ಸಾಮಾನ್ಯವಾಗಿ ದೂರದ ಪ್ರದೇಶಕ್ಕೆ ಬಿಟ್ಟರೂ ಅವು ಸ್ವಸ್ಥಾನಕ್ಕೆ ಮರಳಲು ಪ್ರಯತ್ನ ಮಾಡುತ್ತವೆ. ಈ ವೇಳೆ ಕೆಲವು ಯಶಸ್ಸು ಸಾಧಿಸಿದರೆ, ಮತ್ತೆ ಕೆಲವು ದಾರಿ ತಪ್ಪುತ್ತವೆ, ಮತ್ತೆ ಕೆಲವು ಪ್ರಾಣ ಕಳೆದುಕೊಳ್ಳುತ್ತವೆ. ಚುರುಕು ಬುದ್ಧಿಯ ಆನೆ ಸಹ ಸ್ವಸ್ಥಾನಕ್ಕೆ ಮರಳುವುದರಲ್ಲಿ ಎತ್ತಿದಕೈ. ತೆಂಗಿನಕಲ್ಲು ಅರಣ್ಯದಿಂದ ಸೆರೆ ಹಿಡಿದು ತಮಿಳುನಾಡಿನ ಗಡಿಗೆ ಹೊಂದಿಕೊಂಡಿರುವ ಅರಣ್ಯ ಪ್ರದೇಶಕ್ಕೆ ಬಿಟ್ಟರೂ ಪಟ್ಟು ಬಿಡದ ಮಖ್ನಾ ಆನೆ ಹಲವಾರು ಪ್ರಯತ್ನಗಳ ನಂತರ ಮತ್ತೆ ಮರಳಿದೆ. ರಾಮನಗರ ಮತ್ತು ಚಾಮರಾಜನಗರ ಜಿಲ್ಲೆಯಲ್ಲಿ ಕಾವೇರಿ ನದಿ ವಿಭಜಿಸುತ್ತಿದೆ. ಇಲ್ಲಿಗೆ ಸುಮಾರು 2 ತಿಂಗಳ ಹಿಂದೆಯೇ ಬಂದ ಆನೆ, ನದಿಯಲ್ಲಿ ನೀರಿನ ಹರಿವಿನ ಪ್ರಮಾಣ ಕಡಿಮೆ ಆಗುವವರೆಗೂ ಕಾಯ್ದು ರಾಮನಗರದ ಸಂಗಮ, ಸಾತನೂರು ಅರಣ್ಯ ಪ್ರದೇಶವನ್ನು ದಾಟಿ ಬಂದಿದೆ. ಅರಣ್ಯ ಇಲಾಖೆ ಸಿಬ್ಬಂದಿ ನದಿ ದಾಟುವ ವೇಳೆಯೇ ಆನೆಯನ್ನು ಹಿಮ್ಮೆಟ್ಟಿಸುವ ಪ್ರಯತ್ನ ಮಾಡಿದ್ದಾರಾದರೂ ಇದು ಫಲ ನೀಡಲಿಲ್ಲ.
