ಭತ್ತದ ನಾಡು-ಬರದ ಬೀಡು ಕೊಪ್ಪಳ ಜಿಲ್ಲೆಯಲ್ಲಿ ಬಿಜೆಪಿ-ಕಾಂಗ್ರೆಸ್ ನಡುವೆ ನೇರ ಸ್ಪರ್ಧೆಯಿದೆ. ಚುನಾವಣೆಯಲ್ಲಿ ಗೆಲ್ಲುವುದಕ್ಕಿಂತ ಇತರ ಪಕ್ಷದವರನ್ನು ಸೋಲಿಸುವುದಕ್ಕಷ್ಟೇ ಜೆಡಿಎಸ್ ಸೀಮಿತವಾಗಿದೆ. ಐದು ವಿಧಾನಸಭಾ ಕ್ಷೇತ್ರ ಹೊಂದಿರುವ ಜಿಲ್ಲೆಯಲ್ಲಿ ಮೂರರಲ್ಲಿ ಬಿಜೆಪಿ, ಎರಡರಲ್ಲಿ ಕಾಂಗ್ರೆಸ್ ಶಾಸಕರಿದ್ದಾರೆ. ಕಳೆದ ಬಾರಿ ಕಳೆದುಕೊಂಡ ಕ್ಷೇತ್ರಗಳ ಮರಳಿ ಪಡೆಯಲು ಕೈ ನಾಯಕರು ಹವಣಿಸುತ್ತಿದ್ದಾರೆ. ಇತ್ತ ಕಮಲ ನಾಯಕರು ಗೆಲುವಿನ ನಾಗಾಲೋಟ ಮುಂದುವರಿಸಲು ತವಕಿಸುತ್ತಿದ್ದಾರೆ. ಜಿಲ್ಲಾ ಕೇಂದ್ರ ಕೊಪ್ಪಳದಲ್ಲಿ ತ್ರಿಕೋನ ಸ್ಪರ್ಧೆ ಸಾಧ್ಯತೆಯಿದ್ದು, ಜೆಡಿಎಸ್ ಪ್ರಮುಖ ಪಾತ್ರ ವಹಿಸುವ ಲಕ್ಷಣ ದಟ್ಟವಾಗುತ್ತಿವೆ. ಸದ್ಯ ಅಧಿಕಾರದಲ್ಲಿರುವ ಕೈ-ಕಮಲ ಶಾಸಕರ ವಿರುದ್ಧ ಅವರವರ ಕ್ಷೇತ್ರದಲ್ಲಿ ಅಸಮಾಧಾನ ಮಡುಗಟ್ಟಿದ್ದು, ಚುನಾವಣೆ ಮೇಲೆ ಪರಿಣಾಮ ಬೀರುವುದರಲ್ಲಿ ಸಂದೇಹವಿಲ್ಲ. ನಾಲ್ಕು ಕ್ಷೇತ್ರಗಳಲ್ಲಿ ನೀರಾವರಿಯೇ ಪ್ರಮುಖ ರಾಜಕೀಯ ದಾಳವಾಗಿದ್ದು, ಗಂಗಾವತಿಯಲ್ಲಿ ಹಿಂದುತ್ವ ತಂತ್ರ ಫಲಿಸುತ್ತಿದೆ.
