷ ನಿಯಮಗಳು, 2001 ಮತ್ತು ಹಲವಾರು ನ್ಯಾಯಾಲಯದ ತೀರ್ಪುಗಳು ಸಾರ್ವಜನಿಕ ಶಾಲೆಗಳಲ್ಲಿ ಸಮರ್ಥ ಗ್ರಂಥಾಲಯಗಳು ಮತ್ತು ಗ್ರಂಥಪಾಲಕರ ಅಗತ್ಯವಿರುತ್ತದೆ ಎಂದು ಎಂದೋ ಬೊಟ್ಟುಮಾಡಿದೆ. ಹೊಸ ಶೈಕ್ಷಣಿಕ ವರ್ಷ ಆರಂಭವಾದರೂ ಎಲ್ಲ ಶಾಲೆಗಳಲ್ಲಿ ಗ್ರಂಥಾಲಯಗಳ ಬೇಡಿಕೆ ಕಡತದಲ್ಲೇ ಉಳಿದಿದೆ.

ಸೇವೆ ಒದಗಿಸದೆ ಶುಲ್ಕ

ರಾಜ್ಯದಲ್ಲಿ ಪ್ಲಸ್ ಒನ್ ಪ್ರವೇಶ ಪ್ರಕ್ರಿಯೆ ನಡೆಯುತ್ತಿರುವಾಗಲೂ ಸರ್ಕಾರ ಗ್ರಂಥಾಲಯ ಸೇವೆ ನೀಡದೆ ಗ್ರಂಥಾಲಯ ಶುಲ್ಕ ವಸೂಲಿ ಮಾಡುತ್ತಿರುವುದು ಟೀಕೆಗೆ ಗುರಿಯಾಗಿದೆ. ಸರ್ಕಾರಿ ಮತ್ತು ಅನುದಾನಿತ ಹೈಯರ್ ಸೆಕೆಂಡರಿ ಶಾಲೆಗಳಲ್ಲಿ ಪ್ಲಸ್ ಒನ್ ಪ್ರವೇಶ ಪಡೆಯುವ ಪ್ರತಿಯೊಬ್ಬ ವಿದ್ಯಾರ್ಥಿ ಗ್ರಂಥಾಲಯ ಶುಲ್ಕವಾಗಿ ರೂ.25 ಪಾವತಿಸಬೇಕು. ಶಾಲಾ ಗ್ರಂಥಪಾಲಕರ ಸೇವೆ ನೀಡದೆ ಶಿಕ್ಷಣ ಇಲಾಖೆ ಗ್ರಂಥಾಲಯ ಶುಲ್ಕ ವಸೂಲಿ ಮಾಡುತ್ತಾ ವರ್ಷಗಳೇ ಕಳೆದಿವೆ. ಶಾಲೆಗಳಲ್ಲಿ ಪರಿಣಿತ ಗ್ರಂಥಪಾಲಕರನ್ನು ನೇಮಿಸದೆ ಶಾಲಾ ಶಿಕ್ಷಕರಿಗೆ ಗ್ರಂಥಾಲಯದ ಕರ್ತವ್ಯಗಳನ್ನು ವಹಿಸುವುದು ವಾಡಿಕೆ.

https://www.vijayavani.net/highway-in-thumbe-turn-pond

https://www.vijayavani.net/kumpla-statement