ಪ್ಲಾಸ್ಟಿಕ್​ ಬಳಕೆಗಿಲ್ಲ ಕಡಿವಾಣ ಕಾಟಾಚಾರದ ಕಾರ್ಯಾಚರಣೆ ಜನಪ್ರತಿನಿಧಿಗಳಿಗೂ ಜ್ಞಾನೋದಯ ಆಗಬೇಕು

ಗಂಗಾಧರ್​ ಬೈರಾಪಟ್ಟಣ ರಾಮನಗರ

ಜಿಲ್ಲೆಯಲ್ಲಿ ಪ್ಲಾಸ್ಟಿಕ್​ ನಿಷೇಧ ಎನ್ನುವುದು ಕಾಟಾಚಾರದ ಕಾಯ್ದೆಯಾಗಿದ್ದು, ಅಪರೂಪಕ್ಕೆ ನಡೆಯುವ ಕಾರ್ಯಾಚರಣೆ ನಿರಂತರವಾಗಿ ನಡೆಯುವ ಅಗತ್ಯವಿದೆ.

ಸರ್ಕಾರ ಪ್ಲಾಸ್ಟಿಕ್​ ನಿಷೇಧಿಸಿ ಆದೇಶ ಹೊರಡಿಸಿದ್ದರೂ ಪ್ಲಾಸ್ಟಿಕ್​ ಬ್ಯಾನರ್​ಗಳು, ಫ್ಲೆಕ್ಸ್ ಗಳು, ಹೋರ್ಡಿಂಗ್​ಗಳು ನಗರದ ತುಂಬೆಲ್ಲಾ ರಾರಾಜಿಸುತ್ತಿವೆ. ಇದರ ಜತೆಗೆ ಅಂಗಡಿ, ಬೇಕರಿಗಳಲ್ಲೂ ಏಕಬಳಕೆ ಪ್ಲಾಸ್ಟಿಕ್​ ಉಪಯೋಗ ಹೆಚ್ಚಿದ್ದು ಇದರ ವಿರುದ್ಧ ಕಠಿಣ ಕ್ರಮಕ್ಕೆ ಮುಂದಾಗಬೇಕಿರುವ ಸ್ಥಳಿಯ ಸಂಸ್ಥೆಗಳು ಕಣ್ಣೊರೆಸುವ ತಂತ್ರ ಎನ್ನುವಂತೆ ಅಪರೂಪಕ್ಕೆ ದಾಳಿಗಳನ್ನು ನಡೆಸಿ, ಜಾಣ ನಡೆ ಪ್ರದರ್ಶಿಸುತ್ತಿವೆ.

ಬ್ಯಾನರ್​ಗಳ ಹಾವಳಿ

ಜಿಲ್ಲೆಯಲ್ಲಿ ಪ್ರಮುಖವಾಗಿ ರಾಮನಗರ ಮತ್ತು ಚನ್ನಪಟ್ಟಣದಲ್ಲಿ ಬ್ಯಾನರ್​ಗಳ ಹಾವಳಿ ಹೆಚ್ಚಿದೆ. ಬೆಂಗಳೂರು& ಮೈಸೂರು ಹೆದ್ದಾರಿಯಲ್ಲಿ ಪ್ರತಿ ವಿದ್ಯುತ್​ ಕಂಬದಲ್ಲಿಯೂ ವಿವಿಧ ರಾಜಕೀಯ ಪಕ್ಷಗಳ ಕಾರ್ಯಕರ್ತರು ಕಟ್ಟಿರುವ ಶುಭ ಕೋರುವ ಬ್ಯಾನರ್​ಗಳು ರಾರಾಜಿಸುತ್ತಿವೆ. ಇದು ಹೆದ್ದಾರಿಗೆ ಸೀಮಿತವಾಗದೆ ನಗರದ ಪ್ರಮುಖ ರಸ್ತೆಗಳು, ಮಾರುಕಟ್ಟೆ ಪ್ರದೇಶದಲ್ಲಿಯೂ ಕಣ್ಣಿಗೆ ರಾಚುತ್ತವೆ. ಆದರೆ ಇಷ್ಟೆಲ್ಲಾ ಬ್ಯಾನರ್​ಗಳು ನಿಯಮ ಮೀರಿ ಸಾರ್ವಜನಿಕ ಪ್ರದೇಶದಲ್ಲಿ ಪ್ರದರ್ಶನಗೊಳ್ಳುತ್ತಿದ್ದರೂ ಸ್ಥಳಿಯ ಆಡಳಿತಗಳು ಮಾತ್ರ ತಮಗೂ ಇದಕ್ಕೂ ಸಂಬಂಧವೇ ಇಲ್ಲ ಎನ್ನುವಂತೆ ವರ್ತಿಸುತ್ತಿವೆ.

