ನಾಡಬಾಂಬ್​ ಸಿಡಿದು ಕೈ ಛಿದ್ರ

ಕನಕಪುರ: ಕಾಡುಹಂದಿ ಬೇಟೆಗಾಗಿ ಜಮೀನೊಂದರಲ್ಲಿ ಇಟ್ಟಿದ್ದ ನಾಡಬಾಂಬ್​ ಸಿಡಿದು ವ್ಯಕ್ತಿಯೊಬ್ಬನ ಕೈ ಛಿದ್ರವಾಗಿರುವುದು ಸಾತನೂರು ಠಾಣಾ ವ್ಯಾಪ್ತಿಯ ಹಾರೋಬಲೆ ಸಮೀಪದ ಡಿ.ಕೆ.ನಗರದಲ್ಲಿ ನಡೆದಿದೆ.

ಡಿ.ಕೆ.ನಗರದ ಸಚಿನ್​ (28) ಗಾಯಾಳು. ಗುರುವಾರ ಬೆಳಗ್ಗೆ ಸಚಿನ್​ ಜಮೀನಿನಲ್ಲಿದ್ದಾಗ ನಾಡಬಾಂಬ್​ ಸಿಡಿದಿದೆ. ಗಾಯಗೊಂಡ ಸಚಿನ್​ನನ್ನು ಬೆಂಗಳೂರಿನ ಸೇಂಟ್​ ಜಾನ್​ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಸಚಿನ್​ ಕೊಳ್ಳೇಗಾಲ ಮೂಲದವನಾಗಿದ್ದು, ಈತನಿಗೆ ಕಾಡುಹಂದಿ ಬೇಟೆಗಾರರ ಸ್ನೇಹವಿದೆ. ಸುದ್ದಿ ತಿಳಿದ ಸರ್ಕಲ್​ ಇನ್​ಸ್ಪೆಕ್ಟರ್​ ಕೆ.ಎಲ್​.ಕೃಷ್ಣ, ಸಾತನೂರು ಎಸ್​ಐ ಹರೀಶ್​ ಸ್ಫೋಟದ ಸ್ಥಳ ಪರಿಶೀಲನೆ ಹಾಗೂ ಸಚಿನ್​ ಮನೆಯ ಶೋಧ ನಡೆಸಿದರು. ಸಾತನೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.