ನಾಚಿಕೆಗೇಡು: ದೇಶ ರಾಜ್ಯವನ್ನಾಳುತ್ತಿರುವ ರಾಜಕಾರಣಿಗಳ ಅಸಡ್ಡೆ ಮತ್ತು ಅಧಿಕಾರಿಗಳ ಬೇಜವಬ್ದಾರಿಯಿಂದ ಪರಿಶಿಷ್ಟ ಜಾತಿಯವರು ಮೃತಪಟ್ಟರೆ ಅಂತ್ಯ ಸಂಸ್ಕಾರ ನೆರವೇರಿಸಲು ಸ್ಮಶಾನ ಸೌಲಭ್ಯ ಕಲ್ಪಿಸಲು ಪರದಾಡುತ್ತಿರುವುದು ನಾಚಿಕೆಗೇಡಿನ ಸಂಗತಿ ಎಂದು ಗ್ರಾಮಸ್ಥರು ಆರೋಪಿಸಿದರು.
ಕಾಲೋನಿಯ ಬಿ.ಎಸ್.ಪಿ ಮುಖಂಡರಾದ ನಾಗೇಶ್, ವೆಂಕಟಾಚಲ, ಗ್ರಾಮದ ಕೆಲವರು ಮಾತನಾಡಿ, ದೊಡ್ಡಾಲಹಳ್ಳಿಯ ವಾರ್ಡ್ ನಂ.1ರ ಹನುಮಂತನಗರದಲ್ಲಿ 300ಕ್ಕೂ ಹೆಚ್ಚು ಮಂದಿ ವಾಸ ಮಾಡುತ್ತಿದ್ದೇವೆ. ಬಹಳ ವರ್ಷಗಳಿಂದಲೂ ನಮಗೆ ಸ್ಮಶಾನದ ಸೌಲಭ್ಯವಿಲ್ಲ, ಅಲ್ಲಿಇಲ್ಲಿ ಗೋಮಾಳ ಸೇರಿದಂತೆ ಬೇರೆಯವರ ಜಮೀನುಗಳಲ್ಲಿ ಶವಸಂಸ್ಕಾರ ನಡೆಸುತ್ತಾ ಬಂದಿದ್ದೇವೆ, ಈ ಸಂಬಂದ ೨೦೧೪ರಲ್ಲಿ ಅಂದಿನ ಜಿಲ್ಲಾಧಿಕಾರಿಗಳಿಗೆ ಮಾಡಿದ ಮನವಿಯ ಹಿನ್ನೆಲೆಯಲ್ಲಿ ತಾಲೂಕು ಆಡಳಿತಕ್ಕೆ ಸ್ಥಳ ನಿಗಧಿಪಡಿಸುವಂತೆ ಆದೇಶ ಮಾಡಿದ ಹಿನ್ನಲೆಯಲ್ಲಿ ಸರ್ಕಾರಿ ಗೋಮಾಳದಲ್ಲಿ 111ರ ಎಕರೆ ವಿಸ್ತೀರ್ಣದಲ್ಲಿ ಬೆಟ್ಟ ಕಲ್ಲು ಬಂಡೆಗಳ ನಡುವೆ ಯೋಗ್ಯವಲ್ಲದ, 1 ಎಕರೆ ಮಂಜೂರು ಮಾಡಿದ್ದಾರೆ. ಈ ಸ್ಥಳವು ಕಲ್ಲು ಪ್ರದೇಶವಾಗಿರುವುದರಿಂದ ಶವ ಸಂಸ್ಕಾರ ಮಾಡಲು ಆಗುತ್ತಿಲ್ಲ.
ಗ್ರಾಮದಲ್ಲಿ ಸರ್ಕಾರದ ವತಿಯಿಂದ 3 ಎಕರೆ 20 ಗುಂಟೆ ವಿಸ್ತೀರ್ಣದಲ್ಲಿ ಉತ್ತಮ ಸ್ಮಶಾನ ನಿರ್ಮಾಣ ಮಾಡಿದ್ದರೂ ಆ ಸ್ಥಳಕ್ಕೆ ದಲಿತರ ಶವ ಸಂಸ್ಕಾರ ಮಾಡಲು ಬಿಡುವುದಿಲ್ಲ, ಕೂಡಲೇ ಸರ್ಕಾರ ನಮಗೆ ಸ್ಮಾಶನಕ್ಕೆ ಜಾಗ ಕಲ್ಪಿಸಬೇಕೆಂದು ಒತ್ತಾಯಿಸಿದರು.