ಯಾವುದೆಲ್ಲ ನಿಷೇಧ?

ರಾಜ್ಯ ಸರ್ಕಾರ ಕಳೆದ ಜು.1ರಿಂದಲೇ ಪ್ಲಾಸ್ಟಿಕ್​ ಬಳಕೆ ನಿಷೇಧಿಸಿದೆ. ಇದರ ಭಾಗವಾಗಿ ಪ್ಲಾಸ್ಟಿಕ್​ನಿಂದ ್ಲೆಕ್ಸ್​, ಬ್ಯಾನರ್​ಗಳನ್ನು ತಯಾರು ಮಾಡುವುದು ಹಾಗೂ ಅವುಗಳನ್ನು ಸಾರ್ವಜನಿಕ ಸ್ಥಳದಲ್ಲಿ ಕಟ್ಟುವುದಕ್ಕೂ ನಿಷೇಧ ಇದೆ. ಆದರೆ ಅಪರೂಪಕ್ಕೆ ಎನ್ನುವಂತೆ ಕಾಯ್ದೆಯನ್ನು ಬಳಸಿ ನಂತರ ಅಧಿಕಾರಿಗಳು ಸುಮ್ಮನಾಗುತ್ತಿದ್ದಾರೆ.

ಕೇವಲ ಕಾಟಾಚಾರ?

ನಗರ ವ್ಯಾಪ್ತಿಯಲ್ಲಿ ಪ್ಲಾಸ್ಟಿಕ್​ನಿಂದ ಮಾಡಿದ ಬ್ಯಾನರ್​ ಬಂಟಿಂಗ್​ಗಳನ್ನು ನಿಷೇಧ ಮಾಡಿರುವುದು ಮಾತ್ರವಲ್ಲದೆ, ಇವುಗಳ ಉತ್ಪಾದನೆ ಹಾಗೂ ಮುದ್ರಣವನ್ನೂ ನಿಷೇಧಿಸಲಾಗಿದೆ. ಉತ್ಪಾದನೆ ಮಾಡುವಂತಹ ಮುದ್ರಣದವರ ವಿರುದ್ಧವೂ ಕ್ರಮ ಕೈಗೊಳ್ಳುವಂತೆ ಸೂಚನೆ ನೀಡಲಾಗಿತ್ತು. ಇದರ ಜತೆಗೆ ಬಟ್ಟೆಯಲ್ಲಿ ತಯಾರು ಮಾಡಿದ ಬ್ಯಾನರ್​ಗಳು, ಬಂಟಿಂಗ್​ಗಳು, ್ಲೆಕ್ಸ್​ಗಳನ್ನು ಬಳಸಬಹುದಾಗಿದ್ದು, ಇದಕ್ಕೆ ನಗರಸಭೆ ಅನುಮತಿ ಪಡೆಯುವುದು ಕಡ್ಡಾಯ. ಒಂದು ವೇಳೆ ನಗರಸಭೆಯಿಂದ ಅನುಮತಿ ಪಡೆಯದೇ ಹೋದರೆ ಕಾನೂನು ಸಂರ್ಷಕ್ಕೆ ಒಳಗಾಗಬೇಕಾಗುವುದು ನಿಶ್ಚಿತ ಎನ್ನುವ ಎಚ್ಚರಿಕೆಯನ್ನೂ ನೀಡಲಾಗಿತ್ತು. ಆದರೆ, ಯಾವುದೂ ಜಾರಿಗೆ ಬಂದೇ ಇಲ್ಲ.

