ಮಂದಿರ ಕಟ್ಟಲಿ ನಾವೂ ಬೆಂಬಲ ಕೊಡುತ್ತೇವೆ ಸಂಸದ ಸುರೇಶ್

ಕೇವಲ ರಾಮಮಂದಿರವಲ್ಲ,‌ ಜಿಲ್ಲೆಯ ಹಲವು ಕಡೆ ದೇವಾಲಯಗಳಿವೆ. ಎಲ್ಲಾ ಕಡೆಯೂ ಬಂದು ದೇವಾಲಯ ಕಟ್ಟಲಿ ನಮ್ಮ ಅಭ್ಯಂತರವಿಲ್ಲ. ನಾವು ಸಹ ಅವರಿಗೆ ಬೆಂಬಲ ಕೊಡುತ್ತೇವೆ ಎಂದು ಸಂಸದ ಡಿ.ಕೆ.ಸುರೇಶ್ ವ್ಯಂಗ್ಯವಾಡಿದರು.

ಚನ್ನಪಟ್ಟಣದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಸುರೇಶ್ಅ್ವ ರಾಮನಗರದಲ್ಲಿ ರಾಮಮಂದಿರ ಕಟ್ಟುತ್ತೇವೆ ಎಂಬ ಸಚಿವ ಅಶ್ವತ್ಥ್‌ನಾರಾಯಣ್ ಹೇಳಿಕೆ ಕೇವಲ ಚುನಾವಣಾ ಗಿಮಿಕ್. ರಾಮಮಂದಿರ ಕಟ್ಟಲು ಜಾಗ ಗುರುತಿಸಿದ್ದಾರಾ, ನೀಲಿನಕ್ಷೆ ರೂಪಿಸಿದ್ದಾರೆಯೇ ಅಥವಾ ಬಜೆಟ್‌ನಲ್ಲಿ ಹಣ ಇಟ್ಟಿದ್ದಾರಾ.. ಎಂದು ಪ್ರಶ್ನಿಸಿದ ಸುರೇಶ್, ಚುನಾವಣೆಗೋಸ್ಕರ ಬರೀ ಘೋಷಣೆ ಮಾಡಿದ್ದಾರೆ. ಬಿಜೆಪಿಯವರು ಸುಮ್ಮನೆ ಮಾತನಾಡುತ್ತಾರೆ. ಅಶ್ವಥ್ ನಾರಾಯಣ್ ಬಂದು ರಾಮಮಂದಿರ ಕಟ್ಟಲಿ. ಬಿಜೆಪಿಯವರಿಗೆ ಚುನಾವಣೆಗೋಸ್ಕರ ರಾಮ ಇವತ್ತಿನಿಂದ ಪರಿಚಯ. ನಮ್ಮ ತಂದೆ ಕಾಲದಿಂದಲೂ ನಾವು ರಾಮನನ್ನ ಪೂಜಿಸುತ್ತೇವೆ. ಕಸಗುಡಿಸೋಕೆ ಬಂದವರ ಹತ್ತಿರ ನಾವು ಮಾತಮಾಡಲ್ಲ ಎಂದು ಸಚಿವ ಅಶ್ವಥ್ ನಾರಾಯಣ್ ಗೆ ಕುಟುಕಿದರು.

ರಾಮನ ಪೂಜೆ ಮಾಡುವವರು ಪಬ್ಲಿಕ್ ನಲ್ಲಿ ಹೇಳ್ಕೊಂಡು ತಿರುಗಲ್ಲ. ದೇವರು ಪೂಜೆ ಮಾಡೋದನ್ನ ಯಾರು ಸಹ ವೈಭವೀಕರಿಸಿಕೊಳ್ಳಲ್ಲ. ಇದು ಚುನಾವಣೆ ಗಿಮಿಕ್, ಚುನಾವಣೆ ಹತ್ತಿರ ಬಂದಾಗ ಹೀಗೆ ಮಾಡುತ್ತಾರೆ. ರಾಮನ ದೇವಸ್ಥಾನನಾದ್ರೂ ಕಟ್ಟಲಿ, ಹನುಮಂತ, ಶಿವ, ಲಕ್ಷ್ಮಿ ಸೇರಿದಂತೆ ಎಲ್ಲರ ದೇವಸ್ಥಾನ ಕಟ್ಟಲಿ. ಜೆಲ್ಲೆಯಲ್ಲಿ ಹಲವು ಕಡೆ ಬೆಟ್ಟ, ದೇವಾಲಯ ಇದೆ. ಎಲ್ಲಕಡೆನೂ ಬಂದು ದೇವಾಲಯ ಕಟ್ಟಲಿ, ನಾವೂ ಸಹ ಬೆಂಬಲ ಕೊಡ್ತಿವಿ. ಅವರು ದೇವಸ್ಥಾನ ಕಟ್ಟುತ್ತೇವೆ ಎಂದರೆ  ನಾವು ಬೇಡ ಅನ್ನೋಕೆ ಆಗುತ್ತಾ? ಅಶ್ವಥ್ ನಾರಾಯಣ್ ಒಂದು ದೇವಸ್ಥಾನನಾದ್ರೂ ಕಟ್ಟಿದ್ದಾನಾ ಎಂದು ಏಕವಚನದಲ್ಲಿ ವಾಗ್ದಾಳಿ ನಡೆಸಿದರು.

