ದಾಖಲೆ ಬರೆದ ಚನ್ನಪಟ್ಟಣ ಉಪಚುನಾಣೆ ಮತದಾನ

*ಶೇ.90ರ ಆಸುಪಾಸಿಗೆ ಮತದಾನ ಪ್ರಮಾಣ

*ಅಭ್ಯರ್ಥಿಗಳಲ್ಲಿ ಭವಿಷ್ಯದ ಗೊಂದಲ

ಗಂಗಾಧರ್​ ಬೈರಾಪಟ್ಟಣ ರಾಮನಗರ

ಕಳೆದ 20 ದಿನಗಳಿಂದಲೂ ಉಪಚುನಾವಣೆ ಕಾವಿನಲ್ಲಿ ಬೆಂದಿದ್ದ ಚನ್ನಪಟ್ಟಣಕ್ಕೆ ಗುರುವಾರ ಬಿರುಸಿನ ಮಳೆಯಾಗಿ ತಂಪೆರೆದಿದೆ.

ಮತದಾನ ಮುಗಿದು ಮತ ಯಂತ್ರಗಳಲ್ಲಿ ಅಭ್ಯರ್ಥಿಗಳ ಭವಿಷ್ಯ ಸೇಫ್ ಆಗಿ ಸ್ಟ್ರಾಂಗ್​ ರೂಂ ಸೇರಿಯೂ ಆಗಿದೆ. ಈಗ ಗೆಲುವು ಯಾರಿಗೆ ಎನ್ನುವ ಬಿಸಿಬಿಸಿ ಚರ್ಚೆ ಕ್ಷೇತ್ರದ ತುಂಬೆಲ್ಲ ವ್ಯಾಪಿಸಿದ್ದು, ಸೋಲು&ಗೆಲುವಿನ ದೊಡ್ಡ ಪ್ರಶ್ನೆ ಎಲ್ಲರಲ್ಲೂ ಮೂಡಿದೆ.

ಇದಕ್ಕೆ ಕಾರಣವಾಗಿದ್ದು, ಕ್ಷೇತ್ರದಲ್ಲಿ ಈ ಬಾರಿ ದಾಖಲೆಯ ಮತದಾನವಾಗಿದೆ. ಹಿಂದಿನ ಎಲ್ಲ ಚುನಾವಣೆಗಳನ್ನು ಅವಲೋಕಿಸಿದಾಗಿ ಈ ಬಾರಿ ಶೇ.90ರ ಆಸುಪಾಸಿಗೆ ಮತದಾನ ಪ್ರಮಾಣ ತಲುಪಿರುವುದು ರಾಜಕೀಯ ನಾಯಕರು ಗೆಲುವಿನ ಗಣಿತದಲ್ಲಿ ತೊಡಗಿಕೊಳ್ಳುವಂತೆ ಮಾಡಿದೆ.

1952ರಿಂದ ಚನ್ನಪಟ್ಟಣ ವಿಧಾನಸಭೆಗೆ ಈ ಚುನಾವಣೆಯೂ ಸೇರಿ 3 ಉಪ ಚುನಾವಣೆಗಳು ಹಾಗೂ 16 ಸಾರ್ವತ್ರಿಕ ಚುನಾವಣೆಗಳು ನಡೆದಿವೆ. ಆದರೆ, ಬುಧವಾರ ನಡೆದ ಮತದಾನ ಹಿಂದಿನ ಎಲ್ಲ ದಾಖಲೆಗಳನ್ನು ಹಿಂದಿಕ್ಕಿ ಮೊದಲ ಬಾರಿಗೆ ಶೇ 88.81 ಮತದಾನವನ್ನು ದಾಖಲು ಮಾಡಿದೆ.

2018ರ ಸಾರ್ವತ್ರಿಕ ಚುನಾವಣೆಯಲ್ಲಿ ಶೇ.86.86 ಮತದಾನವಾಗಿದ್ದೇ ದಾಖಲೆಯಾಗಿತ್ತು. ಇದನ್ನು ಹೊರತುಪಡಿಸಿ ಶೇ.80ರ ಗಡಿದಾಟಿದ ಚುನಾವಣೆಗಳೆಂದರೆ 1978ರಲ್ಲಿ ಶೇ.80.30, 1994ರಲ್ಲಿ ಶೇ.81.52, 2013ರ ಚುನಾವಣೆಯಲ್ಲಿ ಶೇ.84.78 ಮತ್ತು ಕಳೆದ 2023ರ ಚುನಾವಣೆಯಲ್ಲಿ ಶೇ.85.86 ಮತದಾನವಾಗಿತ್ತು.