ಪ್ರತಿನಿಧಿಗಳಿಂದಲೇ ಉಲ್ಲಂಘನೆ

ದುರಂತವೆಂದರೆ ಸರ್ಕಾರ ಬ್ಯಾನರ್​ ಫ್ಲೆಕ್ಸ್​ಗಳನ್ನು ನಿಷೇಧಿಸಿ ಆದೇಶ ಹೊರಡಿಸಿದ್ದರೆ, ಸ್ಥಳಿಯ ಸಂಸ್ಥೆಯ ಭಾಗವಾಗಿರುವ ಜನಪ್ರತಿನಧಿಗಳೇ ಬ್ಯಾನರ್​ಗಳನ್ನು ಕಟ್ಟುವ ಮೂಲಕ ಸರ್ಕಾರದ ನಿಯಮವನ್ನು ಗಾಳಿಗೆ ತೂರುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ಅಧಿಕಾರಿಗಳು ಕ್ರಮ ಕೈಗೊಳ್ಳಲೂ ಆಗದೆ, ಬುದ್ಧಿ ಮಾತು ಹೇಳಲೂ ಆಗದೆ ಕೈಕಟ್ಟಿ ಕೂರುವಂತಹ ಪರಿಸ್ಥಿತಿಯಲ್ಲಿ ಸಿಲುಕುತ್ತಿದ್ದಾರೆ. ಕೆಲವರು ಬ್ಯಾನರ್​ ಕಟ್ಟಲು ಅನುಮತಿ ಪಡೆಯುತ್ತಿದ್ದರೂ ಇದರ ಸಂಖ್ಯೆ ಏರುತ್ತಿಲ್ಲ.

ಈಗ ನಡೆಯುತ್ತಿದೆ ಕಾರ್ಯಾಚರಣೆ

ಜಿಲ್ಲೆಯಲ್ಲಿರುವ ಸ್ಥಳಿಯ ಸಂಸ್ಥೆಗಳು ಈಗ ಎಚ್ಚೆತ್ತುಕೊಂಡು ಪ್ಲಾಸ್ಟಿಕ್​ ಬಳಕೆಗೆ ತಡೆಯೊಡ್ಡುವ ಕಾರ್ಯ ನಡೆಸುತ್ತಿವೆ. ಬಿಡದಿ, ಕನಕಪುರ, ರಾಮನಗರ ಹಾಗೂ ಇತರ ಸ್ಥಳಿಯ ಸಂಸ್ಥೆಗಳಲ್ಲಿಯೂ ಈ ಕಾರ್ಯ ನಡೆಯುತ್ತಿದೆ. ರಾಮನಗರದಲ್ಲಿ ಫುಟ್​ಪಾತ್​ ಒತ್ತುವರಿ ತೆರವು ನಡೆಯುತ್ತಿದೆ. ಇಂತಹ ಕಾರ್ಯಾಚರಣೆಗಳು ಹಲವಾರು ನಡೆದಿದ್ದರೂ ಇದೇ ಬಿಸಿ ಕಾಯ್ದುಕೊಂಡು ಹೋಗುವಲ್ಲಿ ಸ್ಥಳಿಯ ಸಂಸ್ಥೆಗಳು ವಿಫಲವಾಗುತ್ತಿವೆ.

ರಾಮನಗರದಲ್ಲಿ ಪ್ಲಾಸ್ಟಿಕ್​ ನಿಷೇಧಕ್ಕೆ ಕ್ರಮ ಕೈಗೊಳ್ಳಲಾಗಿದೆ. ಕಳೆದ ನಾಲ್ಕೆದು ದಿನಗಳಿಂದ ಕಾರ್ಯಾಚರಣೆ ನಡೆಸುವ ಮೂಲಕ ಪ್ಲಾಸ್ಟಿಕ್​ ವಶಕ್ಕೆ ಪಡೆದು ದಂಡ ವಿಧಿಸಲಾಗುತ್ತಿದೆ. ಇದರ ಜತೆಗೆ ಅರಿವು ಮೂಡಿಸುವ ಕಾರ್ಯವೂ ನಡೆಯುತ್ತಿದೆ.

 ಎಲ್​.ನಾಗೇಶ್​, ಆಯುಕ್ತ, ರಾಮನಗರ ನಗರಸಭೆ