ಎಚ್ಡಿಕೆ ಸರ್ಟಿಫಿಕೇಟ್ ಬೇಡ:

 ಡಿ .ಕೆ.ಶಿವಕುಮಾರ್  ಸಿಎಂ ಆಗುವ ವಿಚಾರ ದೆಹಲಿಯಲ್ಲಿ ತೀರ್ಮಾನ ಆಗುತ್ತದೆ. ನಮಗೆ ಕುಮಾರಸ್ವಾಮಿ ಅವರ ಸರ್ಟಿಫಿಕೇಟ್ ಬೇಡ, ನಾವು ಜನರ ಸರ್ಟಿಫಿಕೇಟ್‌ಗಾಗಿ ಹೋರಾಟ ಮಾಡುತ್ತಿದ್ದೇವೆ. ಕುಮಾರಸ್ವಾಮಿ ಅವರಿಗೆ ಎರಡು ಬಾರಿ ಅವಕಾಶ ಮಾಡಿಕೊಟ್ಟಿದ್ದೀರಿ ನಮಗೂ ಒಂದು ಬಾರಿ ಅವಕಾಶ ಮಾಡಿಕೊಡಿ ಅಂತ ಕೇಳ್ತಿದ್ದೇವೆ. ಈ ಬಗ್ಗೆ ಜನತೀರ್ಮಾನ ಮಾಡುತ್ತಾರೆ ಎಂದು ಮಾಜಿ ಸಿಎಂ ಎಚ್.ಡಿ.ಕುಮಾರಸ್ವಾಮಿ ಅವರಿಗೆ ಟಾಂಗ್ ನೀಡಿದರು.

ಮುನಿರತ್ನ ವಿರುದ್ಧವೂ ಹರಿಹಾಯ್ದ ಸುರೇಶ್, ನಮ್ಮ ಮೇಲೆ ಹೋರಾಟ ಮಾಡುವ ಮೊದಲು ಅವರ ಪಕ್ಷದವರ ವಿರುದ್ಧ ಹೋರಾಡಲಿ, ಅವರ ವಿರುದ್ಧ ದೂರು ನೀಡಿರುವುದು ನಾವಲ್ಲ, ಅವರ ಪಕ್ಷದವರೇ ಎಂದು ಟೀಕಿಸಿದರು.

ಆಡಳಿತ ಯಂತ್ರವನ್ನ ಹಿಡಿತದಲ್ಲಿಟ್ಟುಕೊಳ್ಳಲು ಬಿಜೆಪಿ ಸರ್ಕಾರಕ್ಕೆ ಸಾಧ್ಯವಾಗುತ್ತಿಲ್ಲ. ಸರ್ಕಾರ ಅಧಿಕಾರಿಗಳನ್ನೇ ಬಿಟ್ಟು ಲಂಚ ವಸೂಲಿ ಮಾಡುತ್ತಿದೆ. ಶೇ. 40 ಕಮಿಷನ್ ಜೊತೆ ಹಲವು ಹಗರಣಗಳು ನಡೆತಿರೋದೆ ಆಡಳಿತ ವ್ಯವಸ್ಥೆ ಬೆಂಬಲದಿಂದ. ಅದಕ್ಕಾಗಿ ಆಡಳಿತ ವ್ಯವಸ್ಥೆ ಹಿಡಿತಕ್ಕೆ ಸಿಗುತ್ತಿಲ್ಲ. ಅಧಿಕಾರಿಗಳ ವಿರುದ್ಧ ಕ್ರಮಕ್ಕೆ ಹೋದರೇ ಇವರ ವಿರುದ್ಧವೇ ತಿರುಗಿ ಬೀಳುತ್ತಾರೆ. ಅದಕ್ಕೆ ಸರ್ಕಾರದವರು ಹೇಗೋ ನಡೆದುಕೊಂಡು ಹೋಗಲಿ ಅಂತ ಕಾಲಕಳೆಯುತ್ತಿದ್ದಾರೆ ಎಂದು ಟೀಕಿಸಿದರು.