ರಾಜಕೀಯ ಮುತ್ಸದ್ದಿ ಎಸ್. ನಿಜಲಿಂಗಪ್ಪ ಅವರನ್ನು ಮುಖ್ಯಮಂತ್ರಿಯನ್ನಾಗಿ ನಾಡಿಗೆ ಕೊಡುಗೆ ನೀಡಿದ ಹಾಗೂ ಅದೇ ನಿಜಲಿಂಗಪ್ಪರನ್ನು ಸೋಲಿಸಿದ್ದ ಕೋಟೆನಾಡು ಚಿತ್ರದುರ್ಗ ಜಿಲ್ಲೆಯಲ್ಲಿ ಈಗ ವಿಧಾನಸಭಾ ಚುನಾವಣೆ ಕಾವು ಜೋರಾಗಿದೆ. ಹಾಲಿ, ಮಾಜಿ, ಪರಾಜಿತ ಅಭ್ಯರ್ಥಿಗಳ ನಡುವೆ ಏಕಾಏಕಿ ಹಲವರ ತವರು ಪ್ರೇಮ ಅನಾವರಣವಾಗಿದೆ. ಆಕಾಂಕ್ಷಿಗಳ ಉಮೇದು ಹಲವು ಕ್ಷೇತ್ರಗಳಲ್ಲಿ ಕಾಣಿಸತೊಡಗಿದ್ದು, ಮತದಾರರ ಸೆಳೆಯಲು ಸುತ್ತಾಟ ಜೋರಾಗಿಯೇ ನಡೆಸಿದ್ದಾರೆ. ಮೊಳಕಾಲ್ಮೂರು, ಚಳ್ಳಕೆರೆ ಕ್ಷೇತ್ರಗಳು ಪರಿಶಿಷ್ಟ ವರ್ಗಕ್ಕೆ, ಹೊಳಲ್ಕೆರೆ ಕ್ಷೇತ್ರ ಪರಿಶಿಷ್ಟ ಜಾತಿಗೆ ಮೀಸಲಿವೆ. ಚಿತ್ರದುರ್ಗ, ಹಿರಿಯೂರು ಹಾಗೂ ಹೊಸದುರ್ಗ ಸಾಮಾನ್ಯವರ್ಗದ ಕ್ಷೇತ್ರಗಳಾಗಿವೆ. 2018ರ ಚುನಾವಣೆಯಲ್ಲಿ ಆರು ಕ್ಷೇತ್ರಗಳ ಪೈಕಿ ಚಳ್ಳಕೆರೆ ಹೊರತುಪಡಿಸಿ ಉಳಿದ ಐದರಲ್ಲಿ ಬಿಜೆಪಿ ಗೆಲುವು ದಾಖಲಿಸಿದೆ. ಕಳೆದ ಚುನಾವಣಾ ಸಮಯದಲ್ಲಿ ಅನ್ಯ ಜಿಲ್ಲೆಯಿಂದ ಬಂದವರು ತವರಿಗೆ ಮರಳಲು ಸಜ್ಜಾಗಿದ್ದಾರೆಂಬ ಮಾತಿನ ನಡುವೆ, ಜಿಲ್ಲೆಗೆ ಆಗಮಿಸಬಹುದಾದ ಹೊಸಬರು ಯಾರಿಗೆಲ್ಲ ಪೆಟ್ಟು ಕೊಡಬಹುದೆಂಬ ಭವಿಷ್ಯದ ಲೆಕ್ಕಾಚಾರಗಳೂ ನಡೆದಿವೆ. ಜಿಲ್ಲೆಯಲ್ಲಿ ಸದ್ಯಕ್ಕಂತೂ ಬಿಜೆಪಿ-ಕಾಂಗ್ರೆಸ್ ಪಾರ್ಟಿಗಳ ಟಿಕೆಟ್ಗೆ ಪೈಪೋಟಿ ಇದೆ. ಒಂದು ಕಾಲದಲ್ಲಿ ಜನತಾ ಪರಿವಾರ ಇಲ್ಲಿ ಪ್ರಭಾವಿಯಾಗಿತ್ತು. ಮತ್ತೆ ಜೆಡಿಎಸ್ ಸಂಘಟಿತವಾದರೆ ಎದುರಾಳಿಗಳಿಗೆ ಪ್ರಬಲ ಪೈಪೋಟಿ ನೀಡಬಹುದು.
