ಕುಖ್ಯಾತ ಸರಗಳ್ಳ ರಿಜ್ವಾನ್​ ಕಾಲಿಗೆ ಪೊಲೀಸರ ಗುಂಡು !

ತುಮಕೂರು: ಮಾರಣಾಂತಿಕ ಹಲ್ಲೆ ನಡೆಸಿ ತಪ್ಪಿಸಿಕೊಳ್ಳಲು ಯತ್ನಿಸಿದ ಕುಖ್ಯಾತ ಸರಗಳ್ಳನ ಕಾಲಿಗೆ ಪೊಲೀಸರು ಗುಂಡಿಕ್ಕಿದ್ದಾರೆ.

ಆಂಧ್ರಪ್ರದೇಶದ ಹಿಂದೂಪುರ ಮೂಲದ ರಿಜ್ವಾನ್​ (34) ಎಂಬಾತನ ಕಾಲಿಗೆ ಮಧುಗಿರಿ ತಾಲೂಕಿನ ಈಜೀಹಳ್ಳಿ ಕ್ರಾಸ್​ ಬಳಿ ಸೋಮವಾರ ಮಧ್ಯಾಹ್ನ 1.40ರಲ್ಲಿ ಪೊಲೀಸರು ಗುಂಡಿಕ್ಕಿದ್ದಾರೆ. ಹೊಸಕೋಟೆ ಬಳಿ ಸೆರೆ ಸಿಕ್ಕ ರಿಜ್ವಾನ್​ನನ್ನು ಮಧುಗಿರಿಗೆ ಕರೆತರುವಾಗ ಈಜೀಹಳ್ಳಿ ಕ್ರಾಸ್​ ಬಳಿ ಬಹಿರ್ದೆಸೆಗೆ ಹೋಗಲು ಜೀಪ್​ನಿಂದ ಇಳಿದಿದ್ದ. ಈ ವೇಳೆ ಸ್ಥಳದಲ್ಲಿ ಬಿದ್ದಿದ್ದ ಬೀರುಬಾಟಲ್​ ಚೂರು ತೆಗೆದು ಪೇದೆ ರಮೇಶ್​ ಮೇಲೆ ಹಲ್ಲೆ ನಡೆಸಿ ತಪ್ಪಿಸಿಕೊಳ್ಳಲು ಯತ್ನಿಸಿದ್ದಾನೆ.

ಆತ್ಮರಕ್ಷಣೆಗೆ ಇನ್ಸ್​ಪೆಕ್ಟರ್​ ಹನುಮಂತರಾಯಪ್ಪ ಆರೋಪಿ ಕಾಲಿಗೆ ಗುಂಡು ಹೊಡೆದಿದ್ದಾರೆ. ನಂತರ ಆರೋಪಿ ರಿಜ್ವಾನ್​ಗೆ ಮಧುಗಿರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಿ ಜಿಲ್ಲಾ ಆಸ್ಪತ್ರೆಗೆ ಕರೆತಂದು ದಾಖಲಿಸಲಾಗಿದೆ.

ಒಟ್ಟು 15 ಕ್ಕೂ ಹೆಚ್ಚು ಸರಗಳ್ಳತನ ಪ್ರಕರಣಲ್ಲಿ ಭಾಗಿಯಾಗಿದ್ದ ಆರೋಪಿ ರಿಜ್ವಾನ್​ ಹೊಸಕೋಟೆಯಲ್ಲಿರುವ ಮಾಹಿತಿಯನ್ನು ಮತ್ತೊಬ್ಬ ಆರೋಪಿ ಚಿನ್ನಾ ನೀಡಿದ್ದ. ಈ ಹಿನ್ನೆಲೆಯಲ್ಲಿ

ಮಧುಗಿರಿ ಡಿವೈಎಸ್ಪಿ ಪಿ.ರಾಮಂದ್ರಪ್ಪ ಮಾರ್ಗದರ್ಶನದಲ್ಲಿ ಸಿಪಿಐ ಹನುಮಂತರಾಯಪ್ಪ, ಮಿಡಿಗೇಶಿ ಸಬ್​ ಇನ್ಸ್​ಪೆಕ್ಟರ್​ ಅಮ್ಮನಗಿ, ಪೇದೆಗಳಾದ ರಮೇಶ್​, ಪ್ರಕಾಶ್​ ಮತ್ತು ಮುತ್ತರಾಜ್​ ತಂಡ ತೆರಳಿತ್ತು.