ನಿಖಿಲ್​ಗೆ ಮಂಡ್ಯದಂತೆ ರಾಮನಗರದಲ್ಲೂ ಪ್ರತಿರೋಧ ಜೆಡಿಎಸ್​ಗೆ ಬೆವರು ತಂದ ಡಿ.ಕೆ. ಸುರೇಶ್​ ಸ್ಪರ್ಧೆ ವಿಚಾರ

ಗಂಗಾಧರ್​ ಬೈರಾಪಟ್ಟಣ ರಾಮನಗರ
ರಾಜ್ಯ ರಾಜಕಾರಣದಲ್ಲಿ ಸಂಚಲನ ಮೂಡಿಸುವ ಹಾಗೂ ಜೆೆಡಿಎಸ್​ ಪಾಲಿಗೆ ಶಾಕಿಂಗ್​ ಎನ್ನಲಾದ ಸುದ್ದಿಯನ್ನು ಕಾಂಗ್ರೆಸ್​ ನೀಡಿದ್ದು, ಜೆಡಿಎಸ್​ ಭದ್ರಕೋಟೆ ಛಿದ್ರಗೊಳಿಸುವ ಡೈನಮೈಟ್​ ಇಟ್ಟಿದೆ.

ಜೆಡಿಎಸ್​ ಪಾಲಿಗೆ ಗೆಲುವಿನ ಅಕ್ಷಯ ಪಾತ್ರೆಯಾಗಿರುವ ರಾಮನಗರದಲ್ಲಿ ತಮ್ಮ ವಂಶದ ಮೂರನೇ ಕುಡಿಯನ್ನು ಕಣಕ್ಕಿಳಿಸಿ ನಿರಾಯಾಸವಾಗಿ ಗೆಲುವು ಪಡೆದುಕೊಳ್ಳಬೇಕು ಎನ್ನುವ ದಳಪತಿ ಎಚ್​.ಡಿ.ದೇವೇಗೌಡರ ಕನಸಿಗೆ, ಡಿ.ಕೆ. ಸುರೇಶ್​ ಅಸ್ತ್ರ ಬಳಸುವ ಮೂಲಕ ನಿರಾಸೆ ಮೂಡಿಸುವಂತೆ ಕಾಂಗ್ರೆಸ್​ ಮಾಡಿದೆ.

ಬದಲಾದ ಚಿತ್ರಣ
ಒಕ್ಕಲಿಗ ಪ್ರಾಬಲ್ಯದ ಕ್ಷೇತ್ರದಲ್ಲಿ ಎಚ್​.ಡಿ.ಕುಮಾರಸ್ವಾಮಿ ಅವರ ನಿರಾಯಾಸ ಗೆಲುವಿಗೆ ಜಾತಿ ಲೆಕ್ಕಾಚಾರವೇ ಕೈಹಿಡಿಯುತ್ತಾ ಬಂದಿತ್ತು. 2018ರ ಚುನಾವಣೆಯಲ್ಲಿಯೂ ಇದು ಸಾಬೀತಾಗಿದೆ. ಕಳೆದ ಬಾರಿಯ ಸ್ಪರ್ಧಿ ಹಾಗೂ ಪ್ರಸ್ತುತ ಚುನಾವಣೆಯಲ್ಲಿ ನಿಯೋಜಿತ ಅಭ್ಯರ್ಥಿ ಎಚ್​.ಎ.ಇಕ್ಬಾಲ್​ ಹುಸೇನ್​ ಅವರು ಪಕ್ಷವನ್ನು ಬಲವಾಗಿ ಕಟ್ಟುತ್ತಿದ್ದರಾದರೂ ಜಾತಿ ಎನ್ನುವ ಕಾರಣಕ್ಕೆ ಅಲ್ಪ ಹಿನ್ನಡೆಯೂ ಇತ್ತು. ಆದರೆ ಡಿ.ಕೆ.ಸುರೇಶ್​ ಹೆಸರು ಕೇಳಿ ಬರುತ್ತಿದ್ದಂತೆ ಜೆಡಿಎಸ್​ ಪಾಳಯವೂ ಬೆವರುವಂತೆ ಆಗಿದೆ. ಡಿ.ಕೆ.ಸುರೇಶ್​ ಸಹ ಒಕ್ಕಲಿಗ ಸಮುದಾಯದ ಹಾಗೂ ಪ್ರಬಲ ಪೈಪೋಟಿ ನೀಡುವ ತಂತ್ರಗಾರಿಕೆ ಹೊಂದಿರುವ ಕಾರಣ ಕಣವೇ ಬದಲಾಗಿದೆ.

