ಸುಗಮ ಸಂಚಾರಕ್ಕೆ ಗುಂಡಿ ಗಂಡಾಂತರ

•  ಅಬ್ಬನಕುಪ್ಪೆ- ಇಟ್ಟಮಡು ಸಂಪರ್ಕ ರಸ್ತೆಯಲ್ಲಿ ಹಳ್ಳ
•   20ಕ್ಕೂ ಹೆಚ್ಚು ಮ್ಯಾನ್​ಹೋಲ್​ ನಿರ್ಮಾಣ
• ವಾಹನ ಸವಾರರ ಸುಗಮ ಸಂಚಾರಕ್ಕೆ ಅಡ್ಡಿ

ಬಿಡದಿ

ತಾಲೂಕಿನ ಅಬ್ಬನಕುಪ್ಪೆ&ಇಟ್ಟಮಡು ರಸ್ತೆಯನ್ನು ಯುಜಿಡಿ ಕಾಮಗಾರಿಗೆ ಅಗೆದು ವರ್ಷಗಳೇ ಕಳೆದರೂ ಡಾಂಬರೀಕರಣ ಮಾಡದ ಹಿನ್ನೆಲೆಯಲ್ಲಿ ಗುಂಡಿ ಬಿದ್ದು, ವಾಹನಗಳ ಸವಾರರು ಸಂಚಾರ ಮಾಡಲು ಪರಿತಪಿಸುವಂತಾಗಿದೆ.

ಹೌದು... ಪುರಸಭೆ ವ್ಯಾಪ್ತಿಯ 19ನೇ ವಾರ್ಡ್​ಗೆ ಒಳಪಡುವ ಅಬ್ಬನಕುಪ್ಪೆಯಿಂದ 21ನೇ ವಾರ್ಡ್​ ಇಟ್ಟಮಡು ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆಯಲ್ಲಿ ಒಂದೂವರೆ ವರ್ಷದ ಹಿಂದೆ ಯುಜಿಡಿ ಕಾಮಗಾರಿ ಮಾಡಿ ಪೈಪ್​ ಅಳವಡಿಕೆ ಮಾಡಲಾಗಿದೆ. ಎರಡು ಕಿಮೀ ಉದ್ದದ ರಸ್ತೆಯುದ್ದಕ್ಕೂ 20ಕ್ಕೂ ಹೆಚ್ಚು ಮ್ಯಾನ್​ಹೋಲ್​ ನಿರ್ಮಿಸಲಾಗಿದೆ. ಕಾಮಗಾರಿ ಪೂರ್ಣಗೊಳಿಸಿದ ಬಳಿಕ ಯುಜಿಡಿ ಗುತ್ತಿಗೆದಾರ ಅಗೆದಿರುವ ರಸ್ತೆಗೆ ಡಾಂಬರ್​ ಹಾಕದೆ ಬಿಟ್ಟುಹೋಗಿರುವ ಕಾರಣ ಈಗ ದೊಡ್ಡ ದೊಡ್ಡ ಗುಂಡಿಗಳಾಗಿವೆ.

ರಸ್ತೆಯ ಮಧ್ಯ ಭಾಗ ಸೇರಿ ಅಲ್ಲಲ್ಲಿ ಗುಂಡಿಗಳಿರುವ ಹಿನ್ನೆಲೆಯಲ್ಲಿ ವಾಹನಗಳ ಸುಗಮ ಸಂಚಾರಕ್ಕೆ ಅಡ್ಡಿಯಾಗಿದೆ. ಈ ರಸ್ತೆಯು ರಾಮನಹಳ್ಳಿ, ಗೋಪಹಳ್ಳಿ, ಬಿಲ್ಲೆದೊಡ್ಡಿ ಮಾರ್ಗವಾಗಿ ಕೊಳ್ಳಗನಹಳ್ಳಿ ಕಡೆಗೆ, ಹಾಗೆಯೇ ತೊರೆದೊಡ್ಡಿ, ಅಂಗರಹಳ್ಳಿ, ಹೆಗ್ಗಡಗೆರೆ ಮೂಲಕ ಬಿಡದಿ- ಮುದುವಾಡಿ ಮುಖ್ಯರಸ್ತೆ ಸೇರಿ ಸುತ್ತಮುತ್ತಲ ಹತ್ತಾರು ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುತ್ತದೆ.