ಲೆಕ್ಕಾಚಾರ ಆರಂಭ

ಈ ಬಾರಿ ದಾಖಲೆ ಮಾತದಾನವಾಗಿರುವುದು ಯಾರಿಗೆ ಲಾಭ ಎನ್ನುವ ದೊಡ್ಡ ಚರ್ಚೆಯನ್ನು ಹುಟ್ಟುಹಾಕಿದೆ. ಆದರೆ, ಗ್ರಾಮೀಣ ಭಾಗದಲ್ಲಿ ಹೆಚ್ಚು ಮತದಾನವಾಗಿದೆಯೇ, ಇಲ್ಲ ನಗರ ಪ್ರದೇಶದಲ್ಲಿ ಹೆಚ್ಚು ಮತದಾನವಾಗಿದೆಯೇ ಎನ್ನುವ ಬಗ್ಗೆ ಕಾರ್ಯಕರ್ತರಿಗೆ ಖಾತ್ರಿ ಇಲ್ಲದ ಕಾರಣ ತಮ್ಮದೇ ವ್ಯಾಖ್ಯಾನ ನೀಡುವ ಮೂಲಕ ಚರ್ಚೆಯನ್ನು ಹುಟ್ಟುಹಾಕಿದ್ದಾರೆ. 276 ಬೂತ್​ಗಳಲ್ಲಿ 100ಕ್ಕೂ ಹೆಚ್ಚು ಬೂತ್​ಗಳಲ್ಲಿ ಮತದಾನದ ಪ್ರಮಾಣ ಶೇ.90ರಿಂದ 97ರವರೆಗೂ ದಾಟಿದೆ. ಇದರ ಜತೆಗೆ ಮಹಿಳಾ ಮತಗಳ ಪ್ರಮಾಣವೂ ಹೆಚ್ಚಳವಾಗಿರುವ ಕಾರಣ, ಇವರ ಆಶೀರ್ವಾದ ಯಾರಿಗೆ ದಕ್ಕಿದೆ ಎನ್ನುವ ಚರ್ಚೆಯೂ ನಡೆದಿದೆ.

ಯಾರಿಗೆ ಲಾಭ?

ರಾಜಕೀಯ ಪಕ್ಷದ ಮುಖಂಡರು ಮತದಾನ ಪ್ರಮಾಣ ಹೆಚ್ಚಳ ಸಂಬಂಧ ಗೆಲುವು ತಮ್ಮದೇ ಎಂದು ಬೀಗುತ್ತಿದ್ದಾರೆ. ಒಂದೆಡೆ ಕಾಂಗ್ರೆಸ್​ ಅಭ್ಯರ್ಥಿ ಸಿ.ಪಿ.ಯೋಗೇಶ್ವರ್​ ಲಿತಾಂಶ ಕಷ್ಟವಾಗಿದೆ ಎಂದು ಹೇಳುತ್ತಿದ್ದರೂ ಗೆಲುವು ತಮ್ಮದೆ ಎಂದು ಹಿನ್ನೆಲೆಯಲ್ಲಿ ಬೀಗುತ್ತಿದ್ದಾರೆ. ಅದೇರೀತಿ ಎನ್​ಡಿಎ ಅಭ್ಯರ್ಥಿ ನಿಖಿಲ್​ ಸಹ ಗೆಲುವು ನಮ್ಮದೆ ಎಂದು ಬಹಿರಂಗವಾಗಿ ಹೇಳಿಕೊಂಡಿದ್ದಾರೆ. ಆದರೂ ಒಳಗೊಳಗೇ ಗೆಲುವಿನ ಬಗ್ಗೆ ಗೊಂದಲ ನಿರ್ಮಾಣವಾಗಿದೆ.

ಬಾಜಿಯೂ ಚರ್ಚೆ

ಮತದಾನ ಪ್ರಮಾಣ ಹೆಚ್ಚಾಗಿರುವ ಕಾರಣ ಲಿತಾಂಶದ ಮೇಲೆ ಬೆಟ್ಟಿಂಗ್​ ಕಟ್ಟುವ ಬಾಜೀದಾರರೂ ಸಾವಿರ ಬಾರಿ ಯೋಚಿಸಿ ಮುನ್ನಡಿ ಇಡುವಂತೆ ಮಾಡಿದೆ. ಸಾಧ್ಯವಿರುವ ಎಲ್ಲ ಮೂಲಗಳಿಂದ ಮಾಹಿತಿ ಸಂಗ್ರಹಿಸುವ ಕೆಲಸ ಬಾಜೀದಾರರು ಮಾಡುತ್ತಿದ್ದು ಇನ್ನು ಎರಡು ಮೂರು ದಿನಗಳ ನಂತರ ಕ್ಷೇತ್ರದ ಲಿತಾಂಶದ ಮೇಲಿನ ಬಾಜಿ ತೇಜಿಯಾಗಲಿದೆ.

ಹಿಂದಿನ ವಿಧಾನಸಭೆ ಚುನಾವಣೆ ಶೇಖಡವಾರು

ವರ್ಷ  ಮತದಾರರು ಹಕ್ಕುಚಲಾವಣೆ ಶೇಖಡಾವರು

1957  46135           32778         71.05

1962  50064          39850        79.60

1967  67164            51537        76.73

1972  84839           54475        64.21

1978  89067            71522         80.30

1983  96068             71522         74.74

1985  112183           86911           77.47

1989  131553          104455         79.40

1994  143702           117175         82.52

1999  159659         116429           72.92

2004  168502        120490           71.50

2008  183793        143627            78.15

2013  19876 1          168515          84.78

2018  217606           189013         86.86

2023  230381           197796         85.86

ಹಿಂದಿನ ಎರಡು ಉಪಚುನಾವಣೆ ಮತದಾನದ ಶೇಖಡವಾರು

ವರ್ಷ ಮತದಾರರು ಹಕ್ಕುಚಲಾವಣೆ ಶೇಖಡವಾರು

2009  186669      147665        79.10

2011   188399       148769        78.96