ಅಷ್ಟು ಸುಲಭವಲ್ಲ
ನಿಖಿಲ್​ ಕುಮಾರಸ್ವಾಮಿ ಹೆಸರು ಘೋಷಣೆ ಆಗುತ್ತಿದ್ದಂತೆ ಜೆಡಿಎಸ್​ ಪಾಳಯದಲ್ಲಿ ರಣೋತ್ಸಾಹ ಇಮ್ಮಡಿಗೊಂಡಿತ್ತು. ಗೆಲುವು ಸುಲಭ ಎನ್ನುವ ತರ್ಕಗಳು ನಡೆಯುತ್ತಿದ್ದವು. ಆದರೆ ಡಿ.ಕೆ.ಸುರೇಶ್​ ಹೆಸರು ಮುನ್ನೆಲೆಗೆ ಬರುತ್ತಿದ್ದಂತೆ ಈ ಲೆಕ್ಕಾಚಾರ ಉಲ್ಟಾ ಹೊಡೆದಿದೆ. ಇಬ್ಬರ ನಡುವೆ ಸ್ಪರ್ಧೆ ಏರ್ಪಟ್ಟರೆ ನಿಖಿಲ್​ ಕುಮಾರಸ್ವಾಮಿ ಮಂಡ್ಯದಲ್ಲಿ ಎದುರಿಸಿದ ರೀತಿಯಲ್ಲಿಯೇ ಪ್ರತಿರೋಧ ಎದುರಿಸಬೇಕಿದೆ.
ಕಳೆದ ಚುನಾವಣೆಯಲ್ಲಿ ಎಚ್​.ಡಿ.ಕುಮಾರಸ್ವಾಮಿ ಅವರ ಕೈಹಿಡಿದಿದ್ದು ಹಾರೋಹಳ್ಳಿ, ಮರಳವಾಡಿ ಹೋಬಳಿಗಳು. ಹಾರೋಹಳ್ಳಿ ತಾಲೂಕು ರಚನೆಯ ಕ್ರೆಡಿಟ್ ತೆಗೆದುಕೊಳ್ಳುವ ಸಲುವಾಗಿ ಎಚ್​ಡಿಕೆ ಸ್ಥಳಿಯರಿಗೆ ಬಾಡೂಟ ಮಾಡಿಸಿದ್ದರು. ಇದರ ಹೊರತಾಗಿಯೂ ಈ ಭಾಗದಲ್ಲಿ ಡಿ.ಕೆ.ಸಹೋದರರ ಪ್ರಭಾವವೂ ಇದ್ದು, ಇದು ಜೆಡಿಎಸ್​ ಪಾಲಿಗೆ ಕಷ್ಟವಾಗಬಹುದು.

ಇನ್ನು ಹಾರೋಹಳ್ಳಿ ಭಾಗದಲ್ಲಿ ಜೆೆಡಿಎಸ್​ ಪ್ರಮುಖ ಮುಖಂಡರೆನಿಸಿಕೊಂಡಿದ್ದ ಜಿಪಂ ಮಾಜಿ ಸದಸ್ಯ ಭುಜಂಗಯ್ಯ, ವಿಎಸ್ಸೆಸ್ಸೆನ್​ ಅಧ್ಯಕ್ಷ ಸೋಮಶೇಖರ್​, ತಾಪಂ ಮಾಜಿ ಸದಸ್ಯೆ ಶಿಲ್ಪಾ ಅವರ ಪತಿ ಶಿವಾನಂದ್​ ಸೇರಿ ಹಲವರು ಪಕ್ಷದಿಂದ ದೂರವೇ ಉಳಿದಿದ್ದು, ಇದು ಮೊನ್ನೆಯ ಬಾಡೂಟದ ಕಾರ್ಯಕ್ರಮದಲ್ಲಿಯೂ ಪ್ರತಿಫಲಿಸಿದೆ.

ಈ ಬಗ್ಗೆ ನನಗೇನೂ ಗೊತ್ತಿಲ್ಲ. ಮಾಧ್ಯಮಗಳಲ್ಲಿ ನೋಡಿ ತಿಳಿದುಕೊಂಡಿದ್ದೇನೆ. ಸದ್ಯಕ್ಕೆ ನಮ್ಮ ನಿಯೋಜಿತ ಅಭ್ಯರ್ಥಿ ಪ್ರಚಾರ ಮಾಡುತ್ತಿದ್ದಾರೆ.
 ಡಿ.ಕೆ.ಸುರೇಶ್​, ಸಂಸದ

ಯಾರು ಎಲ್ಲಿ ಬೇಕಾದರೂ ಸ್ಪರ್ಧೆ ಮಾಡಬಹುದು. ಮಂಡ್ಯದಲ್ಲಿ ಕಾಂಗ್ರೆಸ್​, ಬಿಜೆಪಿ, ರೈತ ಸಂ ಚಕ್ರವ್ಯೂಹ ನಿರ್ಮಿಸಿ ನನ್ನನ್ನು ಸೋಲಿಸಿದರು. ಇಲ್ಲಿಯೂ ಅದೇ ಸಂಚು ನಡೆಯುತ್ತಿದೆ.
 ನಿಖಿಲ್​ ಕುಮಾರಸ್ವಾಮಿ, ಜೆಡಿಎಸ್​ ಘೋಷಿತ ಅಭ್ಯರ್ಥಿ