ರಾಮನಗರದ ನಾಗರಿಕರಿಗೆ 12 ರಿಂದ 31ನೇ ವಾರ್ಡಿಗೆ ಕಾವೇರಿ, 1 ರಿಂದ 12ನೇ ವಾರ್ಡಿನ ಜನರಿಗೆ ಅರ್ಕಾವತಿ ನದಿ ನೀರು ಪೂರೈಸಲಾಗುತ್ತಿದೆ. ಜಲಮಂಡಳಿ ಮನೆಮನೆಗೆ ಕೊಳಾಯಿ ಸಂಪರ್ಕ ನೀಡಿ ನೀರು ಸರಬರಾಜು ಮಾಡುತ್ತಿದೆ. ಇದರ ಜತೆಗೆ ನಗರಸಭೆಯಿಂದ ಕೊರೆಸಿರುವ ಕೊಳವೆಬಾವಿಗಳು, ಸಾರ್ವಜನಿಕರು ಸ್ವಂತವಾಗಿ ಕೊರೆಯಿಸಿರುವ ನೂರಾರು ಕೊಳವೆಬಾವಿಗಳು ನಗರದ ಜನರ ನೀರಿನ ಕೊರತೆ ನೀಗಿಸುತ್ತಿವೆ. ಪ್ರಸ್ತುತ ಬರಗಾಲ ಮತ್ತು ನದಿಯಲ್ಲಿ ನೀರಿಲ್ಲದೆ ಅಂತರ್ಜಲ ಕುಸಿತದಿಂದ ಕೊಳವೆಬಾವಿಗಳಲ್ಲಿ ನೀರಿಲ್ಲದೆ ನೀರು ಸರಬರಾಜಿನಲ್ಲಿ ವ್ಯತ್ಯಯ ಉಂಟಾಗಿದ್ದಲ್ಲದೆ, ರಾಮನಗರದ 31 ವಾರ್ಡಿನ ಜನರೂ ನೀರಿನ ಕೊರತೆ ಎದುರಿಸುತ್ತಿದ್ದಾರೆ. ಜಲಮಂಡಳಿ ಸಮರ್ಪಕ ನೀರು ಸರಬರಾಜು ಮಾಡಲು ವಿಫಲವಾಗಿದೆ ಎಂಬುದು ಸಾರ್ವಜನಿಕರ ದೂರಾಗಿದೆ.
