ಪಹಲ್ಗಾಮ್​ ದಾಳಿ ಶೋಕ, ಪೊಲೀಸ್​ ಅಧಿಕಾರಿ ರೋಡ್​ ಶೋ

ತುಮಕೂರು: ನಗರಠಾಣೆಯಲ್ಲಿ ಕರ್ತವ್ಯ ನಿರ್ವಹಿಸಿ ಇತ್ತೀಚೆಗೆ ವರ್ಗಾವಣೆಗೊಂಡಿರುವ ಸಿಪಿಐ ದಿನೇಶ್​ಕುಮಾರ್​ಗೆ ಅಭಿನಂದನೆ ಹೆಸರಿನಲ್ಲಿ ಏ.23ರ ರಾತ್ರಿ ರೋಡ್​ ಶೋ ನಲ್ಲಿ ಪಟಾಕಿ ಸಿಡಿಸಿ ನಡೆಸಿರುವ ಸಂಭ್ರಮಾಚರಣೆ ತೀವ್ರ ಟೀಕೆಗೆ ಗುರಿಯಾಗಿದೆ.

ಕಾಶ್ಮೀರದಲ್ಲಿ ಭಯೋತ್ಪಾದಕರ ಗುಂಡಿಗೆ ದೇಶವಾಸಿಗಳು ಬಲಿಯಾದ ಶೋಕದಲ್ಲಿರುವಾಗಲೇ ಹಿತೈಷಿಗಳ ಹೆಸರಿನಲ್ಲಿ ಗೃಹ ಸಚಿವ ಡಾ.ಜಿ.ಪರಮೇಶ್ವರ ತವರೂರಿನಲ್ಲಿಯೇ ಶಿಸ್ತಿನ ಇಲಾಖೆಯ ಪೊಲೀಸ್​ ಅಧಿಕಾರಿ ರಸ್ತೆಯಲ್ಲಿ ಸಂಭ್ರಮಾಚರಣೆ ನಡೆಸಿರುವ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿದ ಕೂಡಲೇ ಸಾರ್ವಜನಿಕರು ಆಕ್ರೋಶ ಹೊರಹಾಕಿದ್ದಾರೆ.

ತುಮಕೂರು ಜಿಲ್ಲೆಯಲ್ಲಿ ಇತ್ತೀಚೆಗೆ ಪೊಲೀಸ್​ ಅಧಿಕಾರಿಗಳ ವರ್ಗಾವಣೆ, ಬಡ್ತಿ ಹಾಗೂ ನಿವೃತ್ತಿ ಸಮಯದಲ್ಲಿ ಅವರ ಹಿತೈಷಿಗಳ ಹೆಸರಿನಲ್ಲಿ ಸನ್ಮಾನ, ಬಿರುದು ನೀಡುವ ಸಮಾರಂಭಗಳು ಹೆಚ್ಚಾಗುತ್ತಿದ್ದು ಅದರ ಒಂದು ಭಾಗವಾಗಿಯೇ ದಿನೇಶ್​ಕುಮಾರ್​ಗೆ ಸನ್ಮಾನ ಮಾಡಲಾಗಿದೆ. ಈ ಸಮಾರಂಭದಲ್ಲಿ ಕೆಲವು ಪುಡಿ ಪುಡಾರಿಗಳು, ರೌಡಿಶೀಟರ್​ಗಳು, ರಿಯಲ್​ ಎಸ್ಟೇಟ್​ ಮಧ್ಯವರ್ತಿಗಳು ಭಾಗಿಯಾಗಿದ್ದರು ಎನ್ನಲಾಗಿದೆ.

ತೆರೆದ ಜೀಪ್​ನ ಮೆರವಣಿಗೆಯಲ್ಲಿ ದಿನೇಶ್​ಕುಮಾರ್​ ಅವರನ್ನು ಕಾರ್ಯಕ್ರಮ ನಡೆದ ಸ್ಥಳಕ್ಕೆ ಕರೆತಂದ ಅಭಿಮಾನಿಗಳು ಈ ವೇಳೆ ಬೃಹತ್​ ಗಾತ್ರದ ಕ್ರೇನ್​ ಬಳಸಿ ಹೂವಿನ ಹಾರ ಹಾಕಿ ಸಂಭ್ರಮಿಸಿದ್ದಾರೆ. ಬೃಹತ್​ ಗಾತ್ರದ ಹಾರದ ನಡುವೆ ಹುಲಿ ಚಿತ್ರವನ್ನು ಹಾಕಿ ಅಧಿಕಾರಿಗಳನ್ನು ಹಾಡಿಹೊಗಳಿದ್ದಾರೆ. ದೇಶವೇ ಶೋಕದಲ್ಲಿರುವ ಸಂದರ್ಭದಲ್ಲಿ ಅಧಿಕಾರಿಗಳಿಗೆ ಇಂತಹ ಸಂಭ್ರಮದ ಅಗತ್ಯವೇನಿತ್ತು ಎಂಬ ಪ್ರಶ್ನೆ ನಗರವಾಸಿಗಳದ್ದಾಗಿದೆ.