ಅಬ್ಬನಕುಪ್ಪೆ ಸರ್ಕಲ್​ ಮೂಲಕ ಬಿಡದಿ ಕೈಗಾರಿಕಾ ಪ್ರದೇಶಕ್ಕೆ ನೇರವಾಗಿ ಈ ರಸ್ತೆ ಸಂಪರ್ಕ ಕಲ್ಪಿಸುವುದರಿಂದ ಪ್ರತಿದಿನ ನೂರಾರು ವಾಹನಗಳು ಸಂಚರಿಸುತ್ತವೆ.

ಗುಂಡಿ ತಪ್ಪಿಸಲು ಸರ್ಕಸ್​

ಗುಂಡಿ ಬಿದ್ದಿರುವ ರಸ್ತೆಯಲ್ಲಿ ಸಂಚಾರ ಮಾಡುವ ಬೈಕ್​ ಸವಾರರು ಗುಂಡಿಗಳನ್ನು ತಪ್ಪಿಸಲು ಸರ್ಕಸ್​ ಮಾಡಬೇಕಾಗಿದೆ. ರಾತ್ರಿ ವೇಳೆ ಬೈಕ್​ ಸಮೇತ ಬಿದ್ದು ಗಾಯಗೊಂಡಿರುವ ಹಲವು ನಿದರ್ಶನಗಳಿವೆ. ಪ್ರತಿದಿನ ಶಾಲಾ ವಾಹನಗಳು ಹೆಚ್ಚಿನ ಸಂಖ್ಯೆಯಲ್ಲಿ ಇದೇ ರಸ್ತೆಯಲ್ಲಿ ಸಂಚರಿಸಲಿದ್ದು, ಹಳ್ಳದಿಣ್ಣೆಯಿಂದ ಕೂಡಿದ ರಸ್ತೆಯಲ್ಲಿ ವಾಹನ ಚಾಲನೆ ಮಾಡುವುದು ಸವಾಲಾಗಿದೆ.

ಯುಜಿಡಿ ಕಾಮಗಾರಿ ಸಲುವಾಗಿ ಇಟ್ಟಮಡು& ಅಬ್ಬನಕುಪ್ಪೆ ರಸ್ತೆ ಅಗೆದು ಕಾಮಗಾರಿ ಮಾಡಿ ವರ್ಷ ಕಳೆದರೂ ಡಾಂಬರೀಕರಣ ಮಾಡುವ ಗೋಜಿಗೆ ಪುರಸಭೆ ಹೋಗಿಲ್ಲ. ಈ ರಸ್ತೆಯಲ್ಲಿ ವಾಹನಗಳ ಸಂಚಾರ ಸವಾಲಾಗಿದ್ದು, ಈಗ ಧೂಳು ಹೆಚ್ಚಾಗಿರುವುದರಿಂದ ಸ್ಥಳಿಯರು ಹಾಗೂ ವಾಹನ ಸವಾರರು ಪಡಿಪಾಟಲು ಪಡುವಂತಾಗಿದೆ. > ಪುಟ್ಟಣ್ಣ, ಇಟ್ಟಮಡು ಗ್ರಾಮಸ್ಥಪುರಸಭಾ ವ್ಯಾಪ್ತಿಯಲ್ಲಿ ಯುಜಿಡಿ ಕಾಮಗಾರಿಗೆ ರಸ್ತೆ ಅಗೆಯಲಾಗಿದೆ. ಈಗಾಗಲೇ ಎಲ್ಲ ವಾರ್ಡ್​ ವ್ಯಾಪ್ತಿಯಲ್ಲಿರುವ ರಸ್ತೆಗಳಿಗೆ ಡಾಬರೀಕರಣ ಮಾಡಲು ಯೋಜನೆ ರೂಪಿಸಲಾಗಿದೆ. ಕಾಮಗಾರಿಗಾಗಿ 1.25 ಕೋಟಿ ರೂ. ಮೀಸಲಿಡಲಾಗಿದೆ. ನೀತಿ ಸಂಹಿತೆ ಜಾರಿಯಲ್ಲಿದ್ದ ಕಾರಣ ಸಭೆ ಮಾಡಲು ಆಗಿಲ್ಲ. ಮುಂದಿನ ತಿಂಗಳು ಸಭೆ ಕರೆದು ಅನುಮೋದನೆ ನೀಡಿ ಟೆಂಡರ್​ ಕರೆದು ರಸ್ತೆಗಳಿಗೆ ಡಾಂಬರೀಕರಣ ಮಾಡಲಾಗುತ್ತದೆ.ಹರಿಪ್ರಸಾದ್​, ಬಿಡದಿ ಪುರಸಭೆ ಅಧ್ಯಕ್ಷ